Анна Калинкина: «Литературань премиясь – покш казне»
Анна КАЛИНКИНА чачсь Орданьбуень Низовка велесэ. Ней сон тонавтни Н.П.Огарёв лемсэ университетэнь 4-це курссо. Валонзо коряс, уш школасо тонавтнемстэ пек вечкевсть тензэ кельтне, литературась, обществознаниясь, историясь. Самай неть предметтнэ улить филологиянь факультетсэ. Ансяк тесэ седе домкасто тонавтнить рузонь ды эрзянь кельтнень, ловныть ламо литература, тонавтнить видестэ сёрмадомо ды парсте кортамо.
– Минек факультетэнь тонавтыцятне невтить миненек, кода эряви вечкемс тиринь келенть, панжить тенек келень мазычинть ды сюпавчинть. Сынст пшти вановтост ало сёрмадтано эрьва кодат статьят, сеедьстэ пелькстатано келень ды литературань коряс олимпиадатнесэ. Зярдояк эзинь янксе, мекс кочкия те факультетэнть. Тесэ максыть паро содамочить ды теить студенттнэнь эйстэ алкуксонь ломанть: тиринь келень, культурань вечкицят ды ванстыцят, – ёвтни Анна.
Од тейтересь эрьва ие невтни прянзо Огарёвонь лемсэ ловноматнесэ, косо студенттнэ анокстыть ды ловныть статьяст. 2021 ды 2022 иетнестэ сон якась «Финнэнь-угрань раськетнень сюпавчись» Раськеютконь форумов, конась ютась Марий Элэнь университетсэ.
Теде башка, Анна сёрмады стихть, миниатюрат ды ёвтнемат. Печатьсэ стихензэ васенцеде лиссть 2018 иестэ. Сонзэ сёрмадовксонзо лиснить «Чилисема» ды «Сятко» журналтнэсэ. Мелят произведениянзо совасть «Мордовиянь од вайгельть» вейсэнь пусмонтень. Тедеде Анна казевсь од сёрмадыцятнень туртов МР-нь Прявтонь литературань премиясо.
– Эрзянь келентень вечкемась эйсэнь вишка пингестэ саезь. Авам Татьяна Сергеевна икеле сонськак сёрмалиль валморот, пек вечки ловномо. Сырькаемгак Анна Васильевна сёрмадыль ёвтнемат ды статьят, сынь лиснесть «Маяк» райононь газетасо. Кода ушодынь сёрмадомо? Весть тонавтыцям, Зоя Викторовна Клементьева, мерсь, парсте лисни сёрмадомс тень сочиненият, изложеният. Мерсь варчамс сёрмадомс кодамояк валморо. Васенце стихотворениям алтазель аванень, тонавтнинь 9-це классо. Нама, васенце эскелькстнэ ульнесть лавшот. Зоя Викторовна витнесь эйсэст, корязост макссь содамочить. Сюкпря тензэ. Истя жо лездась авам, тонавтсь, кода седе видестэ ды мазыйстэ сёрмадомс мельтнень-арсематнень.
Эзинь арсеяк, казьсамизь МР-нь Прявтонь литературань премиясо. Монь туртов те покш кеняркс ды казне. Ули мелем седе товгак явомс мель литературантень, сёрмадомс истят произведеният, конат талновтовольть ловныцятнень, улевельть шождат ды чарькодевикст, – корты Анна Калинкина.
Калинкинтнэ аштить каштанчисэ вейкине тейтерест кувалма. Сынь – сонзэ кеме нежеть, васенце лездыцят ды превс путыцят.
Татьяна Маторкина