– Истя лемдизе эрзянь веледе эсь очеркенть журналисткась Марина Девятова («Эрзянь правда» газета, 2019 иень мартонь 21-це чинь номер). Ёвтасынек: ней Марина Николаевна – те газетань прявт редактор.
Виде, сон чачсь шабра велесэ, Сабанцелесэ. Ансяк, кода неяви, минек Таразбуесь тусь мелезэнзэ. Мезть эно кортамс сетнеде, кить тесэ чачсть-кассть? Вана Николай Живаев бажи весенень ёвтамс, косо ашти Таразбуесь: перьканзо – Чурька лей, Кочкамка, Сарлей, Батюло… Улить лия неявикс таркат – вирь, лугат, паксят.
Ашти мельсэнь, кода тетям, Живаев Михаил Иванович (ютась колмо войнань пачк), кортнесь: Таразбуесь аволь весть полавтнесь тарканзо. Тувталось? Улема, кодаткак стакачить. Паряк, ятто кекшнемат-орголемат? И.К.Инжеватовонь «Топонимической словарьсэ» (лиссь Саранскойсэ 1979 иестэ) Таразбуекс лововиль маласонзо Ботужелеськак – те ульнесь сонзэ омбоце (паряк, васенце?) лемезэ. Тосонь ды шабрацек лия велетнестэ эрзятне свал яксесть карадо-каршо ды вейсэнь семияткак тейнесть. Истя, тетянок авазо ульнесь Ботужелень, аванок, Комань Анка – Сабанцелень. Ансяк эрьванть седейс сехте пек педясь се, косо сон теинзе васенце чалгавксонзо ды маризе прянзо ломанекс. Васняяк, ломань ютксо.
Велесэ роднядо малавикст – шабратне. Вана минек куншка курось – ниле-вете кудот. Васняяк, Качансесь. Сонзэ вакска кись пачтятанзат Сабанцелев. Тов молемстэ савиль ютамс колхозонь покш подвал вакска. Минек туртов те ульнесь пандо, ков кузнилинек кизнаяк. А уш тельня мейсэ ансяк эзинек ардтне-кирякстне! Тестэ омбоце кияванть яксинек Нахаловкав, колхозонь утомтнес, велень калмолангов. Истя Качань кудось (сыньгак Живаевть), мерть, явсь (эли вейсэндясь) куншка куронть лия ульцянть – Вирьбенть марто. Вальмалонок – луга, вейс пурнавома, налксема тарка. Куватьс эштё эзть калавтневе пекстазь-яжазь церьковань стенатне, конатнень малас покштне а мерильть миненек, эйкакштненень, якамс.
Нахаловкав молемстэ савиль ютамс вармаведьгевенть вакска (минь мерилинек «ведьгав»). Сон истямоль покш, сэрей! Вармане чарыльть-якавить чувтонь сёлмонзо, ды те виесь пачкоди яжавтома кевтнес, конатнень юткс кайсезь зёрнась тееви почтокс. Бути вармась полавты ёнксонзо, эрицятне мирём, верде масторов пачкодезь чувтонь нежетнес кундазь, велявтсызь ведьгев прянть (сёлмонек-мезнек) лия ёнов. Арась варма – почт а яжавтат.
Таразбуесэ эсь шкасто ульнесть колмо (монь мельсэ – кавто) вармаведьгевть ды Сарлейсэ – ведьведьгев. Зярдо мон эштё школавгак эзинь яксе, тетям ды ялаксозо Яков од покштянок (Явлей) – плотникть, лия цёра ломантнень марто мезть-бути тейсть-витнесть ведьгевсэнть. Минек, вишкинетнень, кучнимизь плотниктнень мельга щепкань пурнамо (эрявсть кирвазьксэкс). Якилинек пиренек удалга канстьсэ видезь паксянть пева. Канстесь касыль пек сэрейстэ.
Весть уш туемстэ мария: Яша лелям кройкстась. Тетям сеске кардызе: «Кирдть прят: эйкакш удалот!»
Тетянень савкшнось та-мезть витнемс-петнемс ведьведьгевсэнтькак, ды минек кучнимизь Сарлей лангов сонензэ ярсамопелень кандтнеме. Ней те таркась понгсь «Таразбуень моря» алов.
Шабратнень марто эринек некеть тевтнесэ-мелявкстнэсэ. Вейкеяк чи а ютыль кудодо кудос апак совсе, апак пшкале: кинь кшизэ прядовсь – вандыс каштомост явамс вешить, кинень сал эряви эли эмежень путомсто видьметь. Качатнень минек ёно шабраст – Циряйть (Абрамовт), косо кассть колмо цёрат. (Покшось, Вена, мейле важодсь тесэнь «Труд» колхозонь шофёрокс). Аваст стакасто сэредсь.
Минек ды Циряйтнень ютксо модас «ландясь» Макар Оксянь кудынезэ. Ават-тейтерть эрясть ськамост ды, ловт, ковгак эзть яка. А пиресэст, а вальмалост эзь касо вейкеяк чувто эли куракш.
Эсенек кудось сестэ лововсь весемеде покшокс ды мазыекс: икельцть-удалцть, сисем вальмас. Пиресэнек мезе ансяк эзь касо! Семиянок весемеде покшоль: кемень эйкакшт. Мартонок Иван Степанович покштянок – покш, виев ломань. Кодась карть. Кирдсь мекшть. Минек кавонест лисьматнес сонсь теекшнесь увтямот ды бадият. Тетянзо эйстэ тусь кудолеменекак: Стяпанкань (Живаевтнеде велесэнек ламольть). Пиренек кувалт ульнесь прогон, кува ардтнесть, пансесть стадат. Секень вант, пирявксонтькак эль сявордсызь. Ды тетям-авам кецясть, зярдо тезэнь путсь кудо Кузнецов Архип Фёдорович – Атю… Эйкакштне куросонок ламолгадсть. Неть минек ёжошабратнеде кудо экшка ушодовиль лия ульця – Алопе, кува савиль ютамс райцентрав, Отяжелев (станцияв) якицятненень. Обед ёно, латконь трокс, таргавкшнось Удалцьпесь.
Атютнень ваксс (сындест икеле) зярс яла аштесь попонь кудо. Мейле тосоль эйдень кужо, седе тов – клуб: невтнесть кинот. Овсе маласоль – велень Советэсь, косо чинек-венек, полавтнезь – ульнесть дежурицят стенас понгавтозь телефононть вакссо. Велень кулятне истякак свал пачколесть весенень.
Кода минь касынек, тонавтнинек, кода ютавтынек шканть войнадо мейлень иетнестэ, пек вадрясто сёрмадсь содавикс журналисткась, Качатянь (Живаев Фёдор Терентьевичень) нуцьказо Рябова Татьяна (ловнодо «Эрзянь правда» газетань 2019 иень декабрянь 18-це чинь номерстэ).
Мезде тесэ мон ёвтнинь – ансяк весть кивчкадезь варштавкс ютазь шкантень. Вейке чалгавкс се кинть лангсто, конань эряволь бу ютамс эйстэнек эрьвантень чачома велезэнзэ велявтомсто. Эдь истя ламо кадовсь удалов… Шкась юты. Велетне ёмсить…
СТЯПАНКАНЬ Таня