Четверг, марта 28, 2024
Важное

Те покш кенярксчинтень алтавсь торжественной промксось, конась мартонь 16-це чистэ ютавтовсь И. М. Яушев лемсэ Государственной музыкань театрасо. Тезэнь пурнавкшность школань прявтт ды тонавтыцят, образованиясо ламо иень перть важодиця ветерант, тосо ульнесь Мордовия Республикань Прявтось Артём Здунов.

Торжественной пельксэсь ушодовсь Российской Федерациянь Гимнасто, конань весе пурнавозтне кунсолызь стядо.

Ледстясынек, Педагогонь ды наставникень иенть яволявтызе Россиянь Президентэсь Владимир Путин. Республикань педагогтненень видео вельде пшкадеманть кучизе РФ-нь Просвещениянь министрась Сергей Кравцов.

Мордовиянь Прявтось тешкстызе: «Цела ие минь алтатано тонавтыцятнень, воспитательтнень, педагогтнень важодемантень. Кортамось моли аволь ансяк сетнеде, кить тонавтыть школасо эли эйдень кужосо, истя жо СПО-сэ наставниктнеде, сетнеде, кить анокстыть педагогт, кить вастыть специалисттнэнь важодема таркатнесэ. Те пек эряви эрямосонть – маштозь вастомс ломаненть, кочкамс эрявикс валт, лездамс, невтемс цидярдомачи вастозенть васенце ильведькстнэнь теемстэ. Те – наставник. Самай те важодеманть минь мартонк топавтынек меельце иетнестэ. Секскак Саранскоентень явозель честь ютавтомс весероссиянь, а минек лиссь евразиянь, од профессионалтнэнь чемпионатонть», – мерсь Артём Алексеевич.

Сюкпрянь башка валт Мордовиянь Прявтось ёвтась педагогонь тевень ветерантнэнень: «Покш сюкпря тенк, сюконятано икеленк. Тынь маштыде ванстомс минек масторсонть образованиянь алкуксонь системанть, конань эйстэ лиси превей ломанесь. Секскак аламо максомс образования – эряви эштё тонавтомс-путомс превс ломаненть. Нама, минек эйс ламо путыть тетянок-аванок. Ансяк варштадо, зяро шка мартонок ютавтыть тонавтыцятне, наставниктне. Минь нетяно, кодамо виев минек школась, васня – советэнь шкансесь, ней – Россиянсесь, конатне тонавтызь-путызь превс минек боецтнэнь ды минек геройтнень. Секскак эряви парсте ютавтомс Педагогонь ды наставникень иенть, карматано тешкстамо минек педагогтнень, карматано важодеме од ломантнень марто», – мерсь Артём Здунов.

Кенярксчинь промкссонть тешкставсть педагогонь династиятне. Отяжелень районсто Соболевтнень-Русяевтнень династиянть педагогонь вейсэнь стажост – 190 иеть. Династиянь ушодыцясь – Соболева Антонина Васильевна. Педагогической трудонь ветеранось 40 иеть важодсь Отяжелень райононь Низовкань средней школасо рузонь келень ды литературань тонавтыцякс.

Ташто Шайговань районсто Ямашкинтнэнь династиянть вейсэнь стажост – 160 иеть. Династиянь ушодыцятне – Ямашкин Николай Тимофеевич ды Ямашкина Дарья Николаевна, эрямост перть важодсть Ташто Теризморгань средней школасонть. Саранск ошонь округсто Жарковтнень-Жаровтнень династиянть вейсэнь стажост – 300 ламо иеть. Династиянь ушодыцясь – Жарков Фёдор Терентьевич, 60 иеть важодсь Н. П. Огарёв лемсэ МГУ-нь математикань факультетсэ. Династиясонть – эштё сисем педагогт, сынст ютксто нилетне кармасть математикань тонавтыцякс.

Сценанть лангс истя жо тердезель Галкина Валентина Ивановна, сон сентябрясто тешкстызе 85 иень юбилеенть. Колоньгеменде ламо иеть важодсь Орданьбуень райононь васня Олевкань, мейле Вишка Кузьминань школасонть математикань тонавтыцякс. Республикань Прявтось казсь педагогтненень цецят ды ледстнемань казнеть.

Эсь профессиянтень вечкемань эстафетанть ветерантнэ максызь республикань районтнэстэ од коллегатненень, конат кенярксчинь лувсо максызь педагогонь клятванть, алтасть улемс кемевиксэкс тонавтыцянь тевентень, улемс примерэкс эйкакштнень туртов.

Педагогонь ды наставникень иенть панжомань почетонь правась максозель Мордовиянь Прявтонтень Артём Здуновнень, Российской Федерациянь заслуженной тонавтыцянтень Любовь Панкратованень, «Учитель года России – 2022» весероссиянь пелькстамонь лауреатонтень Евгения Макарованень, дополнительной образованиянь педагогонтень Дмитрий Карабановнень.

Артём Здунов ёвтась поздоровт республикань весе педагогтненень, арсесь тенст паро эрямо ды изнявкст профессиясонть.

Меельцекс пурнавозтненень невтезель мельстуиця концерт.

Валентина Юдина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».