Пятница, марта 29, 2024
Важное

Московонь областень Королёв ошсо вана уш зярыя иеть важоди «Забота» кемгавксово иеде седе вишкине эйкакштнень туртов социально-реабилитационной центрась. Тесэ эйкакштнень марто ветяви покш робота, сынь свал невтить эсь ёрокчист эрьва кодамо фестивальтнесэ ды пелькстамотнесэ. 
Тень туртов эйкакштнень содавтыть тиринь ёнксонь культурань сюпавчинть, раськетнень койтнень-кирдатнень марто. Меельце вейксэ иетнень перть центрань эйкакштне эсь ёрокчист невтнить Великой Устюгсо ютавтовиця фестивальсэнть. Те мероприятиянтень эрьва ие кемекстави од тема. Сон ёвтавкшны таштамковсто. Сонзэ коряс эйкакштне топавтыть исследовательской робота ды анокстыть выставкань экспонатт. Меельце иетнестэ «Забота» СРЦН-нь эйкакштне панжсть ды тонавтнесть зярыя темат, конат сюлмавозь някатнень ды матрёшкатнень тееманть, раськень оршамопельтнень невтеманть марто. Уроктнень вети Королёв ошонь «Забота» СРЦН-нь тонавтыцясь, Нижней Новгород ёнксонь Лукоянов ошсо чачицясь, мокшавась Л.Н. Чумакова.

2015 иестэ саезь центрань тонавтницятне вейсэ педагогтнень марто ушодсть тонавтнеме «Красота и величие народного костюма» теманть. Прявтокс саезельть эрзятнень ды мокшотнень раськень оршамопельтне. 2016 иестэ фестивальсэнть невтевсь цёрань панарось. Седе тов роботась поладозель ды ушодовсь авань раськень костюмонть тонавтнемась.

Эрзятнень ды мокшотнень культуранть тонавтнемга ды оршамопельтнень явовиця ёнксост ванномга аволь умок Центранть содавтызь эрзя-мокшонь диаспорань невтицятне – Российской Федерациянь Президентэнть юрсо Мордовия Республикань Представительствань прявт специалистэсь Лидия Круглова ды эрзя-мокшонь диаспорань представителесь Наталья Кувезенкова.

Вастовомась лиссь пек лембекс ды мельстуицякс. Лидия Виссарионовна ёвтнесь эрзянь ды мокшонь раськетнеде, культурадонть, койтнеде-кирдатнеде, семиянь питнейчитнеде. Наталья Тимофеевна жо эйкакштнень содавтынзе раськень моротнень марто ды невтизе киштематнень мазычист.

Меельце кото иетнень перть центрань эйкакштне домкасто тонавтнизь эрзя-мокшонь оршамотнень эрьва тешксэнть. Тень туртов эйкакштне ульнесть эрьва кодамо мероприятиясо, конат алтавсть эрзянь ды мокшонь раськетнень культурантень. Эрьва ие эйкакштнень тердтнить «Шумбрат, Мордовия!» фестивалев, Мастянтень алтазь кенярксчис, ярмункатнес ды мастер-класстнэс.
Те иестэ «Рождественская мечта» фестивальсэ эйкакштне невтизь XIX-це пингень мокшавань оршамосо няканть.

Анокстызе Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».