Четверг, марта 28, 2024
Важное

Неть читнестэ Л. П. Кирюков лемсэ Саранскоень музыкальной училищасо ютась МР-нь Культурань, раськень политикань ды архивень тевень министерствань коллегия. Промксонтень сакшность культурань учреждениянь прявттнэ ды ветицятне, аволь коммерческой вейсэндявксонь прявттнэ, те ёнкссонть важодицятне.

Седе, мезе теезель ютазь иень перть ды мезе арсеви топавтомс 2022 иестэ, пачтясь МР-нь Культурань, раськень политикань ды архивень тевень министрась С. Н. БАУЛИНА.

– 2021 иестэ, эпидемиологиянь вешематнень кирдезь, ютавтынек зярыя фестивальть: Темниковасо театрань кизэнь фестиваленть, «Эрьзя фест» искусствань, рузонь драмань театратнень «Соотечественники», раськень творчествань «Шумбрат, Мордовия!», джазонь музыкань фестивальтнень. Седеяк покш тевть минек учить 2022 иестэ. Регионсо ушодови этнокультурной брендированиясь. Тень коряс кемекстазь раськень кенярксчитнень ды фестивальтнень календарь. Саемга, «Сырнень ал» этнофестивалесь, «Орозбиень кемть», «Тавлань налкшке», Мордовиясо Петербургонь читне, июлень 1-2-це читнестэ – Лямбирень райононь Аксёнова велесэ Весероссиянь велень Сабантуесь. Лия лувсо арсеви ютавтомс «Шумбрат, Мордовия!» раськень творчествань фестиваленть, сонзэ темась – «Шумбрат, Мордовия! – стартап для молодёжи!».

Республикасонок нилеце ие совавтови эрямос «Культура» национальной проектэсь. Сонзэ вельде кепедеви велень культурань эрямось, панжовить культурань од кудот ды витневить-петневить таштотне. «Культурная среда», «Творческие люди» проекттнэнь коряс 2019-2021 иетнестэ явозельть 742 миллиондо ламо целковойть. Весе сынь ютавтозь паро тевс. Меельце колмо иетнень перть «Культура» проектэнть вельде теезь ламо: витнезь-петнезь культурань кевейкее кудо, сынст ютксо вейксэ – велетнесэ. Прядовсь Рузаевкасо А. В. Ухтомский лемсэ культурань центрань покш витнемась. Карминек паролгавтомо эйкакшонь искусствань школатнень, тов рамавить од седямопельть. Мельспаросо аштетяно модельной кавксо библиотекатнень коряс. Нацпроектэнть вельде минек улить виртуальной кавто кинозалт, весемезэ кемень кинозалт, – кортась Светлана Никитовна.

Паролгавтовить культурань кудотне ды эйкакшонь
искусствань школатне

Тедеде культурань кудотнень витнемась поладови. Арсеви шкастонзо витнемс-петнемс культурань кото кудот. Весе сынь аштить районтнэсэ.
Теде башка, витневить Сыре Шайговань эйкакшонь искусствань школась, Республикань эйкакшонь музыкальной школась-интернатось. Од оборудования ускить Покш Березникбуень, Ицялбуень, Ромодановань ды Сыре Шайговань райононь музыкальной школатнес. Истя жо панжовить модельной колмо библиотекат – Кочкуровасо, Рузаевкасо ды Сыре Шайговасо.

– Кадык культурань кудотне кармить эрьва кодамо иесэ ломантнень туртов оймсемань, вастовомань, лезэвстэ шкань ютавтомань таркакс. Течи эрицятнень пельде сакшныть ламо пеняцямот: велетнесэ арасть клубт, эли улить, ансяк сынь а панжтневить. Кодамояк важодема а ветяви. Истят тевть вастневить Орданьбуень, Темниковань, Атюрьевань, Дубёнкань, Кадошкинань, Ромодановань районтнэсэ. Зярыя культурань кудот улить ансяк конёв лангсо. Кой-кона таркатнесэ, косо панжинек клубт, арасть специалистт, а пурнавить киштемань эли морамонь коллективть, а ветявить кружокт. Эряви муемс ломанть, тонавтомс, кастомс квалификацияст. Культурань кудотненень эряви важодемс! 2022 иестэ саезь ушодтано ванномо (выездной аудит) клубтнень ды библиотекатнень, варштасынек, кить тосо важодить, мезе ломантне кортыть сынст важодемаст коряс, кодамо питне максыть, – яволявтсь министрась.

«Пушкин лемсэкартадонть»

2021 иень сентябрясто саезь минек масторсо кармась важодеме «Пушкин лемсэ картась». Культурань эрямосо те кармась покштояк покш тевекс. Од ломантне, кинень 14 иестэ саезь 22 иеть, «Пушкинэнь картанть» марто якить театрав, музеев, выставкав, концертэв. Картасонть ульнесть колмо тёжат целковойть. Январьстэ саезь – вете тёжат. «Пушкинэнь картась» кармась паро ушодксокс культурань учреждениятненень. Колмо ковтнень перть миезь 53 тёжат билетт. Те малав 18 млн целковойть. Рейтингень коряс, Мордовиясь ашти 18-це таркасо (Россиянь 85 регионтнэнь ютксо), 8-це таркасо Равчирень регионтнэнь ютксо (14 регионт). Министрась кармавтсь важодемс тень лангсо: од ломантнень туртов невтемс сень, мезе тенст вечкеви, мезесь алтави одтнэнь туртов (од ломанень контент). «Пушкинэнь картанть» марто кадык кармить седеяк ламо ваныцят.

Эрявить грантт

2021 иестэ грантонь лезкс максозель 41 проектэнтень (явовсть 99 млн целковойть). Изнямс грант – те ансяк вейке тев, сонзэ эряви совавтомс эрямос. Анокстамс педе-пес. Теезь тевденть ветямс отчёт. Неень шкане ламо эрьва кодамо фондт максыть грантт. Эряви вешемс, сёрмадомс, седе кеместэ ветямс грантонь тевенть.

Лезкс – кедьчелькев ломантненень

Покш мель явома народной художественной промыслатненень. Республикасонок теезь мастертнэнь реестра. Нама, течинь стака шкатнестэ эряви лездамс мастертнэнень. Эрявить ванстомс лия ёнов а молиця брендтнэнь. Паро улевель микшнемс сынст теевксэст Интернетсэ содавикс микшнемань таркатнесэ.

2022 ИЕНЬ ЧАЧОМАНЬ ДЫ ЛЕДСТНЕМАНЬ ЧИТНЕ

200 иеть народной художникентень И. К. Макаровнень
100 иеть эрзянь сказительницантень С. М. Люлякинанень
100 иеть композиторонтень Г. И. Сураевнень-Королёвнень
85 иеть государственной Рузонь драмань театрантень
90 иеть Правительстванть юрсо гуманитарной наукань НИИ-нтень
85 иеть МР-нь Центральной государственной архивентень

С. Н. Баулина пачтясь, 2021 иенть прядовомсто МР-нь Прявтонть кармавтоманзо коряс кемекстазель раськень культуранть ды кельтнень ванстомаст-виевгавтомаст коряс программа. Сонзэ вельде кемекставить кельтнень ды раськень культуранть ванстоманть кисэ национальной премият; ютавтови эрзянь ды мокшонь од ломантнень форум; раськень коллективтненень максовить грантт; Россиянь регионтнэсэ ютавтовить Мордовия Республикань Культурань чить; покш мель явови этнокультурной брендированиянтень. Те – од проект. Сонензэ явозь вете иеть. Районтнэс эряви лезкс инвестициятнень коряс. Саемга, минек улить таркань-таркань брендт, неть: Тавлань чувтонь налкшкесь, Теньгушевань семицветкась, Орозбиень кемтне, Теризморгань викшнемась. Секскак 2022 иестэ райононь культурань учреждениясо важодицятне ванносызь весе таркатнень, панжовить творческой лабораторият. Истямо ладсо муевить од брендт. Эсь ютковаст сынь пелькстыть, изницятне яволявтовить «Шумбрат, Мордовиясо!».

Кода муевить райононь брендтнэ, мезе лангс варштамс, тень коряс паро кортамо ветясь И. Д. Воронин лемсэ краеведениянь музеень научной тевень коряс прявтонь полавтыцясь Д. В. Фролов. Сон ёвтнесь республикань 22 районтнэде – сынст содавикс ломантнеде ды мазый таркатнеде. Кой-косо пароль вельмевтемс кезэрень кенярксчитнень, койтнень-кирдатнень.

Истя жо те промкссонть вал сайнесь Эрзянь ды мокшонь национальной театрань прявтось С. И. Дорогайкина. Сон ёвтнесь театрань изнявкстнэде ды стакачитнеде. Равчирень финнэнь-угрань раськень культурань центрань прявтось Е. О. Модина пачтинзе мелявксонзо народной творчестванть коряс, кода теемс истя, од ломантне явовольть сонензэ мель? Музеень маршрутонь паро ветямодонть ды Парынзэлесэ «Монь велем» проектэнть тевс нолдамодо кортась МР-нь Госсобраниянь депутатось, «Од веле» велетнень паролгавтомань общественной вейсэндявксонь ветицясь Е. Е. Ледяйкин.

2022 ИЕС МЕЛЬТНЕ-АРСЕМАТНЕ:
- паролгавтомс «Пушкин лемсэ картань» программанть, полавтомс сонзэ контентэнть;
- теемс проектэнь офист, сынст вельде анокстамс проектт, теемс грантт лангс яволявтомат;
- муниципальной музейтненень анокстамс инжетнень туртов интерактивной программат ды турагентстватнень туртов башка программат;
- вейсэндямс Мордовиянь библиотекатнень библиотечно-информационной вейкине таркас;
- сентябрясто Саранскоень Л. П. Кирюков лемсэ музыкальной училищасо панжови креативной индустриянь школа – кото студият: электронной музыкань, дизайнэнь, фото-видеонь теемань, интерактивной технологиянь, анимациянь ды 3D графикань, звукорежиссурань ды звуковой дизайнэнь. Эрьва студиясонть кармить тонавтнеме кемень ломанть. Иест – 10 саезь 23 иес. Тонавтнемась кавто иеть. Тонавтницятнень пурнамо ушодыть майстэ;
- райононь культурань кудотнесэ панжовить творческой лабораторият;
- «Шумбрат, Мордовия!» раськень творчествань фестивальсэ ютавтомс брендэнь фестиваль;
- «Мордовиянь культурань волонтёрт» ресурсной центрась яволявты «Лучшие волонтёрские практики. Культурные этнобренды Мордовии» фестиваль-пелькстамо ды «Мордовия – 13 добрых дел» республикань акция.

Татьяна МАТОРКИНА
Фототне Николай Карановонь
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».