Ноябрянь меельце читнестэ Саранскоень Культурань кудось теевкшнесь Ине Отечественной войнань ледстнемань, сыре ломантнень одтнэнь марто вастовомань ды сехте ёроков морыцятнень пурнавома таркакс. Тосо ульнесь Республиканской военно-патриотической шкинемань III фестивалесь, конась ютавтови «Сурский рубеж» лем ало.
Васенце этажсонть невтевсь кезэрень эрямодо выставка, косо ладсезельть икелень шкань кедьёнкстнэ. Омбоце этажс куземстэ сельмезэнек каявсть Ине Отечественной войнантень алтазь стендтнэ: тосо ульнесть ламо се шкань документт, казнеть ды горобиясо ванстовиця питнейдеяк питней фронтсто сёрматне, фотографиятне.
Сень лангс апак вано, те покш важодевксэсь тевс эзь нолдаво, ялатеке покш сюкпря сеть ломантненень, кить тосо стакасто важодсть войнань иетнестэ. Сынст эйкакштнестэ, нуцькатнестэ те шкас ламотне ванстыть сеть оршамопельтнень ды кедьёнкстнэнь, конатнесэ тосо важодсть малавиксэст…
Пек вадря, республикасонок муевсть ломанть, кить ушодызь «Сурский рубеж» военно-исторической вейсэндявксонть тееманзо. Те, васняяк, сонзэ прявтось Сергей Косынкин.
Кода мерсь МР-нь Культурань, национальной политикань ды архивень тевень министрась Светлана Баулина, «Сурань рубеж» мемориальной комплексэнть теемадо арсеманть шнызе Мордовия Республикань Прявтось Артём Здунов. Тосо кармить аволь ансяк лемень ледстнемань, истя жо спортонь коряс пелькстамонь ды лия таркат. Тов эрьва сыцясь тееви содавиксэкс се шкань историянть марто. Нама, те тарканть арсить теемс истят фестивальтнень ютавтома таркакс.
Тешкстасынек, республиканской военно-патриотической творчествань фестиваленть ютавтомадо арсемась сась Мордовия Республикань Ветеранонь советс совицятненень. Сонзэ прявтось Иван Цыганок панжомстонзо мерсь:
– Минь тей пурнавинек, штобу моротнень ды стихотворениятнень вельде ледстямс сеть шкань событиятнень. Сынст вельде истя жо невтемс минек тетятнень-аватнень ды покштятнень-бабатнень ине тевест. Прявт тевесь – патриотической лувонть вельде неень шкань од ломантнень седейтнес совавтомс питнейдеяк питней сынст путовксост минек сэтьме эрямонть кисэ. Виде, республикань ветеранонь организациясь покш важодевкс теи од ломантнень ютксо историянть а стувтомга, ине геройтнень лемест ледстнемга ды ванстомга.
Ветеранонь организацияс совицятненень, «Сурский рубеж» военно-исторической клубонь прявтонтень Сергей Косынкиннэнь сюкпрянь валонь ёвтамосто ушодызе кортамонзо МР-нь Государственной Собраниянь Председателень Советникесь Иван Москаев. Иван Михайлович, кода икелень тонавтыця, школань прявт, пшкадсь залсо аштиця од ломантненень, конатнень ютксольть кадетэнь классов якицят. Сон ёвтась тенст ламо превс путомат неень а шожда шкастонть.
Койсэнек, те чистэнть сценанть лангсто гайгиця патриотической моротне ды стихтне киньгак мельтеме эзизь кадо. Седейс весень токинзе Светлана Чурашовань «Art-Vision» киштемань театрань студиясь, кие те мероприятиянть ушодовомсто невтизе «Всё для Родины, всё для Победы!» прологонть. «Здравница» народной коллективесь седейшкава морызе «О России» моронть. Залсо аштицятне пси цяпамосо вастызь Орданьбуестэ Алина Селезневань, кие морызе «Я любила сокола» кезэрень моронть. «Инелей» киштемань ансамблясь ваныцятнень кенярдовтынзе «Встанем» хореографической композициясо. Ламотнень сельведьс пачтякшнызь Лямбирень райононь Коммунар велестэ Наталья Жигунова ды Александр Сиченов, конатне морызь Людмила Зыкинань валтнэнь ды музыканть лангс «Мать и сын» моронть.
Фестивальс сыцятне кувать цяпасть Саранск ошонь МОУ-нь 40№ средней общеобразовательной школань тонавтницянтень Кристина Адушкинанень «Катюша» содавикс моронть морамонзо кисэ.
Ледстясынек, те фестивалентень анокстакшность сядо эрьва кодат морот ды стихть. Жюрись кочкась ансяк комсьнилее номерт, конатне ловозельть сехте вадрякс.
Валентина Юдина