Четверг, марта 28, 2024
Важное

Раиса Петровна Вавиловань марто минь теевинек содавиксэкс Саратовань ёнкссо. Вастовинек «Шумбрат» кенярксчистэ, конась ютась Петровской райононь Оркина велесэ. Авась васенцеде понгонесь эрзянь истямо покш чис. Мелезэнзэ пек тусь. Сонсь эри Саратовань областень Советское робочей посёлкасо.



– Мон чачинь Мордовиянь Ицялбуень Павловка посёлкинесэ. Семиясо ульнинек ламонек, кавксо эйкакшт. Школав якинек Од Ицялов. 5-це классонть прядомадо мейле монь ды эштё колмо сазорон-ялаксон саимизь тонавтнеме Ялгань эйкакшонь кудов-интернатов. Се шкане самай стявтылинек велесэ кудо. Вейке ялаксонок саизь тонавтнеме музыкальной школав-интернатов, сон парсте маштсь седямо музыкальной инструментсэ. Кадык вишкине ульнинь, ялатеке эзинь аварде авань ды кудонть мельга. Паряк, секс, вейсэ ульнинек ниленек, эзинек маря прянок кадозекс. Покш лелянок эрясь Саранскойсэ ды оймсема читнестэ сакшныль варштамонок. Мелезэнь кадовсь, кода ошсо эзть мере тенек кортамс тиринь кельсэ, раксесть лангсонок, – ледстни Раиса Петровна.

Интернатто мейле Раиса кармась тонавтнеме Ицялонь педагогической училищасо, ансяк эзизе прядо. 1972 иестэ сон мирдензэ, ававтонзо ды мирденть бабанзо марто састь эрямо Советскоев. Тесэ се шкане таргасть нефть. Мирдензэ марто сынь важодсть нефтяной промышленностьсэ. Раиса Петровна ульнесь диспетчерэкс, кладовщицакс, заправщицакс. Ней уш кемготово иеть топодсть, кода тусь эрямосто мирдезэ. Аваст мельга ваныть кавто тейтерензэ, нуцьканзо.
– Ведьгемень иеть уш эрян Саратовань областьсэ, Советское посёлкась ашти Равонть томбале. Тесэ тунь лия климатось ды модаськак. Ашти степ, килейтькак а касыть. Пек парсте касыть эмежтне, арбузтнэ, виноградтнэ, абрикостнэ. Зяроксть усксинь озавтомс абрикосонь чувтынеть Мордовияв, вейкеяк эзь вельмекшне. Мон нейгак путнян пире, тевтеме а аштеван. Сизян, секень вант, пран пильге лангсто, ялатеке тевтнень тейсынь. Кастан кемнилее сортонь виноградт: пижеть, якстереть, куроксто кенерицят ды аволь. Вечкан мельгаст якамо. Кода вана кадомс? Ды явшан виноградонть эрьванень. Ней уш чуросто эрсян Мордовиясо. Эйкакшон иезэнзэ аволь весть ардтнить, тосо эрить ламо малавиксэнек. Свал ускить тень кодаткак казнеть-сувенирт. Аволь умок вешинь ламбамо якстерькайть. Вана те кенярксчинтень теинь якстерькаень поза, чинек-венек пидинь-паринь эйсэнзэ духовкасо, лиссь алкуксонь. Эрзянь покш читнес пачалксеть панян, – ёвтни Раиса Петровна.

Советскоенть икелень шкане лемдсть Мариенталекс. Тесэ ульнесь немецень колония. Войнань шкане немецтнень тестэ панизь, седе тов лементькак полавтызь. Ансяк те шкас немецтнень эйкакштнень эйкакшост сакшныть неть таркатнень варштамо, тейнить фотографият, ванкшныть, косо эрясть малавиксэст. Ней Советскойсэ эрить эрьва кодамо раськень ломанть: рузт, казахт, армянт, эрзят, мокшот, украинецт, кореецт.

Аволь умок Культурань кудонь зданиясо панжозель эрзянь ды мокшонь раськень культурань музей. Сонзэ пурнызь тесэнь эрицятне. Ломантне эсь вийсэ тейсть витнема-петнема. Муевсть эрьва кодат экспонатт, сынст усксть Мордовиястояк. Пшкалесть натой С. Д. Эрьзя лемсэ музеень прявтонтень Л. Н. Нарбекованень. Сон кучсь Саратовань эрзятненень посылка.

Раиса Петровна стась киякс ланга ацавкст (дорожкат) ды эрзянь оршамопельть: тейтернень ды цёрынень туртов, вете – покш ломаннень, каркст ды пулай. Весе юткошканзо алты оршамопелень стамонтень. Сонсь рамси коцт ды лия эрявикс материалтнэнь. Ней музеентень сакшныть вишка эйкакшт ды школань тонавтницят. Сынст туртов ютавтовить экскурсият, косо ёвтнить эрзятнень-мокшотнень историядост, койдест-кирдадост, культурадост. Р. П. Вавилова мельспаросо эйдетненень тейни мастер-класст, косо тонавты викшнеме ды тейнеме пряс путомань парсейнеть.

Ней эрзятненень ули косо вастневемс ды кортнемс. Валост коряс, пек учость, бажасть пурнамс истямо таркине. Сынь ёвтыть сюкпря Культурань кудонь прявтонтень Ирина Шупикованень, кона лездась панжомс раськень культурань музеенть. Тей инжекс а весть сакшнось Саратовань «Шумбрат» эрзянь ды мокшонь раськень культурань центрань прявтось В. И. Кривошееваяк.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».