А.С. Пушкин лемсэ Национальной библиотекасо панжовсь «Наследие» Мордовиянь раськетнень культураст школа» культурно-образовательной проектэсь. Сон ютавтови Равчирень финнэнь-угрань раськетнень культурань куншкакуронь ды МР-нь Культурань, раськень политикань ды архивень тевень министерстванть лезксэст вельде.
Проектэсь алтави раськень культуратнень виевгавтомантень, койтнень-кирдатнень ванстомантень.
Иень перть школасонть кармить тонавтнеме малав 50 ломанть. Неть – аволь коммерческой организациянь ветицятне ды тосо важодицятне, творческой коллективень участниктне, культурань управлениянь методисттнэ, республикань культурно-досуговой учреждениянь важодицятне. Занятиятне кармить молеме очно-заочной лувсо. Ютыть Мордовиянь раськетнень культураст коряс лекцият ды практической занятият. Мастер-класс марто арсеви молемс республикань районтнэс ды региононь томбалев.
Тонавтомо кармить министерствань важодицятне, национально-культурной автономиянь ветицятне, Н.П. Огарёв лемсэ МГУ-нь ИНК-нь ды М.Е. Евсевьев лемсэ МГПУ-нь тонавтыцятне, А.С. Пушкин лемсэ библиотекань ды Республикань раськень творчествань кудонь важодицятне.
Школанть панжомсто шумбракстнемань вал марто пурнавозтненень пшкадсть Равчирень финнэнь-угрань раськетнень культурань куншкакуронь прявтось Е.Н. Ломшина, МР-нь Культурань, раськень политикань ды архивень тевень министрань васенце полавтыцясь А.И. Карьгин, историянь наукань докторось, МР-нь Правительстванть юрсо Гуманитарной наукань НИИ-нь профессорось Л.И. Никонова.
Васенце жо чистэнть Национальной культурань институтонь «Гайги моро» фольклорной ансамблясь (ветицяст С.В. Колесникова) морась инжетнень туртов мазый морот.
Татьяна Маторкина