Изнямонь чистэнть Мордовиянь Прявтось Артём Здунов вастневсь «История и боевой путь 326-й Рославльской Краснознаменной стрелковой дивизии» документтнэнь колмо пельксэнь пусмонь теицятнень марто. Авторской коллективесь важодсь пусмонть лангсо 2018 иестэ саезь, книгань колмоце пельксэсь лиссь 2022 иестэ.
Пусмонтень совасть дивизиянть пурнамодо, сонзэ боевой киденть документтнэ, боевой тевтеематнень картатне, боецтнэнь ды командиртнэнь наградань документтнэ. Колмоце пельксэнтень совасть документт, боецтнэнь ды командиртнэнь малавиксэст туртов сёрмаст. Покш пелькс саить боевой тевтеематнеде дивизиянь воинтнэнь ледстнематне ды мемуартнэ.
Мордовиянь Прявтось тешкстась, прявт тевесь ней – пачтямс те книганть ловныцятненень, од ломантненень: «Тынь неинк парадсонть школасо тонавтницятнень, студенттнэнь – каштант, весёлат, валдо вандынь чинтень кемицят. Энялдан тенк, штобу те материалось, Россиянь ды Мордовиянь историянь, минек земляктнень ине тевдест те покш питнейчись пачкодезэ эрьвантень».
Ледстясынек, дивизиянтень совакшность 13 600 ломанть, малав 10 тёжатне – Мордовиясо чачозь. Дивизиясь ульнесь Москов ало, Ржевенть ды Рославлянть, Ленинградонть ды Псковонть маласо немецень-фашисттнэнь войскатнень тапамосо, олякстомтсь Советской Эстониянть, маштсь ятонть Восточной Пруссиясо, прядызе эсь кинть Германиясо. 1943 иень сентябрянь 25-це чистэ Рославль ошонть саеманзо кисэ сонензэ максозель «Рославльская» лемесь. Тарту ошонть саеманзо кисэ дивизиясь казезь Якстере Знамянь орденсэ.
Боецтнэнь ды командиртнэнь ине тевест, апелемачист ды героизмаст кисэ дивизиянтень кемгавтовоксть максозель благодарностть Верховной главнокомандующеенть пельде. Мордовиянь эрицятне Ине Отечественной войнанть перть ветясть шефства «Мордовской» дивизиянть лангсо. «История и боевой путь 326-й Рославльской Краснознаменной стрелковой дивизии» пусмонть анокстасть МР-нь Культурань, раськень политикань ды архивень тевень министерствань, МР-нь Правительстванть юрсо Гуманитарной наукань научно-исследовательской институтонь, Мордовиянь Центральной государственной архивень, 1941-1945 иетнень Войнань ды трудонь подвигень мемориальной музеень ды И. Д. Воронин лемсэ республикань краеведениянь музеень специалисттнэ.