Пятница, марта 29, 2024
Важное

Неть читнестэ 1941-1945 иетнень войнань ды трудонь подвигень мемориальной музейсэ ютавтовсь ледстнемань чокшне, конась алтавсь Мордовиясо чачозентень, Советской Союзонь Героентень, маршалонтень Сергей Фёдорович Ахромеевнень. Тедедень маень 5-це чистэ чачома чистэнзэ саезь тензэ топодсть 100 иеть.

Сергей Фёдорович Ахромеев чачсь Тамбовской губерниянь Спасской уездэнь Виндрей велесэ (ней – Мордовиянь Торбеевской районось). 1941 иестэ, 18 иесэ од цёрынькакс, ульнесь Ленинградонть кисэ аштемасонть, ранязель. Мейле тюрсь Сталинградонть кисэ. Войнанть прядызе капитанокс. 1945 иестэ прядызе Самоходной артиллериянь офицерской высшей школанть, 1952 иестэ – Бронетанковой войскатнень военной академиянть. 1982 иень маень 7-це чистэ сонензэ максозель Советской Союзонь Героень лемесь, 1983 иестэ – маршалонь лемесь. 1984-88 иетнестэ ульнесь Генеральной штабонь начальникекс ды СССР-нь Оборонань министрань васенце полавтыцякс. Сергей Фёдорович ульнесь Отечественной войнань I-це степенень орденэнь кавалерэкс, казезель Ленинэнь ниле ордентнэсэ, Якстере тештень кавто орденсэ, ламодояк ламо медальсэ ды омбо масторонь ордентнэсэ.

Героенть-Маршалонть юбилеентень мемориальной музеень важодицятне анокстасть вадря выставка, конась домкасто ёвтни Сергей Ахромеевень боевой ды эрямонь кидензэ. Тесэ пурназь ламо фотографият ды эрьва кодат документт. Музеень свалшкань экспозициясонть невтевить Сергей Ахромеевень ули-парозо, теке марто маршалонь фуражказо ды мундирэзэ. Весе неть экспонаттнэнь покш мельсэ ванкшнызь ветерантнэ ды Саранск ошонь школатнесэ тонавтницятне – Сергей Фёдоровичнень алтазь ледстнемань чокшнентень пурнавозтне.

– Сергей Фёдорович чачсь велесэнть, конась масторонтень казсь Советской Союзонь ниле Геройть, – пурнавозтненень пшкадемстэ тешкстызе МР-нь Государственной Собраниянь Председателень полавтыцясь Наталья Долматова. – Сергей Фёдорович ютась эрямонь стака ки, ульнесь пек превей ломанекс, алкуксонь стратегекс. Ды весе эрямонзо перть аштесь видечинть кисэ. Кода кортыль сонсь Героесь: «Сехте пек мон вечкса эсь масторонть».

Наталья Долматова кармавтсь од ломантненень саемс мельс-превс истят ломантнень аравтлувтнень.

– Советской полководецтнэнь ютксо минек землякось саи башка тарка, – тешкстызе МР-нь Прявтонь ды МР-нь Правительствань Администрациянь руководителень полавтыцясь – Внутренней политикань управлениянь прявтось Александр Ратников. – Сонзэ лемдсть советской армиянь совестекс. Те ульнесь алкуксонь ломань, конань лангсто саить пример масторонь ванстыцятнень од поколениятне.

– Сергей Ахромеев – вейкине Маршал, кона чачсь Мордовиясо, – тешкстызе МР-нь Ветерантнэнь советэнь ды комитетэнь председателесь Иван Цыганок. – Сон ульнесь алкуксонь патриотокс. Ды сонзэ эряви ладямс рядсек истят содавикс полководецтнэнь марто, кода Георгий Жуков ды Александр Василевский.

Сергей Ахромеевень лангсто примерэнь саемадо од ломантненень пшкадемстэ кортась МР-ва МВД-нь Общественной порядкань ванстомань управлениянь прявтонь полавтыцясь полициянь полковникесь Олег Коробков.

Седе, што Советской Союзонь Героенть Сергей Ахромеевень содыть ды ледстнить сонзэ тиринь ёнкссонть, ёвтнесь Торбеевань райононь администрациянь прявтонь социальной кевкстематнень коряс полавтыцясь Николай Киреев.

Ахромеев Маршалонть марто эсь вастовомадонть ёвтнесь МР-нь Правительстванть юрсо гуманитарной наукатнень НИИ-нь прявтонь полавтыцясь, Эрзянь-мокшонь раськень регионъютконь общественной вейсэндявксонь председателесь, профессорось, исторической наукань кандидатось Юрий Мишанин.

– Стака шкатнестэ Сергей Ахромеев ульнесь сеть аламотнень ютксо, кить панжадо кортыльть эсь масторонь стакачитнеде, – тешкстызе 30-це № школань тонавтыцясь, исторической наукань кандидатось Наталья Кирсанова. – Сонзэ эрямосо ульнесть ламо стакачить. Ансяк эсь эрямос Героесь совавтызе прявт кемекстамонть: «Васняяк арсек мастордонть, мейле – эсь прядонть».

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».