Саранскоень ёроков эйкакштнень туртов лицеесь важоди кеменде ламо иеть. Лицеесь васня печтясь стакачить: арасель эсензэ кудозо. Савкшнось полавтомс зярыя таркат, ошонь вейке пестэ сынь ютакшность тонавтомо лия пев. 2013 иестэ учовсь Московская куросонть эсест зданиянь панжомась.
Ней лицеесь – весе республиканть каштанчи.
Сонзэ тонавтницянзо невтнить пряст ды изнить аволь ансяк эсенек масторонь пелькстамотнесэ, Раськеютконь покш олимпиадатнесэяк. Кие аноксты сынст, кие алты тенст ламо шка ды вийть? Нама, тонавтыцятне. Самай вейкеденть юткстост ули меленек ёвтнемс газетань ловныцятненень. Лицеенть панжомсто саезь ды те шкас тесэ важоди Любовь Алексеевна Панкратова. Сон вети математикань урокт.
Математикась – аволь шожда предмет. Ламонень маряви стакакс, а чарькодевикс ды а изнявикс. Лиятне, мекевланг, пек вечксызь цифратнень, задачатнень, пелькстыть, пря порксыть-арсить, кода муемс виде ловоманть. Паряк, весемесь ашти тонавтыцядонть?
– Монень маряви, чачиньгак улемс математикань тонавтыцякс меленть марто. Предметэнтень ды профессиянтень вечкемась чачи-ладяви школасо. Тон бажат улемс кода эсеть тонавтыцят. Сюкпря ёвтан Отяжбуень Сабанцелень школантень, сонзэ пек паро тонавтыцятненень. Математиканть ветясть Лидия Степановна Яшкина ды Анастасия Владимировна Федотова. Мон сюконян тенст. Эсь шкасто Лидия Степановнань материалонзо лиснесть советской журналтнэсэ. Сон пек превей ды вечксь эсь тевензэ. Минек школась сестэ зэрнесь. Тесэ тонавтнесть ламо эйкакшт. Мольсь мельстуиця, пешксе эрьва кодамо тевде башка эрямо! – ледстни Любовь Алексеевна.
Сон тонавтнесь парсте, явсь мель спортонтень, киштематненень... Мезе сынь ансяк эзть тее школасо. Любовь Алексеевна чачсь ламо эйкакшонь триця семиясо. Аваст ранаяк тусь эрямосто… Вете эйкакштнень ськамонзо кепедсь тетяст Алексей Александрович. Лездась тензэ эйкакштнень трямосо-кастомасо аваст сазорозо, патяст Раиса Сергеевна. Эсензэ семиязо арасель. Ней сонензэ 94 иеть.
Школань прядомадо мейле од тейтересь кармась тонавтнеме Н.П. Огарёв лемсэ МГУ-нь математикань факультетсэ. Уш тонавтнемстэ важодсь пионервожатоекс, воспитателекс. Вастызе мирдензэ. Налксесть свадьба. Вузонь прядомадо мейле распределениянь коряс кучизь Теньгушевань районов. Мирдесь чачсь те буесэнть. Эрясть Куликово велесэ. Од семиясь важодсь школасо. Сынь ветясть зярыя предметт: математика, история, черчения…
– Стакаль васенце шкастонть?
– Минь ульнинек одт, мезеськак стакакс эзь маряво. Эрямонь кинек лангсо вастынек пек паро ломанть. Коллективесь вастымизь лембестэ. Тосо ульнесть ламо од специалистт. Весе вейке-вейкенень лездынек, теевинек ялгакс. Ды те шкас кирдтяно ялгаксчи! Васенце тонавтницянок уш покшт, улить семияст ды нуцькаст. Сакшныть тенек инжекс, гайневтить телефонга. Кие кармась тонавтыцякс, кие врачокс, кие крановщикекс…Кить иляст уле, аштян кисэст мельспаросо ды каштанчисэ, сынь теевсть паро ломанекс.
Шкань ютазь Панкратовтне састь эрямо Саранскоев. Любовь Алексеевна кармась важодеме ошонь 40№ школасо. Мирдезэ мольсь милицияв. Эряви меремс, Любовь Алексеевна семиясост аволь ськамонзо тонавтыця. Надежда Алексеевна сазорозо эри Отяжбуень Цёлпановасо. Ламо иеть сон ульнесь школань прявтокс. Ней важоди рузонь ды эрзянь келень ды литературань тонавтыцякс. Елена Алексеевна сазорозо истя жо математикань тонавтыця. Кувать важодсь Саранскойсэ, ней тонавты Московонь эйкакштнень.
Любовь Алексеевнань аволь весть тердтнесть важодеме завучекс, школань прявтокс. Виде, зярс-бути ульнесь завучекс. Ансяк сехте пек тукшны мелезэнзэ тонавтомс, ветямс урокт, неемс, кода эйкакштне теить изнявкст эсь тонавтнемань тевсэст. Ней сон вети математика лицеень 9-це ды 11-це класстнэсэ. Вети олимпиадас анокстамонь курсат. Тов тензэ сакшныть 5—11-це класстнэнь тонавтницятне. Сакшныть ошонь лия школатнестэяк.
– Олимпиадасо изнявкстнэ аволь монь. Те – эйкакштнень, сынст тетяст-аваст ды монь коллегатнень. Ськамонзо тонавтыцясь мезеяк а теи. Лицейсэ ладязь паро система. Важоди весе коллективесь. Весе вейсэ арсетяно эрьвадонть. А улевельть истят покш изнявкст, бути арась коллективенть ды администрациянть ютксо вейсэнь важодема. А карман ушолеме тонавтницятнень лемест, конатнень улить покш изнявксост. Пелян покордамс киньгак. Эрьва тонавтницянть кирдян мельсэнь. Те монь эйкакшон. Кие-бути кунсолы ды парсте тонавтни, кие-бути тонавтни ды кенери озоровамояк. Пек кецнян лицеень прядыцятнень кис, конат састь тенек важодеме. Минь сыненст лездатано, сынь – миненек. Кодаяк а кемеви тень, зярдо ломантне кортыть беряньстэ тонавтыцятнеде. Монь эрямосо арасельть берянь учительть.
– Любовь Алексеевна, кортыть, неень шкань эйкакштне лият… Кода арсетядо?
– Эрьва шканть эсензэ лувозо. Минек эйкакшпингстэ ды од шкастонок арасельть Интернетэсь ды сотовой телефонтнэ. А меревлинь, эйкакштне полавтовсть. Сынь теке эйкакшт. Улить ютксост кить бажить тонавтнеме, изнямо. Улить истят, кинь арась покш мелест тонавтнемс, ансяк сынь эзть ёма, муизь эсь кист ды профессияст. Зярдо эйкакштнень марто ламо важодят, яват тенст покш мель – сыненст те вечкеви. Каршот сыньгак максыть лембест. Бути урокот ветясак ды весе, те вейке тев, бути содасыть эйкакштнень мелявксост, кецят изнявксост кисэ, вейсэ ютат стакачитнень – сестэ муят мартост вейсэнь кель. Монь уроктнесэ эйкакштне путнить телефоност ве ёнов. Бути урокось вечкеви, тонавтницясь зярдояк а карми сокарямо телефонсо.
Кие бажи тонавтнеме, се тонавтни мезеяк лангс апак вано ды изни. Лицеень тонавтницятне парсте максыть экзаменэст, тукшныть тонавтнеме тов, ков бажить. Тагояк ёвтавлинь паро валт лицеенть коряс. Тесэ пурнавсь кеме коллектив, кона ушодсь вейсэ важодеме васенце читнестэ саезь. Те – физикень, химикень, биологонь, математикень вейкине команда. Сюкпря, республикань Правительствась лезды тенек ардтнемс эйкакштнень марто покш олимпиадатнес.
Любовь Алексеевна паро важодеманзо кис аволь весть казевсь. Сон – РФ-нь Общей образованиянь почётной роботник, МР-нь общеобразовательной учреждениянь сехте паро тонавтыцянь республикань пелькстамонь изниця (2010), «Династия» фондонь математикань тонавтыцянь Весероссиянь пелькстамонь изниця («Наставник будущих учёных» номинациясь, 2015), РФ-нь сехте паро тонавтыцянь пелькстамонь изниця (2020). Неть читнестэ сась паро куля. РФ-нь Президентэнть Указонзо коряс Л.А. Панкратованень максовсь РФ-нь заслуженной тонавтыця лемесь.
Любовь Алексеевна пек талнозь вастызе те кулянть. Сеске кармасть гайневтеме эйкакшонзо, ютазь иетнень тонавтницянзо, малавиксэнзэ, ялганзо. Весе ёвтасть ламо лембе валт. Сэтьме, аволь покшкавтниця тонавтыцясь тагояк корты: «Те аволь монь изнявксось. Те минек вейсэнь, кить аштить перькан. Кода кортыть, эрямось ютась аволь стяко».
Эрзянь авась сюкпря ёвты семиянзо туртов. Сынь свал тензэ лездыть чевте валсо, превс путомасо, паро тевсэ. Малавиксэнзэ максыть вийть. Пек кецявты Елена тейтерезэ, Мария нуцькинезэ. Любовь Алексеевна паро мельсэ ардтни Сабанцелев, тиринь кудосост эри ялаксозо. Тесэ сынь весе пурнавкшныть вейс. Панкратовтнень ули эсест оймсема таркинест. Те – Теньгушевань районсо Мокша лей чиресэ Красный Яр велесь. Васоло, ансяк истямо паро ды сэтьме. Тесэ сынь ютавтыть ламо шка.
Любовь Алексеевнань валонзо коряс, сон мейсэяк а явови лиятнеде. Те а истя. Сон весе эрямонзо алтызе тонавтомантень. Касты сы шкань учёнойть, тонавты мездеяк а пелемс ды ютамс ансяк икелев.
Татьяна Маторкина