Четверг, марта 28, 2024
Важное

Эрзянь ды мокшонь раськень культурань музейсэ панжовсь «Калейдоскоп талантов» выставка. Тесэ эсь важодемаст невтить минек республикань эйкакшонь художественной школань ды искусствань школань тонавтыцятне. Те невтемась ютавтови республикань фестивалень-пелькстамонть лувсо, сон эрси кавто иес весть.



Выставкасонть пряст невтить 93 тонавтыцят. Кодат ансяк произведеният сынь эзть анокста! Варчнить виест эрьва кодамо техникасо, важодить ламо материал марто. Сельмс каяви живописень пельксэсь. Тесэ улить портретт, пейзажт, натюрмортт. Зяро эйсэст лембе, валдо, кеняркс!
Декоративно-прикладной искусстванть пельксэнть невтевить батик техникасо теезь важодематне, саемга, улить паннот.

Кой-кона автортнэ анокстасть эрзянь ды мокшонь викшневкстнэнь-тешкстнэнь марто произведеният (стазь-викшнезь оршамопельть, нардамот, паннот, столь ланга ацавкст, човалясто викшневкст).
Выставкань панжомсто лембе валт ёвтасть МР-нь Культурань, раськень политикань ды архивень тевень министрань полавтыцясь Н. В. Бычков, Эрзянь ды мокшонь раськень культурань музеень прявтось Н. П. Баулина, А. С. Пушкин лемсэ библиотекань культурань ды искусствань важодицятнень квалификацияст кастомань отделэнь ветицясь Л. П. Сперанская, фестивалень-пелькстамонь жюринь прявтось, Эрзянь ды мокшонь раськень культурань музеень старшей научной сотрудникесь В. Н. Захарина.

Валентина Александровна Бедина 35 иеть важоди Чамзинкань эйкакшонь искусствань школасо. Чачсь сон Сибирьсэ. Тонавтнесь Саранскоень Ф. В. Сычков лемсэ художественной училищасо, прядызе М. Е. Евсевьев лемсэ МГПИ-нть (тонавтнесь В. А. Варданянонь кедьсэ). 34 иеть роботась Чамзинкань искусствань школань прявтокс. Ней тосо важоди тонавтыцякс. Вети живопись ды керамика.

– Ней седе ули шкам творчествантень. Ламо мелень-бажамон, мезе теемс, стамбарнэ сынст топавтан. Эйкакштнеяк лездыть тень, ёвтыть мелест, монгак тенст пачтян эсь арсеман. Минь лисинек изницякс «Рождественская звезда» зональной 4-це конкурссо. Теинек керамикасто коллективной важодемат. Саинек Гран-при. Ней анокстатано «Благовест» зональной пелькстамонтень. Сы иестэ сон карми республикань конкурсокс. Эйкакшонь искусствань минек школанть ниле зданиянзо. Тесэ тонавтнить 474 эйкакшт. Раминек музыкальной инструментт ды ламо лия оборудования, – кортась В. А. Бедина.

Валентина Ивановна Миркискина истя жо важоди Чамзинкань искусствань школасо ИЗО-нь тонавтыцякс. Чачсь сон Покш Маризьвелесэ. Школанть прядомадо мейле тонавтнесь Ицялонь педагогической училищасо. Теде мейле – Чувашиянь государственной педагогической институтсо художественно-графической факультетсэ. Васня важодсь Краснослободскоень райононь, Покш Березникбуень школатнесэ. Комсте ламо иеть – Чамзинкань искусствань школасо. Валонзо коряс, дипломонь важодеманзо ульнесть портретт. Неень шкане яви покш мель натюрмортонтень. Выставкасонть невтеви сонзэ «Кшить» картиназо. В. И. Миркинскинань тонавтницятнеяк невтить пряст творческой пелькстамотнесэ, саить изнямонь таркат. «Выставкась пек мазый, важодематне виевть. Аштян мельспаросо коллегатнень кисэ, сынь тонавтыть эйкакшт, муить шка эсь творчествантеньгак», – кортась авась.

Яволявтовсть «Калейдоскоп талантов» 7-це фестивалень конкурсонь изницятнень лемест. Кода пачтясь жюринь прявтось В. Н. Захарина, эрьва артыцясь путсь вийть, весе седейсэ важодсь. Произведениятне парт, виевть. Ансяк ризнэвти, кой-кить таго кучизь секеть важодематнень, конатнень невтизь ютазь пелькстамотнесэ, конат сайнесть изнямонь таркат.

Истя жо тей сакшность музыкальной ды искусствань школань тонавтницятне. Сынь невтсть концерт.

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».