Пятница, марта 29, 2024
Важное

2022 иесь Россиясо яволявтозь Раськетнень культурань сюпавчинь ды искусствань иекс. Ды неть сюпавчитнень эрьва раськесь вансты пингеде-пингес. Эдь виев ансяк се раськесь, конань ули историязо, культуразо, ванстовсть койтне-кирдатне ды конась бажи весементь кадомс сы поколениятненень.
Эряви меремс, меельце шкастонть те ёнкссонть улить покш эскелькст икелев ды ветяви домка важодема. Башка мель тенень явови минек республикасояк. Велетнесэ панжтневить раськень куншкакурот, витневить-вадрялгавтовить культурань кудотне, келейстэ ютавтовить раськень кенярксчитне. Тень коряс, минек ули меленек ёвтнемс районтнэнь культурань сюпавчитнеде, те ёнкссонть важодемадонть. Течи минь инжеть Ицялонь райононь «Центр культуры» МБУ-сонть, конась вейсэнди буень культурной весе учреждениятнень. Куронть прявтсо эрзянь мазый, превей, ёроков ды весемес дока авась Надежда Александровна БУЯНОВА. Сонзэ марто покш кортамонок.

ВИЕВЧИСЬ ВЕЙСЭНЬ ВАЖОДЕМАСО


Ицялонь райононь Культурань куншкакуронть юрс совить 60 структурной подразделеният. Сынст ютксо райононь Культурань кудось, эйкакшонь искусствань школась, центральной библиотекась, краеведениянь музеесь, эйкакшонь библиотекась, велень библиотекатне, культурань кудотне, клубтне. Теде башка, тесэ зярыя ансамблят ды морамонь коллективть. Ютксост – «Вастома», «Любава», «Весёлые нотки» ансамблятне, «Здравица» народной коллективесь, «Возрождение» народной театрась, «Родные напевы» хорось ды «Медвежонок» театральной студиясь. Ды весе сынь важодить вейсэ, вейке-вейкенень лездазь.

– Минек виевчинек – вейсэнь важодемасонть. Ютксонок арасть кодаткак явновомат. Эдь весе тейтяно вейке тев, – ёвтни Надежда Буянова. – Улезэ кодамояк мероприятия, кодамояк покш чи, весементь вейсэ арсетяно, анокстатано, ютавттано. А мероприятиятнеде иензэ перть пек ламо. Нейгак вана иесь ансяк ушодовсь, уш кенеринек ютавтомс зярыя вастовомат. Аволь умок мероприятиянь цела цикла алтынек Тиринь келень раськеютконь чинтень, конась тешкставсь февралень 21-це чистэ. Тедеде те кенярксчись тешкставсь седеяк келейстэ, эдь Россиянь Президентэнть В. В. Путинэнь мереманзо коряс 2022 иесь яволявтозь РФ-нь Раськетнень культурань сюпавчинь ды искусствань иекс. Ютавтозь мероприятиятнень аравтлувось: аволь ансяк невтемс сюпав ды мазый культуранок, келенек, истя жо вельмевтемс ломантнень седейсэ эсь раськеде содамочинь меленть.
Кода тешкстызе Надежда Буянова, прявт мероприятиятне ютасть Культурань куншкакуросо. Те иестэ кезовонть кувалма мероприятиятнес эйкакшт эзть нолдаво, секскак прявт инжекс кармасть Ицялонь педагогической колледжень студенттнэ ды велень эрицятне. Чинзэ перть сынст туртов важодсть выставкат, ютавтовсть мастер-класст, гайгсть эрзянь ды рузонь кельтнесэ морот, ульнесть вейке-вейке марто кортнемат. Лиякс меремс, инжетне прянек чопавтекшнесть тиринь раськень культурантень. Ды кода мерсь Надежда Александровна, те весемесь ульнесь аволь ансяк вейке чис, истямо важодема тесэ ютавтови свалшкане.

– Куншкакуронок эсь раськень койтнень-кирдатнень, келенть ды культуранть ванстомга важоди виевстэ. Ламо важодтяно сехте вишкине инжетнень – эйкакштнень марто, – тешксты Надежда Буянова. – Минек вейке зданиясо аштить Культурань кудось, эйкакшонь искусствань школась, центральной библиотекась, эйкакшонь библиотекась ды краеведениянь музеесь. Эйкакштнеде тей сакшныть ламо, секскак сынст туртов важодить зярыя эрьва кодат кужинеть, конатнесэ башка мель явови эрзянь раськень культурантень, койтненень-кирдатненень. Невтемга, авась эйкакшонзо эли покштятне-бабатне нуцькинест марто сыть библиотекав. Зярс покштне вешнить эрявикс книга, эйкакшонтень шканть мереви ютавтомс фойесэ важодиця ужинесэнть, конась самай алтави вишкинетнень туртов. Тесэ минек важодицятне лездыть мазылгавтомс някинетнень раськень оршамосо. Максовить рузонь, эрзянь ды мокшонь оршамосо някат. Эряви меремс, эйкакштне пек курок редить явовтыця ёнкстнэнь. Сынь свал кевкстнить, мекс эрзянь оршамосонть арасть пиже ды сэнь тюстнэ, а мокшонсесэнть улить. Истя жо парсте содыть, мейсэ явови рузонь оршамось эрзянсенть ды мокшонсенть эйстэ. Минь налксема вельде бажатано пачтямс эйкакштненень раськенек культуранть лиятнень эйстэ явовиксчинзэ.

Истя жо эйкакшонь библиотекасонть важоди «Познавая мир – познаем себя» пек паро кужо. Тесэ эйкакштнень марто теевить-анокставить эрьва кодат кедьёнкст, казнеть, пек сеедьстэ тейнить някинеть-ванстомат. Ды малав весемесь тееви раськень явовиксчи марто. Кужонть вети прявт библиотекаресь Ольга Владимировна Рябова. Сон прядызе Ицялонь педагогической училищань художественно-графической отделениянть ды пек вадрясто содасы эйкакштнень марто важодемань тевенть, машты кепедеме сынст меленть.

Надежда Буянова пачтясь, те иесь сынст туртов целанек пек сюпав эрьва кодамо мероприятиясо, ламо юбилеень тешкст. Январьстэ покш мероприятия алтавсь РСФСР-нь ды Мордовиянь заслуженной ды народной артистэнтень И. М. Яушевнень, мартонь 25-це чистэ тешкстави содавикс профессоронть, литературоведэнть Г. И. Горбуновонь юбилеезэ, июньстэ карми эрзянь сёрмадыцянть, сказительницанть Е. П. Кривошеевань юбилеезэ. Те неть ломантне, конат чачозь ды эрясть Ицялонь моданть лангсо. Покш мероприятият арсевить лиятнень лемскак.

Теде башка, апрельстэ тешкстави Эрзянь келень чись. Ицялонь Культурань куншкакуросо анокстамотне уш ушодовсть. Мероприятиятнень арсеви ютавтомс вейсэ средней специальной тонавтнемань учреждениятнень, школатнень ды эйдень кужотнень марто.

– Кода арсетяно-анокстатано неть мероприятиятнень? Важодить весе учреждениятне. Минек пек виев, кеме коллективенек, важодить весе кувать. Минь – райононь культурань куншкакуро. Важодтяно вейсэ, арсетяно вейсэ ды тейтянояк весементь вейсэ, – кемекстызе Надежда Буянова.

Эряви тешкстамс сеньгак, кезовонть шкастояк Ицялонь райононь культурань ёнкссонть важодицятнень туртов кодаткак стакачить арасельть. Кода мерсь Надежда Александровна, сынь аламодо ульнесть анокстазь теньс, Культурань куншкакуронть уш ульнесь эсензэ сайтэзэ, ульнесь лопазо ВКонтакте социальной сетьсэнть. Велень культурань кудотне ды библиотекатне истя жо куроксто ушодызь те ёнкссонть важодеманть – панжсть курот ВКонтактсо ды сеске кармасть ветямо онлайн-мероприятият. Эрьва важодицясь панжсь рубрика. Невтемакс: «Книгатне-юбиляртнэ», «Раськень сюпавчить», «Те чись историясо» ды лият.

– Неть рубрикатнесэ свалшкане максовить мельстуиця кулят, пачтямот. Пек вадрякс кармась «Вейке экспонатонть историясто» рубрикась, конась ёвтни эрьва кодамо кедьёнксто, кода сон тевс нолдавсь кезэрень шкатнестэ саезь течинь чис. Эйкакштне пек бажить содамс, кодамокс ульнесь, мертяно, утюгось. Ламот васенцеде марясть, што рубелесь – те утюг. Сынь арсесть, те музыкань инструмент. Мейле Интернетстэяк весе информациянть муизь тень коряс, – ёвтни Надежда Александровна.

НАЦИОНАЛЬНОЙ ПРОЕКТТНЭНЬ – ЭРЯМОС


Те иестэ «Культура» национальной проектэнть лувсо Ицялонь эйкакшонь искусствань школантень рамави музыкань од оборудования. Кода ёвтнесь Надежда Буянова, школась панжозель 1979 иестэ ды весе те шканть перть эзть рамавкшно музыкань од инструментт, лия эрявикс оборудования.
– Течинь чине школасонть тонавтнить 192 эйкакшт, сынст эйстэ 145 – предпрофессиональной программатнень коряс, 47 – общеобразовательной программатнень коряс, – корты Надежда Александровна. – Тонавтнемань программатне: хореография, народной инструментт, фортепиано, живопись, декоративно-прикладной творчества. Проектэнь коряс явозь 5 миллионт 556,2 тёжат целковойть. Сынст лангс рамавить пианинат, фортепиано, гитарат, домрат, баянт ды тонавтнемань туртов эрявикс пособият ды материалт.
Пек паро, ули национальной те проектэсь. Сон пек лезды эйкакштнень тонавтомасо. А эйкакштне – минек вандынь чинек.

ЭРЗЯНЬ КЕЛЕСЬ – ТИРИНЬ КЕЛЬ


Надежда Александровна Буянова чачсь-кассь Отяжбуень Аловелесэ. Школанть прядомадо мейле тонавтнесь М. Е. Евсевьев лемсэ сестэ эштё МГПИ-нь филологиянь факультетсэ («Филология, рузонь кель ды литература, эрзянь кель ды литература» специальностесь). 1996 иестэ эрямонь китне-янтнэ ветизь Ицялонь мода лангс. Ламо иень перть важодсь Ицялонь педагогической училищасо, тонавтсь од ломантнень. Мейле лиссь истя, сюлмавсь культуранть марто ды вана уш 11 ие топавты «Центр культуры» МБУ-нь прявтонь тевенть.

– Монь сельме икелень те шкас ашти се чись, кода молинь васенце классос, кода неия васенце тонавтыцям. Сестэ эстень меринь – ули мелем улемс тонавтыцякс, – ёвтни Надежда Буянова. – Ды те бажамонть топавтыя. Кадык ней седе пек сюлмавозян культуранть марто, ялатеке пек вечкса эсь тиринь келем. Ды те вечкемась кастови сеньсэ, мон сёрмадан 1-4-це класстнэнь туртов учебникть. Ней вана маласо шкастонть лисить 1-це классонь туртов «Букварь», «Ловномат-сёрмадомат», 2-це, 3-це ды 4-це класстнэнь туртов – «Эрзянь кель». Важодемась лангсост ветявсь кувать, ней учебниктне Московсот, экспертизасот. Истя жо теезь электронной учебникть. 1-це классонь туртов книгатне сёрмадозь вейсэ Ирина Ивановна Кочанова марто. Лиятнень анокстынь весе ськамон.

Зярдо минь кевкстинек Надежда Александровнань, косто весементь лангс муема шканть. Сон мерсь: эряви вечкемс сень, мезе теят. Эряви муемс эсь прянть.
– Вечкса эрзянь келенть, тиринь ёнксонть. Те вечкемась тень лезды. Мон прям алтыя эрзянь келентень ды тиринь культурантень. Ды карман тееме весементь, штобу сон эряволь, касоволь-виензаволь ды а ёмаволь, – кемекстызе Надежда Буянова.

Юлия ЕРЕМИНА
Фототне Эдуард Ретунскиень
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».