Ютазь недлячистэ Пензасо васенцеде ульнесь «Шумбрат» эрзянь-мокшонь раськень фольклорной кенярксчись. Сонзэ пурныцясь-анокстыцясь – Пенза ошонь Эрзянь-мокшонь раськень культурной автономиясь. Ютавтовсь Пензань областень Правительствань грантонь лезксэнть вельде Россиянь раськетнень культурань сюпавчитнень ванстомань иентень алтазь мероприятиятнень лувсо.
Кенярксчись ютась Пензань областень Спутник ошонь Фонтанной площадьсэнть. Мероприятиясонть ульнесть областень Внутренней ды информационной политикань министрань полавтыцясь Анатолий Бодров, Пензань областень Культурань ды туризмань министрась Сергей Бычков, Мордовия Республикань Культурань, раськень политикань ды архивень тевень министрань полавтыцясь Александр Карьгин, те областень раськень-культурной вейсэндявкстнэс совицятне.
«Шумбрат» кенярксчисэнть ульнесь регионсонть эриця раськетнень «Все мы – Россия!»театрализованной ютамо, пурназель «Тев – Пенза мастеровая» раськень промыслатнень ды декоративно-прикладной искусствань ярмункась. Теде башка, ульнесь «Играй, гармонь певучая!» гармонистэнь пелькстамось, косо гайгсть эрзянь ды мокшонь кельтнесэ нурька морынеть, пейдевтемат. Истя жо пурнавозтнень мазый морамосост кенярдовтызь Мордовиянь ды Пензань артисттнэ.