Мартонь 27-це чистэ Эрзянь ды мокшонь национальной драмтеатрасо ютась кенярксчинь промкс. Сон алтавсь Театрань раськеютконь чинтень. Актёртнэ, режиссёртнэ, сценаристтнэ, художниктне, костюмертнэ – весе пурнавкшность вейс. Сынст туртов лембе валонь ёвтамо сцена лангс лиснесь МР-нь Культурань, национальной политикань ды архивень тевень министрань васенце полавтыцясь А. И. Карьгин. Сон ёвтась сюкпря паро важодемаст ды ваныцятнень кецявтомаст кисэ.
«МР-нь заслуженной артист» лемсэ казевсть Эрзянь ды мокшонь национальной театрань актёрось Андрей Анисимов, И. М. Яушев лемсэ музыкальной театрань балетэнь артистэсь Илья Перепёлкин, «Девчата» ансамблянь морыцясь Лилия Фомина.
«За личный вклад в развитие Республики Мордовия» Почётонь тешкссэ казевсть Эрзянь ды мокшонь национальной театрань актёрось Алексей Егранов ды МР-нь Някань государственной театрань прявт художникесь Наталья Кочнева.
Яволявтозельть театрань искусствасо МР-нь Прявтонь премиянь изницятнень лемест. «Режиссёронь сехте вадря важодема» номинациясонть казевсь И. М. Яушев лемсэ музыкальной театрань режиссёрось-путыцясь Эдуард Храмов – «Снегурочка» операнть кисэ;
«Цёрань сехте вадря роль» номинациясонть изнясь Эрзянь ды мокшонь национальной театрань актёрось Максим Акимов – «Менелень нурсемат» спектаклясо Тиньгаень роленть кисэ;
«Авань сехте вадря роль» номинациясо казевсь Эрзянь ды мокшонь национальной театрань актрисась Елена Гудожникова – «Менелень нурсемат» спектаклясо Киявань роленть кисэ;
«Вокальной сехте вадря партия» номинациясо изницякс лиссь И. М. Яушев лемсэ музыкальной театрань актрисась Екатерина Турнаева – «Снегурочка» операсо Снегурочкань роленть кисэ;
«Балетэнь сехте вадря партия» номинациясонть казевсь И. М. Яушев лемсэ музыкальной театрань балетэнь артисткась Айда-сай Сарыглар – «Спящая красавица» балетсэ налксеманть кисэ;
«Омбоце планонь сехте вадря роль» номинациясонть изнясь Рузонь драмань театрань актёрось Николай Большаков – «Волки и овцы» спектаклясо налксеманть кисэ. Ульнесть ламо лия номинацияткак.
МР-нь Культурань, национальной политикань ды архивень тевень министерствась «Театрань недля» фестиваленть лувсо ютавтсь ваныцятнень ютксо вайгелень максома. Истя, «2022 иень театра» номинациясонть изницякс лиссь Рузонь драмань театрась; «2022 иень спектакля» номинациясонть – П.Чайковскиень «Спящая красавица» балетэсь; «2022 иень эйкакштнень туртов спектакля» номинациясонть – Г. Сапгирэнь «Садко» путовксось; «2022 иень артист» номинациясонть изницякс лиссь Эрзянь ды мокшонь национальной театрань актёрось Алексей Егранов.
Теде башка, актёртнэ казевсть Театрань деятелень союзонь минек республикань отделениянть пельдеяк.