Четверг, марта 28, 2024
Важное

Отяжбуень краеведениянь музеесь панжозель 2003 иестэ. Сонзэ пурныцякс ды панжицякс ульнесть мирдть-нить Василий Иванович ды Татьяна Ивановна Гордеевтне. Сынь весе мелест ды виест путозь пурнасть васенце экспонаттнэнь.


Течи музейсэнть малав 4000 экспонатт. Эрьва ие тей сакшныть 4 700 ломанть. 2014 иестэ музеесь ютась од таркас – Раськень культурань ды ремеслань центрас. Экспозициясь ашти колмо залга.
«Этнографиянь залсо» невтевить ули-парот ды кедьёнкст, конат невтить XIX–XX пингетнень эрямонть: велень хозяйствань кезэрень кедьёнкст, сёвонень кедьгеть, оршамопельть, карсемапельть, кодамонь, викшнемань кедьёнкст. Тесэ жо мастерэнть-таксидермистэнть А.В. Карпинчикень важодемань коллекциязо.

«Воинской славань залсо» пурназь Васенце мировой, Ине Отечественной, Афганонь войнатнень, Чечнянь тюрематнесэ участниктнеде, Чернобылень АЭС-нь ликвидатортнэде сюпав материалт. Улить Отяжбуе ёнксонь Советской Союзонь 11 Геройде, тылэнь тружениктнеде материалт. Неть: фотографият, архивень документт, казнеть, фронтонь сёрмат. Истя жо невтевить оружиянь макетт, экспонатт, конатнень муизь тюремань таркатнестэ поисковиктне. Ули военной шкань коряс теезь ужине (уголок).

«История и современность» залсонть невтевить материалт, конат пачтить райононь организациятнень ды предприятиятнень эрьва кодамо шкань тевдест. Башка мель явови ломантненень, сынст эрямонтень, важодемасо изнявкстнэнень. Улить истят витринат: велень хозяйства, промышленность, потребительской кооперация, индивидуальной предпринимательства, образования, здравоохранения, культура ды спорт. Те залонь ве пелькссэнть ашти «Степан Эрьзя – скульптор мира» экспозиция, кона алтави ине скульпторонтень. Истя жо невтевить райононь артыцятнень, декоративно-прикладной творчествань мастертнэнь теевксэст.

Те залсонть свалшкань экспозициякс кармась СССР-нь шкантень алтазь ужинесь. Невтевить ютазь пингень 70-80-це иетне. Тесэ пурназь малав 100 экспонатт. Ванат сынст лангс ды прок понгат лия масторс. Саемга, ули КВН-49 телевизор, конань нолдасть 1949-1962 иетнестэ. Улить зярыя фотоаппаратт, грампластинкат, радиоприёмникть. Стенасо понгавтозь мазый ковёр. Улить оршамопельть, конатнесэ якасть покштянок-бабанок ды тетянок-аванок. Невтевить, кодат ярсамопельть ды симемапельть ульнесть се шкане. Тесэ жо ашти сеткине, конань марто якасть ломантне лавкав. Паргинесэ пурназь налкшкеть, истят, кодат уш а нолдыть неень шкане.

Тедедень кизна музеень панжицятне Гордеевтне мельга-мельцек тусть эрямосто. Сынст эйкакшост тетяст-аваст ледстнемга музеев макссть малав сядо экспонатт. Сынь муизь таркаст музеень экспозициясо. Тесэ Татьяна Ивановнань мирденень лисемань палязо (мирдть-нить вейсэ эрясть ведьгемень иеть), стамонь машинказо, эрзянь оршамосо някат-сувенирт.

Кода пачтясь Отяжбуень краеведениянь музеень прявтось Галина Михайловна Лебедева, материалонь ды экспонатонь пурнамось моли нейгак.

Татьяна Маторкина
Фототне: Э.Ретунский
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».