Пятница, февраля 23, 2024
Важное

Мордовиясо ютась «Мир возможностей – Сделаем вместе» Весероссиянь форумось


Сонзэ анокстыцякс-ютавтыцякс кармасть «Единая Россия» Весероссиянь политической партиясь, Российской Федерациянь Государственной Советэнь «Образование» ёнксонть коряс Комиссиясь, Российской Федерациянь Просвещениянь министерствась ды Мордовия Республикань Правительствась.
Форумонь участниктнень ютксо – «Отраслевой Союз развития социального питания» НКО-нь, Стратегической инициативатнень агентствань, Весероссиянь Народной фронтонь, Российской Федерациянь субъекттнэнь исполнительной властень органтнэнь, Российской Федерациянь Просвещениянь министерствань пси ярсамопелень анокстамонь коряс Оперативной штабонь, истя жо общественной, научной ды образовательной организациятнень, тетятнень-аватнень представительтне.

Форумонь пленарной промксось ульнесь Саранск ошонь «Тавла» тонавтнемань куншкакуронть – 17-це № школанть юрсо. Тов сакшность Мордовиянь Прявтось Артём Здунов ды «Единая Россия» партиянь Генеральной Советэнь секретарень полавтыцясь Дарья Лантратова.
Промксонть ушодоманзо икеле инжетне теевсть содавиксэкс тонавтнемань заведениянть марто ды вастневсть эйкакштнень, «Здоровое питание школьника» акциянь изницятнень марто. Мордовиянь Ицялонь райононь Оброченской школань 9-це классонь тонавтницясь Вячеслав Абрамов ёвтнесь тиринь школань участкатнесэ столовоень туртов эмежтнень кастомадост. Мордовиянь эйкакштне, конатнень ютксо Вячеслав Абрамовгак, 32-це школань тонавтницятнеяк, кить изнясть «Мир возможностей» проектэнть лувсо пелькстамотнесэ, сентябрясто молить «Артекев».

«Здоровое питание школьника», «Культурный код народов России», «Люди Артека» акциятне кармасть васенцекс «Мир возможностей» проектэнть туртов, курок эйстэст кармить седе ламо. Весе сынь тердить вейсэндямс эйкакштнень, тетятнень-аватнень ды тонавтыцятнень эрьва кодат проекттнэсэ улеманть вельде. Сынь нолдавить тонавтнемань од иестэнть.

– Сехте эрявиксэсь – весе мельтне-арсематне ютаст системань проекттнэс, конатнень эйстэ карми покш лезэ минек эйкакштнень туртов, – мерсь Артём Здунов. – Кода те лиссь, невтемакс, школасо андомань коряс минек проектэнть марто, конась вейсэндинзе масторонь келес тетятнень-аватнень.

– «Мир возможностей» – партиянть сехте од проекттнэстэ вейкесь, – ёвтнесь Дарья Лантратова. – Сон уш невтизе лезэвчинзэ. Минь кемтяно тетятнень-аватнень ды тонавтыцятнень лезксэст лангс, тердтяно весень совамс проектэнтень ды ёвтамс эсенк мельтнень-арсематнень – сынь улить марязь.

Од проекттнэнь ёвтыцятне невтизь эсест программаст. Сынст ютксо – «Герой нашего времени», «Цифровая гигиена», «Финансовая грамотность в цифровом мире», «Я люблю родную культуру». Проекттнэ токить эрямонь эрьва кодат ёнкстнэнь. Мордовиянь пельде Госдумань депутатось, ГД-нь Безопасностень ды коррупциянь а нолдамонь коряс комитетэнь председателесь Василий Пискарев тешкстызе, патриотизмась – ней сехте эрявикс кевкстема. «Минь весе тень чарькодтяно ды а эряви максомс возможность Западонтень маштомс минек, а истят бажамот улить», – мерсь сон.

Мероприятиянть лувсо ютавтовсь «Лето с детьми: вместе и с пользой» лезэв ды тантей ярсамопельтнень пидемань рецепттнэнь марто видеороликтнень семиянь онлайн-пелькстамонь изницятнень каземась. «Культурные традиции: вместе веселее» номинациясонть изницякс кармась Саранскойстэ Адушкинтнэнь ламо эйкакшонь триця семиясь, «Летний рецепт: формула правильного питания» номинациясонть – Рузаевкань райононь Кукушкинтнэнь семиясь, «Национальная кухня: связь поколений» – Саранскойстэ Нефедкинтнэнь семиясь, «Приз зрительских симпатий» номинациясонть – Темниковань райононь Андреевтнень семиясь.
Форумсонть тешкстазель, Мордовиясь теевсь «Мир возможностей» федеральной мобилизационной проектэнть презентациянь куншкакурокс. Минек республикась Россиясо васенцетнень ютксо «Тейсынек вейсэ» движениянь акциянть ютавтоманзо коряс.
Саранскоень ды республикань районтнэстэ тонавтницятне эрьва иестэ лиснесть изницякс истят акциятнесэ, кода: «Вода и здоровье», «Здоровый образ жизни – путь к успеху», «Здоровый образ жизни – основа национальных целей развития!», «Победа одна на всех», «Здоровое питание – активное долголетие», «Русский Крым и Севастополь».

Икелень иетнестэ республикасто 140 изницят казезельть путёвкасо «Артек» ды «Орлёнок» Раськеютконь эйкакшонь центрав. Мордовиянь од ломантнень ютксто 10 тёжат лидерт. «Мир возможностей» партиянь проектэнть координаторось, «Сделаем вместе» АНО-нь генеральной директорось Роман Романов путсь покш питне Мордовиясо «Сделаем вместе» акциянть эрямос совавтоманть коряс. Сон тешкстынзе республикасонок уликс общественной движениятнень ды экологиянь организациятнень, конат кемень иетнень перть вейсэндить ёроков од ломантнень. Самай сон теевсь кеме юрокс неть акциятнень эрямос совавтомсто, конатнень ютавты «Сделаем вместе» движениясь.

Валентина ЮДИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».