Елена Лугаськова малав 30 иеть важоди МР-нь Някань государственной театрасо. Истямо таркасо, косо сынь мельспаросо весе седейлембест максыть вишка ваныцятненень. Кецявтыть превс путыця, мазый, виев спектаклясо. Весе те шканть перть актрисась вестькак эзь арсе тестэ туемс эли полавтомс профессиянзо, кода тейнить лия ломантне. Театрась кармась тензэ омбоце кудокс, коллективесь – теке паро семия, косо свал теть лездыть ды чарькодтядызь.
Од шкастонзо Елена эзь бажа кочкамс актёронь кинть. Весе те лиссь кода-бути апак учне. Нать, эрямонь уцяскась истя ладизе.
Елена Васильевна чачсь Саранскойсэ. Васня якась ошонь 12 № гимназияв, седе тов ютась 39 № школав. Кода ней ледстни, школань ялгатне, мартонзо тонавтницятне, весе явсть мель творчествантень. Сынь ютавтсть эрьва кодат кенярксчить, путнесть спектаклят. Елена сонсь сёрмалесь-анокстась покш чинь сценарийть. Вечксь морамо, яксесь школань хоров. Тонавтыцятне редизь, тейтересь яви покш мель творчествантень, бути бажи мезеяк теемс – тейсы ансяк парсте. Сон кеме обуця, мезеяк лангс апак вано, моли икелев. Ды эзть сёвно, эзть сялдо, бути а кенериль топавтомс кудонь заданиятнень.
– 39 № школасо ульнесь рузонь келень ды литературань коряс пек паро тонавтыцянок – Н. И. Руськин. Сонзэ уроктнень вельде, лангозонзо ванозь, карминек вечкеме ловноманть. Сон кармавтсь ловномс эрьва чистэ, куш 10-15 минутат, но ловнома. Ды зярдояк а менстямс сеть таркатнень, косо сёрмадозь пертьпелькстэ. Истя жо мериль сёрмалемс ялгатнень ды малавикстнэнь туртов сёрмат. Сестэ школасонок ульнесь «Кид» эйкакшонь вейсэндявкс, пек мельстуиця движения. Минь кучнинек сёрмат васоло ёнксонь, лия ошонь школатнесэ тонавтницятненень, кирдинек ялгаксчинь сюлмот. Ютазь пингень 80-це иетнень прядовомсто натой ардтнинек Молдавияв. Эринек вейке тейтернень семиясо. Кода тосо вастсть инжеть! Неинек культураст, коест-кирдаст, ульнесть концертт. Те шкас ледстнематне эждить ойменть, – ледстни Елена Васильевна.
Кавксо иеть сон тонавтнесь 1 № эйкакшонь художественной школань прикладной творчествань отделениясо. Сынь тосо артсть, викшнесть, кодасть човалясто ды а лововияк весемесь, мезес тонавтнесть. Весе неть маштомачитне пек лездасть тензэ театрасо важодемстэ. Школанть прядомадо мейле Елена кармась тонавтнеме Саранскоень культурань училищасо.
– Меельце курссо тонавтнемстэ минек занятиятнес сакшнось МР-нь заслуженной артисткась Лариса Сидорина, кона важодсь МР-нь Някань театрасо. Сон ютавтсь мастер-класст, ламо мартонок кортнесь, ёвтнесь Някань театрадонть ды актёртнэде-кукловодтнэде. Весень тердимизь театрав кунсоломонок (прослушиванияв). Някань театранть содылия вишка шкасто саезь. Натой мельсэнь аштесть кой-кона спектаклянь пелькстнэ. Кода-бути весть эйкакшонь лагерьсэ оймсемстэ Някань театрась сакшнось путовксост невтеме. Мон эзинь арсеяк, эрямом сюлмави театранть марто, ульнесть лия мелень-бажамон. Тей сынек группастонок котонек. Мекс бу а варчамс? Театрась, сестэ ды нейгак, вешни од ломанть, од артистт. Кода лиякс? Эрявить кастомс тевенек поладыцят. Ламо сакшныть, ансяк аволь весе кадовить. Зярдо мерсть монь саемадон, ёжомарямом ульнесь истямо: кецязевинь ды теке марто пелезевинь. 1995 иень августонь 1-це чистэ саезь ушодовсь театрасо важодемам, – ёвтни Елена Лугаськова.
Чарькодеви, одтнэнень аволь сеске макссть покш рольть. Васня сынь лездасть спектаклятнесэ, мейле налксесть вишка рольть. Теке шкасто мартост важодсть ды ламо тонавтсть актёронь-кукловодонь профессиянтень РФ-нь заслуженной артистэсь, МР-нь народной артистэсь В. И. Сидорин, сонзэ низэ – МР-нь заслуженной артисткась Л.А. Сидорина, Г. В. Якушина.
– Неть ломантне макссть тенек пек ламо. Ютынек покш практика. Минек марто путнесть башка спектаклят. Нама, ульнесть ильведькст ды мелявкст. Сынтемест а кода. Минь пштистэ ванынек, кода сынь эрьва чистэ важодить, кода весе седеест путыть тевентень. Ламо тонавтнинек пельдест. Сюкпря ёвтан, эрямосон ульнесть истят ломанть ды понгонинь юткозост монгак, – пачти Елена Васильевна. Шкань ютазь, кото студенттнэнь ютксто сон ськамонзо кадовсь театрасо.
Елена Лугаськовань эрьва кодамо спектаклясо малав ведьгемень ролензэ. Васня налксесь принцессат, феят, нумолнэть ды ёвксонь лия персонажт. «Волшебный фонарик» спектаклясонть сеске налксесь колмо рольть: Нимилявонь, Сеелень ды Салмуксоньзалынь (Стрекозань). Ве таркасо натой кавто геройтне вастневсть вейсэ ды эрявсь кортамс кавтонь кисэ. Седе тов кармасть макснеме истят рольть, косо эрявсь невтемс эрьва кодат обуцят. Истя жо артистканть ламо вишка ролензэ, кода кортыть, второстепеннойть. Ансяк сон зярдояк а тукшны ве ёнов сценадонть, лезды лия артисттнэнень. Някань театрасо налксемстэ артисттнэ кирдить кедьсэст эрьва кодат някат: покшт, вишкинеть, улить стакаткак. Теде башка, сынст эряви свал чаравтомс-велявтомс пряст, кедест-пильгест. Вейке ломаннень весе те а тееви, секскак вакссонзо аштить лездыцят. Ваныцятненень весе маряви шождакс, арсить, някатнень кирдемс ды велявтнемс аволь стака. Ансяк те а истя. Лиясто савкшны кувать кирдемс няканть вере. Арседе тынсь, кода сизить кедтне! Елена, тень редязь, стамбарнэ тееви нежекс, лезды кирдемс някатнень.
– Кить а кемить, минь яла мертяно тенст саемс сырькаест ташто утюгост ды, вере кирдезь, яксемс зярскак мартонзо. Весе неть маштомачитне сыть шкань ютазь, аволь сеске. Минек тевсэ ламо салавачить-нюанст. Эйкакштне арсить, няканть кие-бути вейке кирди, лиясь кисэнзэ корты, колмоцесь моры… Весе вейке ломань тень теи, – ёвтни актрисась.
Елена Васильевна покш мель яви театрань общественной ды творческой тевтненень. Сон совавтызе эрямос «Доступный театр» проектэнть. Ламо важодсь И.Д. Воронин лемсэ краеведениянь музеень ды эсест театрань архивтнесэ, пурнась эрявикс материалт. Школань тонавтницятненень ютавты театрава экскурсият ды мастер-класст, ёвтни театрадонть ды актёронь профессиядонть. Сень лангс ванозь, кодамо иень эйкакшт сыть, кочкави башка программа. Истя, яла сакшныть весе класснэк, экскурсиядо мейле кадовить спектаклянь ваномо.
– Театрась тонавты, путы превс минек эйкакштнень. Канды валдо, лембе. Теке марто минек театрась аволь ансяк вишка ваныцятнень туртов. Сон весе семиянть туртов. Мон свал кортан: садо ваномо семиянек. Те седеяк вейсэнди малавикс ломантнень, – корты Елена Васильевна.
Декретсэ улемстэ Елена Лугаськова тонавтнесь Н. П. Огарёв лемсэ МГУ-нь Историко-социологической институтсо психологокс. Ней сыргась высшей омбоце образования мельга. Тонавтни Н. П. Огарёв лемсэ университетэнь Раськень культурань институтсо «актёронь искусства» специальностенть коряс. Валонзо коряс, свал вечки содамс мезеяк од, молемс ансяк икелев, а аштемс ве таркасо. Ды кона шкане эрьва ков кенери?! Някань театрась невтни спектаклянзо аволь ансяк эсест кедьсэ, ардтни республикань школатнева, эйдень кужотнева. Теде башка, иезэнзэ зярыяксть эрсить лия ошсо гастрольть. Е. В. Лугаськова ардтнесь Казанев, Волгоградов, Грозноев, Набережные Челны, Чебоксары, Йошкар-Ола оштнес.
Эряви меремс, Някань театрась кармась малавикс весе семиянзо туртов. Ульнесь шка, Елена Васильевнань ялаксозояк иень перть тесэ важодсь актёрокс. Энялдсть кадовомс, тевезэ ютась парсте, ансяк сон кочкась эстензэ лия ки. Зярс-бути тесэ важодсь авазояк. Сон тунь лиякс кармась ваномо актёронь профессиянть лангс. Неизе ды чарькодизе, кодамо те тевесь аволь шожда, зяро вийть ды цидярдомачи эряви. Аванзо мельга театрав важодеме сась Алёна тейтерезэяк, сон аволь актриса, теи-топавты лия тевть. Александр цёразо тонавтни 6-це классо. Якси 6№ эйкакшонь музыкальной школав. Сонзэ паро вайгелезэ, вечки морамонть ды яви покш мель эстрадань морамонтень.
Е. В. Лугаськовань ундоксонзо Рузаевкань райононь Од Муравьёвка велестэ. Авазо мокшава. Семияст покш. Весе сынь ванстыть коест-кирдаст, улить раськень оршамопелест. Бабанзо пельде Елена Васильевнанень ютасть мокшонь авань кавто оршамопельть, умонь шкань, кодынзе-викшнинзе сонсь бабазо. Сон кирди эйсэст теке сехте питней сюпавчинть, оршни сынст ансяк кодамояк покш тевс. Кода-бути ульнесь ялаксонзо свадьба, свадьбань омбоце чистэнть минек героинясь оршнесь раськень оршамопельсэ ды ютавтызе покш чинть весе койтнень коряс: овтокс наряжазь ломань марто, одтнэнь комолясо почодозь. Сакшнось паро гармонист, зэрнесть частушкат, ламо киштемкат. Те шкас роднятне ледстнить свадьбанть.
– Минек вадря коллективенек. Теке омбоце покш семия, косо свал теть венстить лезксэнь кедь. Мон яла скушнаван коллективенть ды роботанть мельга. Кода икелеяк, нейгак лездатано вейкенек-вейкенек туртов. Кеман, весе те поладови седе товгак, – прядызе кортамонок актрисась.
Татьяна МАТОРКИНА