Пятница, марта 29, 2024
Важное

Истямо лем ало А.С. Пушкин лемсэ республиканской библиотекасо важодсь фотографиянь Весероссиянь невтема. Сонзэ ютавтыцязо – Межэтнической журналистикань Гильдиясь NAZACCENT.RU порталсо.

Те мазый, эрявикс пелькстамось ютавтневи эрьва иестэ. Пелькстамонть-невтеманть мелезэ-арсемазо: оршамонть вельде невтемс сыретнень пельде одтнэнень кадозь койтнень-кирдатнень, ванстомс Россиянь эрьва раськенть культуранзо, сыргозтемс одтнэнь эйсэ мель содамс эсь раськень койтнень-кирдатнень, культуранть.

Пелькстамонтень кучокшнызь эсь раськень оршамосо фотографияст тиринь масторонь эрьва ёндо – Камчаткасто саезь Калининградс. Пелькстамонть-невтеманть ушодовомсто саезь Гильдияв кучозельть весемезэ 1000 ламо фотографонь 2000 ламо фотографият. Сынст ютксо аволь ансяк фотографт, улить журналистт, педагогт, врачт, военнойть. Эрьва костонь коень ванстыцят, конатнень кецявты оршамотнень мазычись, ризнэвти-мелявтовты тень весе ёмамось. Эдь васенце таркасо ашти аволь кие ломанесь национальностень ды важодемань коряс ды косо эри, васенцесь – тиринь ёнксонть, сонзэ сюпавчинзэ вечкемась. Эрьва кодамо кельсэ кортыцятне, эрьва кодамо оршамосо якицятне – те эдь истямо сюпавчи, ды эряви те весементь ванстомс, кадомс одтнэнень!
2014 иестэ арсезь те пелькстамось вечкевсь весенень, секскак эрьва иестэ седе ламо ды ламо кучнить фотографият, ламот сынсь ды эйкакшост кармасть кандтнеме эсь раськень оршамот, сынсь кодыть, викшнить, стыть.

Библиотекань нупаленть мазылгавтыть эсь раськень кезэрень мазый оршамосо вишка якутт ды бурятт, чеченецт ды ненецт, карелт ды украинецт, ингушт ды удмуртт, узбекть ды нанаецт, калмыкт ды рузт… Тесэ Россиянь весе 193 раськень эйкакшт, конат невтить минек раськетнень культураст, мазычист.
Эрьва иестэ сюпалгады пелькстамонть-невтеманть фондозо, келейгады невтема таркань географиясь. Сонзэ уш ванызь ламо тёжат 59 таркасо.

Гильдиясо пелькстамось-невтемась тедеде седеяк вадряль. Лездась тенень Шодиевень Международной фондось.
Мелявксось вейке: арасель кодамояк фотография Мордовиясто. Эрзянь ды мокшонь оршмопельтне жо пек мазыйть, лия ёнов а молицят.
Весе фотографиятне мазыйть, седейс токицят. Аламошка кой-конатнеде.
«Содык одирьванть». Фотографось Коми Республикасто Сергей Гордеев. Покш кудо икеле чувто вакссо, коминь раськень оршамосо кото тейтерькат ды цёрыне налксить «Содык одирьванть» покштяст-бабаст налксемасо. Ды истя налксить, натой а неитькак вакссост важодиця фотографонть. Налксицятне – «Кстыйнеть» эйкакшонь фольклорной коллективесь, конанень малав уш 20 иеть. Лангсост оршамот, конатненень сядодо ламо иеть. Истямо оршамосо икеле яксесть Коми Республикань Удонской районсо.

Эштё вейке фотография Коми республикасто – «Кстыйнеть». Колмо тейтерькат коминь оршамосо луга лангсот. Сынь сынськак прок кстыйнеть – ашо-якстере палясост цецяв луга лангсот, косо кенерсть кстыйтне. «Кстыйнеть» фотографиясонть – эйдень кужонь тейтерькат, конат эрить Коми Республикань Усть-Куломской райононь Ало Воч велесэ. Самай тесэ коми эйкакшонь этно-туристической центрась. Фотографиясь Мария Плыковань.

А вана Любовь Пакалина снимась маринь оршамосо вишка тейтерька – колмо иесэ Полина Толстовань, кона оршазь маринь палясо, пряс путсь шарпан, карсесь карть, сайсь кедезэнзэ шиялтыш (нудеень кондямо). Те весе мазыйдеяк мазый оршамопелесь теезь эсь кедьсэ, кудосо, мушконь сурестэ, карсемапелесь – ленгень.

«Кудо вакссо» – истя лемдизе эсь важодеманзо Удмуртиясто Мария Антонова. Вишкине тейтерькине удмуртонь оршамосо, паряк, Бурановасто, ваны лангозонок прок Бурановань луга лангсто.
«Ялга марто оймсема» – истямо лем ало Сэратэтто Нечей фотографонть важодевксэзэ. Ненецэнь оршамосо Ангелина тейтерькась кавто сярдонь вашине марто
А вана вишка мариецэсь вирь куншкасо кутмордызе килеенть. Сон ашо цецяв кужосонть, луга лангсо мазыйстэ викшнезь панарсо, маринь раськень шляпасо.

Ванат весе те мазычинть лангс ды прок марявить нармунень морот, вирень увтт. Пек мазыйть фототне!

Геннадий Гребенцов

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».