Четверг, марта 28, 2024
Важное

Россиянь общенародной фронтонь мордовской региональной отделениясь тейсь паро кой. Сонзэ активисттнэ тейнить казнеть ды якить поздоровонь ёвтамо Ине Отечественной войнань участниктненень ды тылсэ роботыцятненень.
Сындест ней кадовсть овсе аламо. Аволь умок, мартонь 16-це чистэ, эсь 90 иень юбилеензэ тешкстызе Покш Березникень райононь Гузынцы велень эрицясь Нина Ивановна Селякина.
А стяко кортыть, сыречись аволь кеняркс, куш весень сон а вейке. Веенст эйсэнзэ вастыть малавикс ломань ютксо, омбонстнэ ськамост. Нина Ивановна Селякина эрясь аволь шожда пинге. Войнань шкань эйкакштненень савсь печтямс ламо стакачить. Нинанень топодекшнесь 11 ие, зярдо ушодовсь Ине Отечественной войнась. Семиясост ульнесть 6 эйкакшт. Авазо ды тетязо сынст трямга путсть ламо вийть. Войнань васенце читнестэ тетянзо саизь фронтов. Нина Ивановнанень ансяк ледстневи, кода туемадо икеле тетязо палызе. Теде мейле сонзэ эзизе некшне. Зярыя шкань ютазь тенст сась тетянзо маштовомадо куля. Кувать эзть сода, косо калмазь. Лездась теке велесэнть чачозесь, ней Саранскоень 1941-1945 иетнень войнань ды трудонь подвигень мемориальной музеень директорось Николай Андреевич Кручинкин. Смоленской областьсэ Бурково веленть маласо братской калмазырьсэ калмазь эрзясь Иван Семенович Кручинкин.
Войнань иетне Нина Ивановнанень а стувтовить эрямонь меельце читнес. Савсь топавтомс ламо роботат покштнень таркас. Школасо сисем класстнэнь прядомадо мейле, савсь роботамс колхозсо: паксясо, фермасо. Савсь мик видьмекс мельга ялго якамс Саранскоевгак. Вейке истямо молемась зярдояк а стувтови. Ошов кись ульнесь аволь те таркаванть косо ней. Видьмекс ведратнень марто эрявсь печтямс леень трокс. Од тейтерькатне путсть ламо вий, штобу сынст а начтомс. Тетядонзо мейле тусь эрямосто бабазо. Семиясост азорось ульнесь покштязо, конась весеменень эзь кенерькшне кодамс ленгень карть. Сестэ кармась те тевентень тонавтомо Нинань.
Седе мейлень иетнеяк тетявтомо кадовозь эйкакштнень туртов аволь шождальть. Савсь ардтнемс Ивановань областевгак, косо таргасть торф.
Эрямось кармась аламодо полавтовомо 60-це иетнестэ. Се шкане Нина тейтересь вастокшнызе уцясканзо. Мирдезэ, Николай Иванович, роботась тескень колхозсо трактористэкс. Сонськак тесэ роботась. Чачсть колмо цёраст. Кирдсть кудоютконь ракшат. Ней Нина Ивановнань 3 нуцьканзо. Сынсткак уш улить эйкакшост.
Кода илязо уле, шкась весементь полавты. Роботантень максозь ламо вийть. Шумбрачись аволь певтеме. Аволь умок ормалгадокшнось. Покш сюкпря малавикстнэнень, эзизь кадно ськамонзо. Ней таго вадря, котьми кудоютконь тевсэнзэ. Зярдо кевкстинек Нина Ивановнань эрязь иетнеде, мерсь: «Кодаткак янксеман арасть, бути максы вере Пазось, ули мелем эрямс сядо иетькак». Ванат те бабиненть лангс ды арсезеват, самай истят ломантнень лавтовост лангс масторонок нежеди стака шкатнестэ.
Эрямонзо перть Нина Ивановна Селякина роботась 48 иеть ды 8 ковт. Сон – трудонь ветеран. Кода сонсь тешкстызе, штобу зняро иеть эрямс, эряви ламо роботамс. Юбилеень чистэ кудозонзо пурнавкшность малавиксэнзэ, шабранзо. Лембе валонь ёвтамо сакшность Россиянь общенародной фронтонь мордовской региональной отделениянь активисттнэ. Ютксост предпринимателесь Павел Михайлович Краснопольский, Гузынцы велень администрациясто Тамара Николаевна Селякина.
П.М.Краснопольский поздоровонь ёвтамсто тешкстызе, самай истят ломантнень виест вельде кепедевсь масторонок. Сюкпря сыненст, течинь эрямонть кис. Содазь, юбилейстэ казневтеме а кода. Велень администрациянсетнеде башка неень шкань паро телевизор казсть общенародной фронтонть пельде.
Велесэ телень чокшнетне марявить седе кувакакс. Нина Ивановна ламо иетнень лангс апак вано, пек вечки аштеме телевизоронть икеле. Передачатнень вечки эрьва кодат. Нина Ивановнань юбилеень чистэнть мелензэ кепедизе эштё вейке тувталось. Поздоровонь телеграмма получась мик Россиянь Президентэнть Владимир Путинэнь пельде. Эряви чарькодемс, велень ломантне аволь сеедьстэ сынст получакшныть. Нина Ивановнань ёжозо седеяк пек кепедевсь явозь мельденть.
Николай Евдокимов
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».