А пек умок Мордовиясо ды масторонь ламот регионтнэсэ, косо эрить эрзятне ды мокшотне, тешкставсь Эрзянь ды мокшонь кельтнень весероссиянь чись. Сонзэ лувсо эрзятне-мокшотне ютавтыть эрьва кодат мероприятият, конатне алтавить тиринь кельтнень ванстомаст туртов.
Кода жо аштить тевтне эрзянь келенть коряс республиканть томбале, теде минек газетань корреспондентэсь кортась Нижегородской областень Лукояновской муниципальной округонь Шандрова велень «ЦБС» ММБУК-нь 30-це № библиотекань-филиалонь 2-це категориянь библиотекаренть Евгения Михайловна Трофимова марто.
– Евгения Михайловна, евтнеде, инескеть, кода сюлмавсь эрямонк шабра региононь Шандрова веленть марто?
– Истя лиссь, Лукояновской округсо мон ськамон эрзянь литературной келень содыця. Мон тонавтнинь М. Е. Евсевьев лемсэ МГПИ-сэ (ней университет), васня биологиянь-химиянь, мейле филологиянь факультетсэ, косо дополнительной специальностекс кармасть эрзянь келесь ды литературась. Мирдем, Александр Николаевич Трофимов, Шандрова велень эрзя, тонавтнесь Н. П. Огарев лемсэ МГУ-нь исторической факультетсэ. Минь сонзэ марто вастовинек тонавтнема шкасто. Зярдо лисинь мирденень, туинек сонзэ тиринь велев. Шандровасо сон важодсь школань прявтокс. Мон ламо иень перть роботынь рузонь келень ды литературань тонавтыцякс. Теке марто ветинь «Мордовская культура» кужонть. Те мелесь сась тень сеске, кода ловныя Владимир Абрамовонь «По следу времени» очеркень книганзо, ды 1993 иестэ саезь мон паро мельсэ евтнинь эйкакштненень эрзянь культурадонть. Эйкакштнень мельс те пек тукшнось, сынь а весть сайнесть таркат эрьва кодамо пелькстамосо, пачколесть мик Санкт-Петербурговгак.
Ней уш омбоце ие важодян велень библиотекасо. Мирдем пенсиясо, мартонзо кастынек кавто эйкакшт: тейтерь ды цера. Колмо нуцьканок.
Шандрова велесь пек умонь, сон покш ды мазый. Васенцеде ланганзо ледстязель 1593 иень Арзамасонь сермадстомань акттнэсэ. Сынсь велень эрицятне лемдить эсь велест – Аворе. Те лемесь, нать, сюлмавозь топонимиканть марто. Тесэ ульнесь идем медень пурнамо тарка, конань лемдсть Аворебула. Омбоце лемесь – Шандрово, конась седе келейстэ совась эрямос ды теевсь официальной лемекс. Сон лиссь христианствадо икелень Стандра эрзянь лемстэнть. Истямо лем марто велеть улить Мордовиясояк. Саемга, Теньгушевской райононь Стандрово велесь.
Ламо истят эрзянь топонимикань лемть савсь тень вастнемс Владимир Викторович Комиссаров краеведэнть «История и люди села Иванцево» книганть анокстамсто, конась лиссь мелят. Иванцево эрзянь велесь – те Шандрованть вакссо шабра веле. Материалонь анокстамсто автортнэнень эрявсь лезкс веленть перька топонимикань лемтнень ютавтомсто. Тесэ эрзякс лемдезь латкот, вирть, лейть, конатнень рузонь кельс ютавтомс лездынь мон. Книгасонть ламо архивень материалт, сынь сермадозь ученойтнень, краеведтнэнь монографияст лангс нежедезь, ды пек парсте евтнить Иванцево эрзянь веленть историядонзо. Владимир Комиссаров краеведэсь сермадсь аволь вейке книга, сонсь руз, ансяк сермады эрзянь велетнеде, секскак сеедьстэ пшкали тень лезкс мельга эрзянь кельстэ рузкс валтнэнь ютавтомасо.
– Кодат мероприятият эрзянь келенть ванстомга ютавтовить тынк библиотекасо ды целанек Нижегородской енкссо?
– Монь важодемам домкасто сюлмавозь эрзянь келенть, литературанть ды раськень культуранть марто. Библиотеканть марто минь ютавттано эрьва кодат фестивальть, тематической таргот, вастовомат, мероприятият. Теде евтнян седе домкасто.
Эрьва ие якатано «Эрзянь лисьмапря» регионъютконь фестивалентень. Сонзэ анокстыть Нижегородской областень Культурань министерствась, Лукояновской областень администрациясь ды зярыя общественной организациятне. Те фестивалесь ютавтови Лукояновань округонь Новоселки велень Кельмелисьмалей лисьмапрянть вакссо эрзянь этнопарксо. Шандровань библиотекась-филиалось ды Культурань кудось вейсэ анокстыть фестиваленть программанзо. Минь анокстатано декоративно-прикладной искусствань выставка, мастер-класст, библиотечной площадкат, пидетяно эрзянь ярсамопельть.
Меельце иетнестэ покш мель явови Эрзянь-мокшонь кельтнень весероссиянь чинть тешкстамонтень. Шандровасо Эрзянь келень чись тешкстави 14 иень перть. Сон ютавтови пек келейстэ. Тей пурнавить аволь ансяк Лукояновской округонь эрицятне, пачколить шабра Шатковской округонь эрзятнеяк. Сеедьстэ сакшныть инжеть Мордовиястояк. Те чинтень мон уш анокстан ламо иеть. Васня кода Шандровань школасо «Мордовская культура» кужинень ветиця, а ней – кода библиотекарь. Покшчинтень пурнан «Тиринь келесь – раськень ойме» книгань выставка. Эйкакштнень ды покштнень марто ютавтан налксемат: «Баягине», «Карматано эрзякс ловомо», «Эрзянь ковкерькс» ды лият. Сцена лангсто евтнян валморот, эрзянь произведениясто саевкст, косо неяви ды маряви эрзянь келенть мазычизэ. Те иестэнть ловныя Серафима Люлякинань «Иля пува, варма» валморонть, конась алтазь Лемтеме солдатонтень.
Тешкстасынек, те фестивальденть икеле Шандровань библиотекасо ютавтови Эрзянь келень таргось (недлясь). Сон седе пек алтазь эйкакштнень туртов ды пештязь эрьва кодамо налксемадо, марямга книгань ловномадо, зярыя лувонь прянь яжамкадо ды лия мельстуиця тевде-валдо.
– Евгения Михайловна, кодат кужинеть Шандрова велесэ важодить эйкакштнень ды покштнень туртов?
– Минек ули «Дюймовочка» эйдень кужонок, конанть марто библиотекась сюлмавозь кеместэ. Школав аякицятнень марто важоди «Читайка» вейсэндявксось. Эйкакштненень пек тукшныть мельс ушосо налксематне, сынст вельде ванстови эрзянь келесь. Мартост налксемстэ тевс нолдан Василий Брыжинскиень «Сиянь рисьминеть» книганзо. Истя жо тень лездыть Раиса Щанкинань «Эрзянь келень азбукась», монь землячканть Марина Тарасовань «Псакань евкст» книгась ды «Чилисема» эрзянь мазый журналось.
Истя жо моли важодема сыретнень мартояк. Библиотеканть юрсо важоди «Второе дыхание» клубось. Тезэнь пурнавкшныть тиринь енксонь вечкиця ломанть, конатненень 60-де ламо иеть. Неень шкане самай сынь эрзянь келень парсте содыцятне. Пурнавозтне сеедьстэ евтнить тиринь велень историясто саевкст, содавикс ломантнень эрямодост. Клубс совицятне яксить кода велень мероприятиятнес, истя ошонь ды целанек округоньгак.
Евгения Михайловна башка тешкстызе, эрзянь келень сехте ероков «пропагандистэкс» велесэст ловови Культурань кудонь «Умарина» народной образцовой самодеятельной коллективесь. Вейкеяк покшчи а юты сынст весела эрзянь моровтомо. Ламот морыцятнень эйстэ совить «Второе дыхание» клубонтень.
«Лукояновские яблоки» округонь фестивальсэнть теке клубонь участниктне кецявтыть инжетнень эсь садпирень тантей умарьсэ ды раськень ярсамопельсэ. Те фестивалентень библиотекась анокстась Шандрова велень историядо материал, инжетнень содавтызь Эрзянь свадьбань ютавтомань коенть марто.
Эрьва кизэ тешкстави Шандрованть чачома чизэ, косо свал гайгить эрзянь кельсэ морот. Истя жо велесэнть тешкстави Социалистической Трудонь Героенть, «Единство» колхозонь председателенть С.С. Немцевень юбилеезэ. А умок сонензэ чачома чистэнзэ саезь топодсть 110 иеть. Сон ламо тейсь веленть стявтомга-кепедемга: тесэ мазыйстэ теезь центрась, парктне, эйдень кужось, школась ды ламо лия мезесь, секскак ломантне сонзэ а стувтнить течинь чис.
Нама, шабра регионсо эрзянь келенть ванстомсто вастневить ламо стакачитькак. Куш эрзянь келень ванстомадо кевкстематнесэ свал лездыть тесэнь власттне, ансяк миграциянь, демографиянь стакачитнень кувалма од ломантнень ютксо эрзянь келесь пек келейстэ а нолдави. Тиринь келенть парсте содасызь седе сыре ломантне, одтнэде жо велесэнть кадовить аламо. Тетянь-авань келенть ванстомга пек ламо а эрявияк – ансяк кортамс эйсэнзэ эрьва чистэ. Тиринь келесь – те ниле ундокстнэстэ вейкесь, конась эряви эрьва ломанентень: тиринь мода, тиринь кель, тиринь культура ды история.
Евгения Михайловна чачсь-кассь Мордовиянь Кочкурбуень Од Мурза велесэ. Тесэ чачома таркаст Брыжинскийтнень – Мордовиянь келес ды сонзэ томбале содавикс писателень семиянть. А Михаил Иванович ульнесь натой сонзэ тонавтыцякс. Пек лембестэ авась ледстни эсь тонавтыцянзо, кона бажась невтемс эйкакштненень эрзянь келенть мазычинзэ ды домкачинзэ. Теде башка, сон пек мельванозь тонавтсь рузонь келентькак. Содась эрьва валонть питнейчинзэ ды смустензэ. Весе эрямонзо перть авась кирди мельсэнзэ сонзэ уроктнень ды евтни эрзянь писательденть неень эйкакштненень. Евгения Михайловна библиотекасо пурнась «Эрзянь мастор» кужине, косо ванстовить Михаил ды Андрей Брыжинскийтнень, Александр Доронинэнь, Илья Девинэнь, Числав Журавлевонь книгаст. Сынст ютксо эрзянь фольклорось, «Чилисема» эйкакшонь журналось, «Эрзянь правда» ды «Эрзянь мастор» газетатне.
Марина Агафонова