Тедеде МР-нь Някань государственной театрась тешксты 85 иень юбилеензэ. Весе те шканть перть сон кецявты вишка ваныцятнень од путовкссо ды сеть спектаклятнесэ, конат молить сцена лангсо зярыя иень перть. Спектаклятне невтевить эрьва оймсема читнестэ, теде башка, лия читнестэ театрась ардтни ошонь школатнева, республикань районтнэва, косо невти эйкакштненень путовкстнэнь ды мастер-класст.
Мелят театрасо ушодовсь «Кукольный серпантин» проектэсь, конась тусь ваныцятнень мельс. Мезе те истямось? Те – эйкакштнень туртов театрасо, сцена удало экскурсият, мастер-класст ды творческой вастовомат.
Вана нейгак Саранскоень 20 № гимназиянь тонавтницятнень туртов ютась те программась. МР-нь заслуженной артисткась Елена Романовская ёвтнесь някань театратнень историядост. Мордовиясо Някань театрась панжовсь 1938 иестэ. Васня арасельть эсест кудост, режиссёрост, художникест ды актёрост. Пурнавсть вейс сеть ломантне, конат певтеме вечкилизь тевест, ды шкань ютазь весемесь лиссь.
– Театратнесэ улить эрьва кодат някат, конатнесэ важодить актёртнэ-кукловодтнэ. Ве ёндо ванозь, маряви, кода шождасто чарыть-велить някатне спектаклятнесэ. Алкукс жо, те профессиясь стака. Эрявить ламо кедьвийть ды цидярдома. Кедтне свал вере, кирдить, чаравтыть някатнень, теде башка, а стувтомат валтнэнь! Весе минек някатнень теить художниктне театрань цехсэ, – пачтясь Елена Романовская.
Сонзэ валонзо поладынзе МР-нь культурань заслуженной роботникесь, Някань театрань прявт художникесь Наталья Кочнева:
– Весе, мезе тынь нетядо сцена лангсо – теезь художниктнень кедьсэ: декорациятне, някатне, оршамопельтне… Някань теемась – аволь шожда тев. Кавтошка недлят эрявить. Васняяк арсеви образось, артови эскиз, ичеви пластилинстэ, гипсстэ, седе тов някань прясь тееви папье-машестэ. Артыцятне-модельертнэ стыть някантень костюм, артисттнэнень оршамопельть. Эштё вейке специалист лади потмозонзо кундамка-кирдемка. Ды теде мейле актёртнэ кундыть някантень, тонавтнить эйсэнзэ кирдеме-велявтнеме. Минек театрасо тевс нолдавить эрьва кодат някат: улить някат-петрушкат; улить тростевойть – сынь вере кирдевить, потсост, теке мерят, машинка – конась велявтни сельметнень, кургонть; улить планшетной някат.
Школань тонавтницятнень туртов те чистэнть невтезель Г. Сапгирэнь «Садко» од покш спектаклясь, конань путызе МР-нь заслуженной артисткась Лилия Шахова. Рузонь кезэрень эпосонть коряс былинась лия ёнов а молиця. Тесэ вейс сюлмавсь мода лангонь ды ведь потмонь эрямось. Прявт героенть, гуслясо седицянть Садконь орожиясы иневедень инязоронь тейтересь Волхова. Ансяк сонзэ пек учи вечкевиксэзэ Любаша… Кода весе ёвкстнэсэ, тесэяк пелькстыть апаро вийтне ды парось. Ваныцятне ризныть ды мелявтыть прявт геройтнень кисэ. Путовкссонть оршамопельтне мазыйть, сельмес каявицят, мельстуезь невтеви ведь потмонь масторось ды тосо эрицятне, гайги вадря музыка.
Эряви меремс, те спектаклясь кочказь «Театрань недля» республикань фестивалев-пелькстамов, сонзэ изницянтень максови театрань искусствасо МР-нь Прявтонь премия. Кие изни, яволявтови мартсто, Театрань чистэ.
Татьяна Маторкина