Неть читнестэ «Надежда» республиканской эйкакшонь ды од ломанень приютсо ютавтовсь «Инечинь тундось минек кудосо» мелень витемань кенярксчись. Истямо вастовомась учреждениясонть ютавтневи эрьва иестэ. Эйкакштне тосонь важодицятнень марто вейсэ тейнить ламо артовкст, мазылгавтыть эрямо таркаст.
– Те чистэнть сыненст ёвтасть ламо лембе валт ды явшесть казнеть Саранской ды Мордовской епархиянь секретаресь, «Надежда» приютонь Попечителень советс совицясь о. Виктор, Саранской духовной семинариянь васенце проректорось о. Павел, Казанень Пазонь Авань лемсэ храмонь священнослужителесь о. Виталий.
Эйкакштне свал кенярдыть приютонь Попечителень советэнь прявтонтень, стакачис понгозь эйкакштнень туртов «София» седеймарямонь фондонь руководителентень Мария Григорьевна Лушенкованень. Сон приютонь свалшкань инже, лезды эйкакштненень эрьва кодамо кевкстемань коряс.
Те чистэнть сыненст истя жо сакшность Лямбирень 2 № СОШ-нь «Казачок» поисково-патриотической дружинань прявтось Сергей Козлов ды те школань директорось Валентина Егорова. Валентина Ивановна тердинзе эйкакштнень кизэнь каникуласто сынст эмежпирест варштамо, тосо вейсэ эрьва мезень кастомо. Тешкстазель, эрьва сёксня те школань коллективесь ламо эмежть-мезть касты те учреждениясонть эрицятнень туртов.
Паро арсемат ды лембе валт эйкакштненень ёвтась «Капитал МС» ООО-нь филиалонь директорось Ольга Солдатова.
Седе тов «Надежда» приютонь воспитательтне пурнавозтненень невтсть мельстуиця концерт.
Алкуксонь кенярксчикс весень туртов ульнесь те учреждениянтень Благодатной толонть совавтомась, эйкакштне вейке-омбоце мельга кирвазтсть штатолт, эрьвась юткстост эсь пачканзо энялдсь вейкеде… Кода паро илязо уле те учреждениясонть, ялатеке тетянь-авань вечкеманть мейсэяк а полавтсак. Теевезь коень коряс, сеть эйкакштненень, кинь ютазь ковсто ульнесть чачома чист, священнослужительтне макссть казнеть. Истя жо казнеть максозельть Инечинь артовксонь коряс пелькстамосонть изницятненень ды весе эйкакштненень.
Пси цяпамосо вастозель алонь ёнов молиця мазый тортонть залс совавтомась, конань анокстызе «Солнце и Луна» ресторанось. Сонзэ прявтось – Ирина Мордовина, кона истя жо свал анок лездамс эрьва кодамо пшкадемань коряс.
Меельцекс «Надежда» приютонь прявтось Татьяна Барашихина весе лездыцятненень ёвтась сюкпрянь валт ды арсесь кеме шумбрачи, оймень лембе ды мелень топавтома.
Валентина ЮДИНА