Пятница, марта 29, 2024
Важное

«Сюк, сюк, ковава», «Пайгонят», «Веле, веле, велине», «Молитва», «Кудат», «Лайме порась» – неть моротнень асодыцяст Мордовиясо арасть. Сынст морыцясь – Россиянь ды Мордовиянь заслуженной артисткась, Государственной премиянь лауреатось, народной артисткась Нина Маркова.
Нина Васильевна – аволь ансяк морыця, сон эсь моротнес музыкань ды стихень сёрмадыця. Истя жо стихтнень автортнэнь ютксо Сергей Киякин, Николай Мокшин, А. Скопцов, Владимир Нестеров ды лият. Ютазь пецясто Нина Маркова, конань вечксызь минек ёнксонь весе эрицятне, Республикань Культурань кудонь сценанть лангсо тешкстынзе творческой кинзэ 45 иетнень.

Тесэ ютась «Эрямом монь – моро» концертэсь, косо морась аволь ансяк сонсь, истя жо Мордовиянь филармониянь артисттнэ. Неть: «Девчата», «Земляки», Андрей Бочканов, Евгения, Карина ды Александр Сергеевтне, Олеся, Маруся ды Владимир Фоминтнэ, Светлана Лапицкая, Инна Учватова, Вячеслав Зобков. Сынь мельспаросо гайгстызь Марковань содавикс моронзо. Эряви тешкстамс Оксана Вишнякованьгак, концертэнь режиссёронть, кона путызе оймензэ ды покш профессионализманзо, штобу сон ютаволь вейке лексемасо.
Васенцекс Нина Васильевна морызе моронть тиринь Промзина (Зубова Полянань район) веледензэ. Тесэ васенцеде гайгезевсь морыцянть вайгелезэ 65 иеде теде икеле. А зярыя иень ютазь сонзэ уш кунсолость аволь ансяк мокшонь ёнкссо – Камчаткасто саезь Прибалтикас, лембе ёнкстнэстэ саезь пелевеёнксонь модатнес. Од морыцясь яксесь гастролев Германияв, Польшав, Венгрияв, Эстонияв… Ансяк те весе седе тов, васняяк ульнесь тонавтнема Орданьбуень культурно-просветительной училищасо, косо Нина Маркова пурнась содамочить ськамонзо морамонь коряс Н. И. Ишунинань пельде. 1982-83 иетнестэ Московсо ютась курсат раськень моронь морамонь коряс эстрадань искусствань мастерскойсэ Н. С. Чубенконь кедьсэ. 1985 иестэ сон морсесь од ломанень ды студентэнь масторлангонь 12-це фестивалень концерттнэсэ. 1986 иестэ Московсо моронь ды киштемань ансамблятнень Весероссиянь конкурссо «Умарина» раськень моронть кисэ казезель Дипломсо.

Теде мейле Нина Васильевна мекев велявтсь Мордовияв. Кемень иеть ульнесь Мордовиянь «Умарина» государственной ансамблянь солисткакс, 1987 иестэ саезь сон роботы республикань филармониясо. Нина Васильевнань пек ламо вечкицянзо-кунсолыцянзо, конатне зярдояк а кадносызь сонзэ цецявтомо ды виев, лембе цяпамовтомо. Кода корты сонсь морыцясь, сынь кирдитькак эйсэнзэ сцена лангсо, максыть эрямонь ды творчествань вийть, од моротнес бажамо. Ды те концертсэнтькак таго «браво» сееремат, вейсэнь морамот, виев цяпамот… Сценанть лангс секе-тев кандсть цецянь пусмот, кой-кона вечкицянзо саекшнесть вал ды ледстнесть се шканть, зярдо Нина Маркова ардтнесь гастрольга республикань весе велетнева, урожаень урядамо шкасто паксятнева ды кодашка мельспаро ульнесь ваныцятненень. А сонсь Нина Маркова, кода свал, дивавтсь виев вайгельсэнзэ, мазый уставсонзо, цивтёрдыця оршамопельсэнзэ ды сцена лангсо прянзо ветямосонзо. Алкуксонь эстрадань инязорава, кода мерсь РФ-нь Федерациянь Советэнь сенаторось Пётр Тултаев. Мордовиянь Культурань, национальной политикань ды архивень тевень министрась Светлана Баулина казсь Нина Маркованень сертификат од сценической платиянь рамамонть туртов. Морыцясь ёвтась мель ставтомс эрзянь раськень оршамопель, эдь мокшонсесь сонзэ уш ули.

Валентина ДЫДЫКИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».