Иван Гусевень лементь Отяжбуень Сабанцелесэ содасызь весе. Цёрантень ульнесь 21 ие, кода чавовсь Ине Отечественной войнасо. Ды кода чавовсь? Теде натой сёрмадсть стихть, морот ды ладсесть легендат, чавовозтнень лемест сёрмалесть танктнень лангсо («За смерть лейтенанта Гусева!», «За Сашу Николаева»). Ней эрзянь цёрадонть снимави натой художественной фильма.
Иван Алексеевич Гусев чачсь 1922 иень январень 15-це чистэ МАССР-нь Отяжбуень Сабанцелесэ, эрзянь покш семиясо. 1930-це иетнестэ сынст яволявтызь кулакокс ды панизь велестэ. Иванонь трясть покштязо-бабазо. Сабанцелень сисем иень школанть прядомадо мейле (1936) сон тонавтнесь Ицялонь педагогической училищасо. Войнань шкане – Камышинской танковой училищасо. 1943 иестэ сон ульнесь 181-це бригадань 5-це танковой армиянь танконь взводонь командирэкс.
1943 иень июлень 12-це чи. Курской дуга. Гусев лейтентонть Т-34 танконть, косо ульнесь батальононь командирэсь капитанось П.А.Скрипкин, немецтне тапизь. Экипажонь члентнэ Николаев ды Зырянов таргизь ранязь командирэнть ды кекшизь. Сынст ютамост рединзе ятонь танкось. Немецень «Тигрась» сыргась Скрипкинэнь, медсестратнень ды лия боецтнэнь лангс. Ялгаст идемга лия минек танкось, сыргась «Тигранть» лангс, эртизе ды истя идизе командирэнть (Иван Гусев, Александр Николаев, Роман Чернов) чавовсть.
Те подвигесь кармась апелемань невтемакс, Прохоровской ды весе Курской дугань тюремань тешксэкс.
Те героической тевенть кисэ Иван Гусевень эзизь казе кодамояк наградасо (экипажонь лия члентнэ казевсть). Мекс? Тетянзо-аванзо кулакокс яволявтоманть кисэ... ансяк ламо шкань ютазь, И.С.Бурнайкинэнь, историкенть ды краеведэнть мелензэ коряс, 1995 иестэ Иван Гусев тешкстазель Отечественной войнань 1-це степенень орденсэ. Сонзэ максызь чавовозь солдатонть ялаксонтень Владимирнэнь.
Минек од ломантне кундасть Иван Гусевде «Валдо тол» фильмань снимамо. Сон карми колмо кельсэ: рузонь, эрзянь ды мокшонь.
Фильмань теицятне весе од ломанть. Режиссёрось – Максим Рыськин, продюсерэсь – Александр Учеваткин, операторось-постановщикесь – Олег Романов. Максим аволь умок нолдась «Сволочь?» фильма. Александр – «Азор» эрзянь кельсэ васенце фильмань сценариень сёрмадыця. Ней сынь важодить вейсэ. Васня бажасть теемс фильманть маень 9-це чинтень, ансяк коронавирусось весементь лоткавтызе зярыя шкас.
«Сценариесь анок. Кочкинек актёрт, кить кармить налксеме. Минь бажатано теемс паро фильма, тердинек профессиональной актёрт. Прявт роленть карми налксеме ГИТИС-нь студентэсь Андрей Грызлов. Муинек спонсорт. Кемтяно, Иван Гусевень валдо лемезэ сови кинохроникас, сондензэ кармить содамо минек эйкакштне ды нуцькатне», – пачтясь Александр Учеваткин.
Од ломантне пшкадить весенень лезкс мельга. Ярмаконь кучомадо мейле фильмань теицятне энялдыть сёрмадомс леменк ды зяро кучиде лезкс. Весень лемест тешкстасызь фильмань титратнесэ.
Вана кода Иван Гусевде ледстнесь ве курссо мартонзо тонавтницясь А.Н.Елисеева:
«Сон ульнесь сэрей, кеме, виев. Варштавксозо чевте. Тонавтнесь парсте, вечксь ловномо. 17 иес ловнось ламо книгат. Ульнесь весела, маштсь пейдевтеме. Сеедьстэ кортась эрямодо, ёвтнесь, кодамокс бажи улемс. Ансяк эзь сода вейкеде: ниле иень ютазь туи эрямосто. Ицялсо чугункань кись ютась педучилищадонть аволь васоло. Сон ваныль ардыця поездэнть лангс ды марявсь, бажась туемс тов, косо вестькак арасель».
Студентэкс улемстэ Иван кирдсь дневник, козо сёрмадсь мелензэ-арсеманзо. Весе сынь совавтовить фильмантень. Кучнесь малавиксэнзэ туртов ламо сёрмат, конат пешксеть вечкемадо ды ятонть эйстэ а пелемань ёжодо.
Татьяна Маторкина