Четверг, марта 28, 2024
Важное

Тунда ансяк кенери ловось соламо, кода велень эйкакштне капшить чийнеме лейга-латкова, пандо прява, тува, косо эште эзь лисе луганарось, ансяк коськсь модась. Ялганек, вейке песэ эриця эйкакштне чинь-чоп налксить ушосо, лембе чинть ало. Пидить модамарть, ярсыть, арсить пелькстамот ды налксемат. Сынст ютксо Вераяк.


Чачсь сон Орданьбуе ёнксонь Орозбие велесэ. Семияст покшоль: тетязо-авазо, кавксо эйкакшост ды покштяст-бабаст. Сестэ эрьва кудосо ульнесть ламо эйкакшт. Кияк эзь аште тевтеме, весе важодсть. Вана Вераяк эль кенерсь прядомо школанзо, тусь васов роботамо.

– Сеть шкатнестэ велень од тейтертне тукшныльть Ростов ёнов кизэ-сёксь лангс важодеме. Миньгак Надя Вдовина ялгам марто 8-це классонть прядомадо мейле сыргинек, мартонок эштё кавто ялганок, сынь корязонок покшт, прядсть 10-це класс. Ниленек ардынек поездсэ. Карминек важодеме Ростов ёнксонь Виноградный поселкасо. Эринек общежитиясо, ярсынек столовойсэ. Сестэ весемесь аволь питнеель, арбузонь килось ансяк 3 трёшникть. Пек ламо эрьва кодат фруктат. Монень тосо макссть трудовой книжка, 16 иеть тень арасельть, пандыльть кода вишка иесэ роботыцянень. Стакаль-а стакаль роботамс? Васняяк стака, мейле тонадовсь. Тосо карминек якамо виноград мельга: керсинек тарадтнэнь, кочкинек зыянов тикшенть, сюлмсинек лозатнень. Сехте питней ульнесь керсемась. Весементь теинек нормань коряс. Сёксня пурнынек кенерезь виноградонть. Мейле теле лангс таго куракшонть керсесак, партнэнь колмо-ниле лозатнень кадсыть. Трактор юты – вельтясынзе ундокстнэнь мода потс. Тунда тракторось юты ды моданть сравтсы одс, лисить лангс корёнтнэ, –ледстни Вера Андреевна.

Сестэ важодеманзо кисэ сонензэ пандсть 220 целковоень покшолмасо премия. Покшольть ярмактне. Мольсть 1970-це иетне. Велесэ кудост ансяк стявтозель. Неть ярмактнень лангс рамасть столь, диван, од тейтересь рамась эстензэ пальто ды карсемапельть.

Теде мейле Вера нилешка иеть яксесьве енов важодеме. Воронежсэ урядась якстерькай. Сайнизе мартонзо сазоронзояк. Пурнасть куярт-помидорт. Эмежень паксянть пезэяк а неяви. Чинь-чоп кочкасть ящикс, чокшне кепсесть машинас. Вера лиятнень коряс сехте эрязасто важодсь, куроксто ды парсте, топавтыль кавто нормат. Якстерькай лангсо важодеманть кисэ макснесть сахар, эмежень совхозсо – тонна товзюро. Кудов кучнесь чиньжарамот, костязь оргат.

1975 иестэ 19 иесэ Вера лиссь мирденень. Николай Уряднов – эсест велень цёрась. Сон тонавтнесь Ицялбуень Кемлянь велень хозяйствань техникумсо. Васня эрясть Орозбиесэ. Чачсь Марина тейтернест. Мейле тусть эрямо теке райононь Октябрьский посёлкав, косо ульнесь «Волна революции» совхоз. Тесэ мирдезэ роботась агрономокс. Макссть тенст кавто нупальс квартира. Мейле чачсть кавтаськетне-цёрынетне: Алексей ды Евгений. Кевень кудосонть эйдетне сеедьстэ сэрелесть экшендямонь ормасо. Мерсть полавтомс кудост. Колмо иень ютазь макссть мода лангсо чувтонь кудо, сонзэ покшолгавтызь, тейсть пристрой.

Вера Андреевна васня роботась стройцехсэ, мейле весовщицакс, седе тов ламо иень перть совхозонь столовойсэ повароль. Столовоенть пекстамодо мейле тердизь эйдень кужов поварокс. Сынь содасть, те аванть пидевксэнзэ-паневксэнзэ тантейть. Маряви, машты пидеме ды анокстамо эрьва мезенть! Сон нейгак эрьва совиця инженть терди столь экшс ды кавани.

1998 иестэ апак учне сась кажо: кулось мирдезэ. Сонензэ ульнесть ансяк 48 иеть. Николай Иванович важодсь совхозсо агрономокс, управляющеекс, бригадирэкс. Вера Андреевна 42 иесэ кадовсь колмо эйкакш марто довакс. Се шкане колмонест студентэльть, тонавтнесть Саранскойсэ. Марина – Н.П.Огарёв лемсэ МГУ-нь мединститутонь 5-це курссо, цёратне – Лёша ды Женя – механикань ды энергетикань институтонь 3-це курссо. Авась ансяк сонсь соды, кода стакаль тензэ се шкастонть, зярдо кадовсь нежевтеме, лездыцявтомо. Мольсть стака 90-це иетне. Нама, сынь кирдсть скал, тувот, саразт, путнесть пире. Эдь колмо студенттнэнь эрявсть тонавтомс. Килангскак ламо эрявсть ярмакт ды эрямскак. Тетяст куломадо мейле пандсть тенст пенсия, тонавтнесть парсте, ульнесь стипендияст. Стакачитнень лангс апак вано, тонавтынзе эйкакштнень. Стявтынзе пильге лангс. 2000 иестэ сынь прядызь тонавтнемаст. Цёратне роботасть энергетикекс ды электрикекс. Алексей туекшнесь армияв.

Кода ней ледстни Вера Андреевна, эрямосост свал понгильть паро ломанть, конат лездасть мейсэ маштсть: кие тевсэ, кие валсо. Ламо лездасть малавиксэнзэ: сазортнэ ды ялакстнэ. Сон эзинзе стувто ды ёвты тенст сюкпрянь валт. Сюкпря Пазонтень, ютасть неть стака шкатне.

Теде башка, те авась кундась стамо. Весе ютко шканзо алтась тенень. Стамось оймавты ды а аштят тевтеме. Те тевенть сон вечкилизе эйкакшпингестэ саезь. Дивань тевть, стамо кияк эзизе тонавто. Тень лангс апак вано, кедезэ шожда. Пейдезь ледстни, кода стась Орозбие велень бригадирэнтень Елизавета Яковлевнанень сарафан. Те ульнесь васенце покш стамозо.

– Те шкас сельмень икеле ашти: Роштувадо эли Инечиде икеле авам яла стыль тенек палинеть. Пазаватнень икеле састыне палы лампадкась... Минь весе кузтяно каштлангс ды вантано, мельспаросо учотано кенярксчинть. Кода вечкилинь кенярксчинь каршо неть чокшнетнень! – ледстни Вера Андреевна.

Сынст посёлкань аватне сеедьстэ пшкалесть тензэ стамонь коряс. Сон эрьва мезть стась: кудова якамонь халатт, кизэнь палят, кенярксчив мазый палят, кофтат-юбкат, курткат, фуфайкат. Марина тейтерензэ туртов эрьва кодат оршамопельть, конатнень киньгак лангсто а вастылить ды а муят модной журналстояк. Те ней эрьва мезе микшнить, сестэ мезтькак арасельть. Ансяк бути коцт муят рамамс.

Ней Вера Андреевна эри ськамонзо. Сон – пенсиясо. Тейтерезэ семиянек эрить Московсо, сон важоди врачокс, топавтовсь эйкакшпингень сехте покш мелезэ. Вейке цёразо эри Орданьбуе ошсо, омбоцесь – теке посёлкасонть. Весе сынь а кадныть аваст. Свал сакшныть варштамонзо. Седеяк пек кецневтить нуцькатне: Софья ды Даниил.

Вера Андреевна – эрямонь вечкиця, лиянень паронь арсиця ды лездыця, сон а вечки нусмакалеме ды киненьгак а мери нолдамс пря, мезе бу аволь лисе. Кие аволь пшкаде, свал лезды, максы превть, оймавты. Секскак перьканзо свал ломанть. Эйкакшпингстэ саезь кирди ламо ялгат. Аволь умок сон тешкстызе чачома чинзэ. Арсетяно тензэ кеме шумбрачи, кувака эрямо, паро ёжо, уцяска!

Татьяна Маторкина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».