Аволь умок "Одноклассники" социальной сетьсэнть понгсь тень эрзянь кельсэ "Парынзэлем" морось. Виев, гайтев ды седейс токиця мазый вайгельсэ морась сонзэ Людмила Макушкина. Тиринь веледе, чачома-касома ёнксто морось истя токизе седеем, арсинь теевемс содавиксэкс те эрзянь аванть марто ды ёвтнемс сонзэ ланга минек газетань ловныцятненень.
Сырнень эйкакшпора
Людмила Михайловна Макушкина (тейтерькс Богатова) чачсь-кассь Покш Березник ёнксонь Парынзэле эрзянь велесэнть. Михаил Герасимович ды Татьяна Васильевна Богатовтнень семиясь велесэнть ульнесь содавикс. Сынст ловсть велень интеллигенциякс. Богатовтнень семиясо кассть колмо эйкакшт –кавто церынькат ды Люда тейтерькась.
Михаил Герасимович ломанесь ульнесь превей, эрьва тевс дока ды ламос чарькодиця. Стака шкатнень ды а шожда эрямонть лангс апак вано школадо мейле тонавтнесь механизаторонь техникумсо, Высшей партийной школасо, прядсь университет, косо получакшнызе "Механизация сельского хозяйства –агрономия" специальностенть. Те тевентень алтызеяк весе эрямонзо. Ламо иень перть роботась колхозсо. Весть сонензэ пшкадсь Парынзэлень школань сестэнь прявтось Михаил Сергеевич Наумкин, сон энялдсь Михаил Герасимовичнень самс тонавтомо школав. Велентень эрявсть од механизаторт ды те тевентень тонавтоманть эрявсь ушодомс школасто.
–Тетям прядсь те специализациянть коряс университет ды содамочинзэ ульнесть, – корты Людмила Михайловна. – Школасо важодемань иетнень перть нолдась пек ламо тонавтницят, конат сюкпрянь лембе валт сонзэ лемс ёвтыть течинь чис.
Татьяна Васильевна авась истя жо превеель. Сонзэ чачома-касома ёнксозо - Чаунза буень Отрадное велесь. Тетязо чавовкшнось войнас, кавто сазоронзо кулость войнадо мейлень иетнестэ ды Татьяна Васильевна аванзо марто лиядокшность кавтонест. Войнадо мейлень иетнень стакачитне а ёвтавикст. Ансяк тейтеренть ульнесь пек покш мелезэ тонавтнемантень. Ды те меленть Татьяна Васильевна топавтызе. Сон прядсь культпросветучилища. Косто кучокшнызь роботамо эсест Чаунза ёнксонь Мичурина велев. Роботась тосо иешка ды поладызе тонавтнеманзо Темниковань педагогической училищасонть. Сонзэ прядомадо мейле мольсь тонавтнеме университетэв. Сынст курсось ульнесь виев ды ломантне ламот содавикст. Ютксост эрзянь сермадейтне П.А.Ключагин, Н.А.Кипайкина-Беззубова, А.У.Эскин.
– Сестэ эдь тонавтнеманть прядомадо мейле максыльть направления кинень ков молема роботамо, – ёвтни Людмила Макушкина. – Авань кучизь Покш Березникень Симкина велев, мейле Промзав. Тетям сестэ важодсь лесничествасо. Весть арды роботасто, икелензэ юты тейтерь – чова рунго, пек мазый. Лоткась, озавтызе. Пшкадсь тензэ рузкс. Арсесь, косто эрзянь велесэ истямо тейтерь, ансяк ошсто. Теевсть содавиксэкс, вечкевсть вейке-вейкенень ды зярыя шкань ютазь урьвакстсть. Авам кармась роботамо эсенек Парынзэлень школасо, зярыя шкань ютазь тетямгак.
Тетянь-авань коряс мон аштян покш каштанчисэ. Сынь монь тонавтымизь ансяк паронтень – паронь тееме, ломантненень паронть арсеме, весень вечкеме. Мон касынь вечкемасо ды ульнесь сырнень эйкакшпорам. Тетям ней уш арась, аванень 85 иеть. Эри эсенек велесэ. Сон монь туртов сехте малавикс ломанем, седей пелькскем.
Тетянь-авань киява
Людмила Михайловна нейсь тетянзо-аванзо роботанть ды уш вишка пингстэ кочкась эстензэ эрямонь тев – карми тонавтыцякс. Лиякс а кода. Богатовтнень раськесэ те тевенть марто сюлмавозь ульнесть малав весе. Михаил Герасимовичень лелянзо-сазоронзо весе роботасть школасо. Алексей Герасимович, Полина Герасимовна, Андрей Герасимович Богатовтне весе ульнесть тонавтыцякс. Андрей Герасимович Богатов армиявгак тусь школасто, косто понгсь фронтов ды мекев тиринь велев уш эзь велявто, чавовсь войнасо. Людмила Михайловна школадо мейле прядызе Н.П.Огарёв лемсэ МГУ-нь
филологиянь факультетэнть ды 30 ламо иеть алтась тонавтыцянь тевентень. Роботась эсь тиринь Парынзэлень школасонть, зярс сонзэ эзизь пекста.
– Нама, школанть пекстамодо кулясь монь туртов кармась покш сэредьксэкс. Мерят, седейстэнь лутасть панкс, нельгизь ойме пельксэм. Эдь школась монь туртов ульнесь тиринь кудокс, косо ютась эрямо пингень аволь вишкине пельксэсь. Важодема иетнень перть нолдынь колмо выпускт. Весе тонавтницян коряс аштян покш мельспаросо. Эрьвась муизь эрямосо эсь кинзэ, кармасть алкуксонь ломанекс, – тешксты Людмила Михайловна.
Теке марто, Л.М.Макушкина ёвты покш сюкпря эсь тонавтыцятненень, эрямонь виде килангс стявтыцятненень. Конатнень ютксо Евдокия Тихоновна Мазяркина, Анна Фёдоровна Паракшина, Александра Михайловна Ледяйкина ды ламот лият.
Моронть марто эрямованть
Морамонть Людмила Макушкина вечксы вишка пингстэ саезь. Вайгелезэ свал ульнесь виев, гайтев. Секскак школасо тонавтнемстэяк свал кочкилизь морамо, те тевенть эзь кадно тонавтыцякс важодемань иетнень пертькак. Морсесь эсь велень ансамблясояк, конась шкань ютазь кармась кандтнеме Людмила Михайловнань "Штырма лей" моронзо лементь. Стихень сермадомантькак ушодызе уш умок. Ды меельце иетнень перть стихтнеде-моротнеде пурнавсть уш зярыя альбомс.
– Аволь умок кода-бути вастыя эсь тонавтыцям Александр Адушкинэнь. Монь шкинемань ёнкстонть сон соды. Кортазевинек, сонзэ эрзянь морыцясь, продюсерэсь Бакич Видяй вадря оязо. Адя, корты, ардтанок тензэ, кадык кунсолосы морот. Мон васня отказынь, кодамо эйстэнь морыця. Аламо шкань ютазь таго тень сась ды кортымем. Ардынек Бакич Видяйнень, талнозь-пелезь "Парынзэлем" моронть сермадынек. Ну, арсян, сялдсамам ды ойман. А сон мери тень – алкуксонь эрзянь Кадышева. Ней вана превсэнь чарыть мельть-арсемат альбомонь нолдамодо. Сермадозь моротнень тематикась монь пек сюпав. Ламо алтавить тиринь велентень, весе содавикс ды малавикс, эйкакш порань вечкевикс таркатненень, малавикс ломантненень, тиринь Мордовиянтень. Покш бажамом теемс клип, кона алтави Валерий Богатов ялаксом туртов. Кемень иеде икеле лиссь покш зыян, сон тусь эрямостонть. Весень минек туртов те покш ёмавкс ды сэредькс, – кемексты Людмила Михайловна. Весе ушодкстнэсэ ды тевтнесэ Людмила Макушкинань васень лездыцянзо ды кемицянзо – семиязо. Мирдезэ Павел Александрович, тейтерезэ Анжелика, церазо Александр, урьвазо Елена ды нуцькинезэ Вероника – эрямонь смустензэ, седей пелькскензэ. Сынь максыть вийть шкинемантень ды кемевтить вандынь чинтень.
Юлия Еремина