Четверг, марта 28, 2024
Важное

Орданьбуе ошсо эйдень од кужонь стявтоманть учость зярыя иень перть. Ды вана 2021 иень кизна панжинзе кенкшензэ «Теремок» комбинированной ёнксонь эйдень кужось. Сонзэ стявтсть «Образование» ды «Демография» федеральной национальной проекттнэнь вельде. 

Кода кецнесть эйдень кужонтень ошонь эрицятне, тетятне-аватне, эйкакштне! Ды вана миньгак ваннынек, кодамо сон, од кужось, кона ашти Л. Толстоень переулоксо. Покш, мазый, сельмс каявиця. Вастымизь «Теремоконь» прявтонь тевтнень топавтыцясь Татьяна Николаевна ПЕТУХОВА.

– Эйдень кужосонть 250 таркат. Тесэ панжозь 13 группат. Вейке группась логопедической. Васенце этажсонть вишкинетне – иестэ саезь колмо иесэ эйдеть, омбоце этажсо – 3-7 иесэ эйкакшт. Кужосонок мезе ансяк арась: бассейна, компьютерэнь класс, логопедической кабинет, изостудия, музыкальной зал, спортонь зал, медпункт. Тесэ неень шкань оборудования, весе теезь-топавтозь неень шкань вешематнень коряс. Эйдетнень марто важодить 37 педагогт. Неть: воспитательть, старшей воспитательть, специалистт: музыкальной руководитель, логопед-тонавтыця, педагог-психолог, физической культурань коряс тонавтыця, бассейнасо укшномань коряс инструктор.
Эйдень кужосонть важодить кемень кружокт. Весе сынь питневтеметь. Те: робототехника, компьютерэнь содамочить, англань кель, эрзянь кель, ули естественно-научной ёнкс – метеоплощадка, ули цифровой лаборатория ды лия мезе. Минськак эйдетнень марто тонавтнетяно од оборудованиянть, налксематнень ды программатнень, – ёвтни Татьяна Николаевна.

«Теремоксо» эйкакштнень андыть чизэнзэ ветексть. Тесэ эсест пидицяст-паницяст, ярсамопелесь свал ансяк пидезь, тантейдеяк тантей.
Эрьва группанть эсензэ ушосто совамонь кенкшезэ. Весе явозь. Эсест оршамопелень ванстома таркаст, улить оршамо- ды карсемапелень костямо таркат (сушилкат).

Мезе ули кужонть потсо – ёвтнинек. Ансяк те аволь весе. Ушосояк ули ламо мезе! Эйдень кужонть вакссо ладязь оборудования марто налксемань тарка. Эрьва группанть эсензэ беседказо, эземнест, нурямост, песочницаст. Ули натой кизэнь сцена, косо ютавтыть кенярксчить ды лия паро тевть. Ушосояк панжозь спортонь площадка. Теде башка, ладязь метеоплощадка – пек мельстуиця таркине! Эйкакштне уш кармасть ванномо-тонавтнеме пертьпельксэнть. Саемга, кодат эрсить менельсэ пельтне, онкстнесть, зяро лов пракшнось тельня.

– Эйдетнень марто важодемась – те свал кеняркс. Сынь максыть вийть, сёлмот. Эряви вечкемс эсь важодемат, сестэ весемесь карми вадря, – корты Татьяна Николаевна.

Сон чачсь Орданьбуень Луньга велесэ. Школанть прядомадо мейле тонавтнесь Н. П. Огарёв лемсэ МГУ-нь филологиянь факультетэнь финнэнь-угрань отделениясо. Тонавтнесь финнэнь келенть. Студентэкс улемстэ ламоксть содавтнизе Финляндиянть. Самай тосо вастызе мирдензэяк. Цёрась чачсь Коми-Пермяцкой автономной округсо, коми раськень ломань. 2006 иестэ, вузонь прядомадо мейле, тейтересь кармась важодеме Орданьбуень эйдень кужосо воспитателекс. Мейле ладизь учебно-воспитательной тевтнень коряс кужонь прявтонь полавтыцякс, ней – прявтонь тевтнень топавтыця (кужонь прявтось – Н. И. Сунсина).
Сон кавксть невтизе прянзо «Иень воспитатель» пелькстамосонть. 2016 иестэ лиссь муниципальной этапонь изницякс.

Татьяна Николаевна зярыя иеде икеле явсь мель «Языковое гнездо» раськеютконь проектэнтень. Сон ды сынст кужонь лия тонавтыцятнеяк важодсть тень коряс. Проектэнть вельде эйкакштне содавтовсть эрзянь келенть, культуранть, койтнень-кирдатнень марто. Т. Н. Петухова ардтнесь Финляндияв, Карелияв, косо пурнавкшность финнэнь-угрань ёнкстнэстэ эйдень кужосо важодицятне. Эрьвась ёвтнесь, кода сон важоди эйкакштнень марто, кода содавтыть сынст тиринь койтнень марто. Проектэнть прядовомсто Татьяна Николаевна сайнинзе эйкакштнень ды тетяст-аваст тиринь Луньгав экскурсияв. Тосо сынь пидесть каштомсо прякат, пансть пачалксеть. Эйдетне эсь сельмсэ неизь, мезе те каштомось, кодамо сон. Варчизь ансяк каштомсто таргазь ойсэ ваднезь тантей пачалксетнень. Весе те кадовсь мелезэст-превезэст. Ды нейгак яла ледстнить, зярдо вастсызь Татьяна Николаевна воспитателест ушосто.

Кода ютась «Языковое гнездо» проектэсь, ёвтнесть лия воспитательтнеяк. Марина Николаевна КУРКИНА эйдень кужосо важоди вейксэ иеть. Сон чачсь Орданьбуень Кельвяднесэ. Тонавтнесь Н. П. Огарёв лемсэ МГУ-нь филологиянь факультетэнь эрзянь-мокшонь отделениясо, конань прядызе 2001 иестэ. Вузонть прядомадо мейле важодсь Кельвяднесэ эрзянь келень ды литературань тонавтыцякс. Мейле школаст пекставсь. Сон сась важодеме Орданьбуень эйдень кужов.

– Монь группасон комсь эйкакшт. Омбоце вишкине группасонть – колмо-ниле иесэ эйдеть. Кевкстнетядо, кода мартост важодемс? Неень шкань эйдетне превейть, ламо мезень содыцят ды чарькодицят. Мартост эряви кеместэ важодемс – эрьва минутанть алтамс кодамояк тевс. Илязо уле юткошкаст. Бути ламо максат юткошка – лоткить кунсоломо, эсь тевест кармить тееме. Валске 9 чассто саезь ушодовить эрьва кодат занятиянок. Ловнотано (мон ловнан, сынь кунсолыть), тонавттано пластилинэнть марто роботамо, арттано, тейнетяно аппликацият ды лия мезе. Анокстатано кенярксчитнес: Сёксень вастома, Авань чи, Од ие, Февралень 23-це чи, Мартонь 8-це чи, Эрзянь келень чи ды седе тов. Монгак важодинь «Языковое гнездо» проектэнть коряс, минек группась ульнесь экспериментальной. Зяро вастовомат ютавтозь! Минськак ардтнинек Финляндияв, Комив. Ванынек, кода сынст тосо те юты. Ламо мезе од саинек эстенек. Саемга, кода тосо ютыть ушосо занятиятне, кода чист ладязь, мезде ярсыть. Минек коряс тосо весе лиякс.

Эйдень од кужось – покш мельспаронок. Пек учинек ды учовсь. Эйдетнеяк кецнить: эрьва кодат книгаст ды налкшкест, весе одт. Сынь куроксто тонадсть весементень, – ёвтнесь М. Н. Куркина.

«Теремоксо» ули эрзянь келень кружок. Сонзэ вети Валентина Ивановна ЖЕГАЛИНА. Сон чачсь Орданьбуень Орозбие велесэ. Школанть прядомадо мейле тонавтнесь М. Е. Евсевьев лемсэ МГПИ-нь (ней МГПУ) дошкольной воспитаниянь факультетсэ. Ие важодсь Саранскоень 83 № эйдень кужосо. Теде мейле Орданьбуень «Улыбка» кужосо 26 иеть, ней вана «Теремоксо».

– Мон умок важодян национальной тематикань коряс. Нама, бажан тонавтомс литературной кельсэ. Лембестэ ледстнян «Языковое гнездо» проектэнть. «Тештине» кружоконтень яксить 5-6 иесэ эйкакшт. Минек занятиятне ютыть недлязонзо кавксть, истя иень перть. Арсеви тонавтомань программа, конань кемексты эйдень кужось ды Эйкакшонь творчествань кудось. Тонавтнетяно валт, сынь ёвтасызь лемест, кода эрзякс мерить кудонь ды вирень ракшатненень. Тонавтнетяно стихть. Эйкакштне мельспаросо сакшныть кружокс, кудосояк ёвтнить тетяст-аваст туртов, мезе од кармасть содамо. Эрьва кенярксчис анокстатано эрзянь номер. Ней паро, улить эрзянь эсенек оршамопеленек – тонавтыцятненьгак ды эйдетненьгак.

Неень шкане литературань коряс стакачить арасть, те икеле мезтькак арасельть. Лезды тень «Чилисемась», конань сёрмадстнян. Занятиятнесэ свал содавттано эйдетнень эсенек ёнксонь эрзянь раськень койтнень-кирдатнень марто. Сынь сюпавт. Саемга, кода вастсть тундонть, Инечинть, Троицянть, Орозбиесэ ули эсест мазый коест – Одирьвань ютамо, – пачтясь В. И. Жегалина.
Эйдень кужонь лия фототнень ванодо «ВКонтакте» минек газетань куростонть.

Татьяна Маторкина
Фототне: Эдуард Ретунскиень

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».