Четверг, марта 28, 2024
Важное

Дмитрий Таганов чачсь аволь минек республикасо. Сонзэ ундокстнэ Оренбург ёнксонь Северной райононь Боризвелестэ. Зярдо-бути, кезэрень шкатнестэ, те мазыйдеяк мазый тарканть кочкизь Пенза ёнксонь эрзянь ломантне. Мордовиянть марто те цёрась кирди кеме сюлмавкст. 90-це иетнестэ сон сеедьстэ сакшныль Саранскоев од сёрмадыцянь семинаров. 

Стихензэ лиснесть «Чилисема», «Сятко» журналтнэсэ, «Эрзянь правда» газетасо, вейсэнь пусмосо. Теде башка, сон нолдась эрзянь кельсэ зярыя книгат.

Дмитрий эри республиканок томбале, тень лангс апак вано, келезэ ванькс, мазый. Лиясто максы превс путомат келень кевкстематнень коряскак (те сестэ, зярдо Интернетсэ кепедевить кодаткак вейсэнь кортамот). Эрзянь цёрась алкукс ризны-мелявты минек келенть, раськенть кисэ.

Дмитрий Анатольевич профессиянь коряс врач. Сон лезды эрьвантень, кие пшкади тензэ орматнень-сэредькстнэнь, медицинань тевтнень коряс. Ламо ломанть ёвтыть тензэ сюкпрянь валт. Свал муи лембе валт оймавтомс сэредицянть, а максомс пря апаронтень, цидярдомс стакачитнень. Минек покш меленек содавтомс ловныцятнень те ломаненть марто. Вана мезе сон ёвтнесь эсь прядонзо:

– Монь эйкакшпингем ютась пек валдосто, мекс-бути зярдо ледстнян, превезэнь свал сыть маней читне. Бути те теле – цят якшамотне, кода ловось цитни чинть ало, а минь кирякстнетяно салазкесэ Тумаень пандо прясто, вармась вешкезь вешки пилесэть, ды сестэяк, зярдо кеметькак пешкедить ловдо, понкстнэ канкстомить ды теевить теке эень керть, кельмесь а маряви. Содат: сат кудов ды каштомлангсо эжат. Ледстневить сестэнь свадьбатнесэ алашатнень ардомаст – чирькетнес понгавтозь баягат, сынсь мазылгавтозь эрьва кодамо тюсонь парсейсэ. Ардыть мельга-мельцек, нурдотне пешксеть мазыйстэ оршазь ломанде, конат морыть ульцянть келес.

Тетям Анатолий Кириллович пингензэ перть важодсь электричества марто. Бугурусланонь районсто минек Боризвелевгак пачкодсь электрикень бригада марто 60-це иетнестэ: стявтнесть палманть ды поволесть уськеть-мезть, ютавтсть велетнева электрификация. Самай ве палмань прясо тевень теезь, неизеяк авань, Елена Васильевна Советкинань, кона важодсь велень школасо рузонь келень ды литературань тонавтыцякс.

Бабам Евдокия Фоминична чачозель теке (Северной) районсо, пек ве ёно минек веленть эйстэ. Лиссь мирденень, ды вана эрямось а пек удалакшнось, секскак велензэ кадызе ды тусь Боризвелев, тосо ульнесь больниця, косо кармась важодеме санитаркакс. Мейле муизе уцясканзо – Василий Иванович Советкинэнь. Чачтсь тензэ кавто эйкакшт. Ушодовсь войнась, 1942 иестэ покштям маштовсь Орловской областень Алексеевка веленть маласо. Секе иестэнть чачсь авамгак.

Бабань ёвтнеманзо коряс, покштянь марто сынь вейкест-вейкест пек вечксть. Арасель истямо тев, конань покштям а маштоволь тееме, арасель истямо моро эли налксема, конань аволизе сода. Бабамгак пингензэ перть ульнесь велесэ содавикс ломанекс. Тевде а пелиця, сырестэяк машинкасонзо стась ломаннень эрьва мезть. Бути пансь прякат – свал явшесь шабрава-содавикска, нейгак содыцянзо а стувтнить пародонзо.

Ледстнян, школадо икеле кизэстэнть весть тетям-авам ды шабранок валске марто сыргасть тикшень ледеме, саимизь моньгак, ледема таркась ульнесь сисем вайгельбень томбале. Ардынек тов алашасо, вирень пачк. Мон пельс удынь ды кадымизь уманть пес. Покштнень туемадо икеле Вася лелям, шабранок, невтсь тень уськаз тикше ды мерсь: «Сыргозят, вант, тень иляк сае кедезэть, те тикшесэнть кедеть керяви». Зярдо сыргозинь, васняяк саия уськазонть ды керинь колмо сурон. Кода эзинь аварде, марицям арасель, секскак стинь ды туинь кудов, тосо – бабам-жалицям. Кудосо сон арасель, секс кузинь каштомлангс ды таго матедевинь. Зярдо тетям-авам састь обедамо, неизь – эйкакшось ёмась. Тетям мусь машина, сась кудов, бабань кевкстни сакшнынь-арась, се мерсь, келя, эзимим нее. Сыргасть таго вешнеме. Пек тандадсть. Мон сыргозинь, валгинь каштомлангсто, столь экшс озынь. Бабам андымим модамарень прякадо, теке истя эрявськак. Вана ульнесь тетянень кенярксось, зярдо омбоцеде кудов совамсто неимим!

1980 иестэ тетям-авам сайсть мель туемс велестэ эрямо ошов. Аволь пек васоло минек эйстэ ульнесь Нижнекамскоесь, косо эрясть содавиксэнек. Ошось одоль, мазыель ды покшоль. Сехте покш парозо-мазызэ ульнесь, ды нейгак арсян ули, Кама леесь ды перьканзо мазычитне. Минь эринек васня общежитиясо, шкань ютазь максозель тенек башка эрямо тарка. Квартиранок ульнесь Кама чирева таргавозь виренть маласо, секскак тосонь эйкакшчись весе сюлмавозель Кама леенть марто. Минь якинек тов экшелямо, калонь кундсеме ды оймсеме. Мон прядыя тосо школам. Мельс саевицякс кадовсь: 13-це номер кудосто сыргилинек 13-це маршрутонь автобуссо, якинек 13-це школав. Авам секе школасонть важодсь тонавтыцякс. Сехте паро казнекс монь туртов ульнесь кизэнть самсто велев молемась. Минь тагояк ютавтнинек тиринь ёнкссо сехте паро читнень. Школанть прядома иестэнть тетям-авам арсесть-тейсть велявтомс эрямо одов Боризвелев. Монь ульнесь покш мелем тонавтнемс ломанень орматнень изнямо. Истя максынь Бугурусланонь медицинань училищас экзаментнэнь. Прядыя сонзэ шождасто, якстере диплом марто.

– Седе товгак кочкик медицинанть?
– Истя. 1990 иестэ молинь тонавтнеме Оренбургонь медицинань институтов. Диплом марто улезь, паро мельсэ вастыя чокшнень отделенияв тердеманть. Истя, савкшнось ве шкасто важодемскак, тонавтнемскак. Покш ош. Асодавиксчи. 90-це иетнестэ весемесь саевиль пек стакасто: талононь коряс лавкасо микшневсть натой алтнэ ды чиньжарамонь оесь. Неть талонтнэнь саемга эрявкшнось прописка, монь сон арасель, кудонть эйстэ 400 вайгельбеть, секс пек ламо а ускови. Лавкатне талонтомо ломаненть туртов, мерть, чавольть. Ансяк институтонь администрациясь сайсь мель теемс студенттнэнень прописка.

Сентябрянь 1-це чистэ ульнесь тонавтнема васенце чись, секе чистэнть ушодовсь больницясо дежурствамгак. Стакаль. Ансяк зярдо ушодат важодеме ошонь ломантнень марто, тон куроксто тееват содавиксэкс эрьва кодамо стакачитнень марто. Куроксто эрямось полавтовсь паро ёнов, ломантне тонавтымизь эрямо те ошсонть ды лездасть изнямс апаротнень.

Тонавтнемась тень пек вечкевсь, эдь весемесь, мезде ёвтнесть, эрявикс ды маштовикс. Пек паро ульнесь якамс лекциятнес, конатнесэ профессортнэ, теке паро актёрт, лиясто киштезь, лиясто моразь, ёвтнесть анатомиянь, биохимиянь, патологической анатомиянь ды ламо лия салавачить – ансяк тонавтнек, путт превс весементь, мезесь мейле карми теть паро лезксэкс. Группасонок весе ульнесть анок медикть, весе важодсть, секскак арасель кодамояк стакачи ачарькодемасо ды лиясо-мейсэ. Минь куроксто теевинек ялгакс ды ояксчись эзь ёма те шкас.

Институтонь прядовомантень (1998 иенть самс сонензэ максозель академиянь лем) монень кочкавсь профессиякс анестезиологиясь ды реаниматологиясь. Вакансиянь ярмункасо тарка ульнесь Бугуруслансо. Ошонть содылия парсте. Сынь тов, теевинь содавиксэкс важодема тарканть, ломантнень марто.

Зярдо интернатурадо мейле сынь больницяв, зярыя иеть якинь теке аволь важодеме – сехте вечкевикс тевень тееме. Операционнойсэ шкась ливтязь ливти, а кенерят варштамо – теветь топавтозь. Парось ульнесь сеньсэ: теветь топавтсак ды сеске неяви теевксэсь. Сехте паро питнекс ульнесь, зярдо валске ломанесь мартот а шумбракстнияк, лисни, весементь теик парсте, мезезэяк а сэреди, мейсэяк эзь колаво шумбрачинзэ кис аштемась, секскак а ледстяви тензэ а теветь, а чамат.

1998 иестэ саезь Д. А. Таганов важодсь Бугурусланонь центральной районной больницясо анестезиологокс-реаниматологокс, 2001 иестэ саезь 2013 иес – реанимациянь отделениянь ветицякс, 2013-2015 иетнестэ – прявтонь полавтыцякс, 2015 иестэ ладязель теке больницянь прявт врачокс. 2021 иестэ саезь важоди Москов ёнксонь Руза ошонь больницянь прявт врачонь полавтыцякс ды анестезиологокс-реаниматологокс.
COVID-19 орманть марто тюреманть кисэ казевсь «Медицинский Олимп Оренбуржья» Оренбургонь Губернаторонь премиясо, Бузулуконь ды Сорочинскоень Алексий епископонть пельде медальсэ.

– Дмитрий Анатольевич, косто верьгедсь сёрмадомань сяткинесь? Кода ушодыть стихень сёрмадомо?
– Литературанть вакска ютамс тень ульнесь а кода. Эрзянь ёвкстнэ, моротне, свадьбань налксематне, лайшематне ульнесть свал седейсэнь, кудосонок свал ульнесть ламо книгат, журналт. Мельсэнь аштить авань литературань уроктне: сат аламодо шкадо икеле кабинетэнзэ кенкш удалов, гайгезеви баягинесь, ансяк тонавтницянзо а ургатить кабинетстэ чиеме: авам валдо валс ловны тенст Пушкинэнь эли Есенинэнь валморот, ды истя парсте-мазыйстэ, натой киньгак арась мелезэяк туемс уроксто. Мельсэнь кирдян, кудозонок сакшность икелень тонавтницянзо теке эсест малавикс ломанень кудов. Истя ульнесь велесэ, истя кармакшнось Нижнекамскойсэ. 6-це классто саезь литература тенек ветясь И. М. Казеева, кона пек вечкилизе литературанть ды весементь, мезесь сюлмазель валсо сёрмадома тевенть марто.

«Сятко» журналонть ушодынь ловномо 1986 иестэ саезь. Пек парсте панжовсь монь туртов тиринь келенть питнезэ, мазычизэ, секскак седеяк пек кассь мелесь сёрмадомс. Ды, састыне, карминь арсеме ды сёрмадомо эрзякс. 1989 иестэ зярыя сёрмадовксон ды сёрмам кучинь редакцияв. Кодашка мельспарокс ульнесь А. В. Араповонь пельде каршо валозо, конасонть сон шнызе паро келем, валморон, ды мик мерсь – сынь курок лисить журналонь лопатнесэ! Теде башка, кучизе монень «Вальма» книганзо, валморонзо истя совасть мельс-превс аволь ансяк монень, авам сайнизе школав, тетям ловнось велень цёратненень колхозонь валскень нарядсо. Мон седе товгак поладынь сёрмадомо.

Секе иестэнть Бугурусланонь «Лисьмапря» эрзянь-мокшонь вейсэндявксонь прявтось В. Ф. Тингаев муимим ды гайгстась тень Саранскоев молемадо. Январьстэ минь мартонзо туинек республикань прявт ошонть содавтомо. Монь туртов сехте пек мельс тусь «Сятков» молемась ды Саша Арапов марто содавиксэкс теевемась. Кортынек. Валонок ладясть ламонь коряс. Ве чис превезэнь совавтозель истянь зняро, мезесь зярдояк эзь совсе. Секе читнестэ теевкшнынь содавиксэкс вейке эрзянь профессор марто, ды кортамстонок сон савтымим мельс – монень молема тонавтнеме университетэнь филологиянь факультетэв. Пек човорявкшность превень од перспективатнеде. Оренбургов велявтомадо мейле мездеяк лиядо эзинь арсе, ды сеске якавтынь академической отпусконь коряс весе конёвтнень. Арсия кадомс медицинанть. Важодема тарканть кадомо эзинь кенере. Тесэ мон пек ормалгадынь. Савсь якамс больницява, ваномс, кода парсте важодить содавикс тевсэ ве коштто лексиця ломантне. Секс, зярдо ормась кадымим, апак арсе мон сынь одов икелень тонавтнема тарказон ды мекев витнинь конёвон. Ансяк ёмавтынь тонавтнемань вейке ие. Седе тов тонавтнемс тень савсь лия ломань марто, те ульнесь тунь а стака.

Секе шкастонть Оренбургсояк теевинь содавиксэкс сёрмадыця ломантнень марто. Тердимизь В.И. Даль лемсэ областень литературань вейсэндявксов, ветицязоль Г.Ф. Хомутов, конань валозо ульнесь пек кеме, пек чуросто сёрмадыця ялгатне марясть пельдензэ паро вал. Сатнось пельдензэ эрьвантень, эзь кочксе содавикст-асодавикст, сыреть-одт. Вейке ульнесь питнень путомань коезэ – парсте а парсте ломанесь машты сёрмадомо. Секскак «Литераторонь кудосо» васенце вастовомастонть озынь седе васолов ды кунсолынь кирви критиканть, конантень пек лездасть седе икелень якицятне, содыцятне. Муськсть-ёрвалесть истя – пелят мейле сёрмадомапельс кундамскак, бути овсеяк кундат. Ды тесэ, монь ёнов варштазь, сон кевкстимим киян-мезян. Мон ёвтыя. Ловнынь рузонь кельсэ кавто-колмо валморот ды, келенек содамга, ловнынь зярыя эрзякс. Сёвномань таркас маринь вейке: «Сак сы вастовомас, сон карми тесэ сестэ-сестэ...» Ды теде мейле тевесь туськак: «Сяткосо», Оренбургонь изданиятнесэ публикацият ды седе тов.

Пек покш таликакс ульнесть Саранскойсэ од сёрмадыцянь семинартнэ. Васенцеде истямо семинарс тердимизь 1993 иестэ. Эряви меремс, ломантнень, натой пек одтнэнь, тердтнесть ошонь сехте паро гостиницас, пандсть аволь ансяк эрямо тарканть кисэ – командировкань суткань кис, путсть ломанькс, ловсть эрявиксэкс. Ки лангонь пандомадонть арсемскак эзь савкшно.

А кинь марто савкшнось теевемс содавиксэкс! Васня васттадызь кенкш лангсо Т. М. Ковалёва ды Т. И. Горбунова, чаест свал анок. Мейле Саша Арапов, мейле сыть сынсь П. К. Любаев, И. К. Инжеватов, И. Н. Прончатов. Семинартнэсэ эрсесть содавикс поэттнэ, сёрмадыцятне: Шумилкин, Ключагин, Батяйкин, Агейкин, Алтышкин, Моторкин, Ревизов, Ведяшкин, Числав Журавлёв ды ламот лият. Ветицякс ульнесть А. М. Доронин ды Н.И. Ишуткин. Уш васенце семинарсо улемстэ башка кортамсто пек ламо превть макссь монь туртов Р. С. Кемайкина, сюкпря свал ёвтан тензэ. Весть лаксемадон мейле (критика) паро валт ёвтась Т. С. Баргова. Сон истя лембестэ кортась, мик ламонь лиссть сельведест. Сюкпря тензэ. Пек эрявикст ульнесть неть вастовоматне.

Эрзянь поэтэнть лиссть «Сола вал» (1997), «Седейсэ тарка» (2009), «Тундонь пиземе» (2015) стихень пусмонзо. Сон С. Т. Аксаков лемсэ литературань премиянь лауреат. 2007 иестэ саезь совавтозь Россиянь Писателень вейсэндявксос.
– Кецявтсамизь-арась од книгасо?
– Анокстан кавто книгат, вейкесь карми эрзякс, омбоцесь – рузонь кельсэ, тозонь совавтан кода эсень рузонь валморон, истя жо эрзянь кельстэ ютавтозтнень.
– Дмитрий Анатольевич, ёвтнек семиядот.
– Урьвакстынь Бугуруслансо. Ним важоди бухгалтерэкс. Чачсть кавто эйкакшонок: Виян ды Маша. Эрятано кода весе, койсэнь, ломанькс. Цёрам тонавтни юридической факультетсэ, тейтерем – школасо.

Татьяна МАТОРКИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».