Четверг, марта 28, 2024
Важное

Ютазь иень ноябрянь 7-це чистэ топодсть 80 иеть Елена Андреевна Пурилкинанень. «Монь иетне – монь сюпавчим! – морась Вахтанг Кикабидзе. Эно мезесь, бути аволь эрязь иетне кадновить сюпавчикс сенень, кие эри кувака пинге?! Сюпав пинге, кона пештязь покш важодемасо, эрямонь стакачитнесэ-мелявкстнэсэ...

 

Елена Андреевна Пурилкина зярыя кементь иеть ульнесь хормейстерэкс И. М. Яушев лемсэ Мордовиянь музыкальной комедиянь театрасо, мезень кис кандтни «Мордовия Республикань искусствань заслуженной деятель» лементь.

Аволь пек ламо ломанть содыть, мейстэ пурнави-тееви хормейстерэнть важодемазо. Моненьгак педе-пев те а ёвтави? Вана хоронть икеле кедьсэнзэ ахоли ломань, те – дирижер. Сон улияк хормейстерэсь. Ансяк вана те хоронть эряви васняяк пурнамс, вейсэндямс, тень туртов важодемс весень мартояк, эрьванть мартояк. Те пек а шождыне ды аволь куроконь тев. Аламо пек парсте содамс музыкальной произведениянть. Мельсэ эряви кирдемс ломантнень обуцясткак, ризксэст-мелявксосткак, натой кудочинь тевесткак – иляст ризнэ морыцятне морамсто, арсевельть ансяк тевдест.

Аволь умок ульнинь оперань ды балетэнь театрасо, сцена лангсо налксесть «Травиатань». Монень спектаклядонть пачтясь Елена Андреевна, сон тердимимгак. Ансяк вана театрасо мартонзо вастовомс эзь саво. Спектаклядонть икелеяк, антрактсояк, прядовомстояк сон ульнесь «эсензэтнень» марто. Малав вете иеть уш, кода тусь театрастонть, хорсо морыцятне жо течис «эсензэ» ломанть. Ды истя карми улеме свал, зярс тосо морыть сеть, кинь марто сон эрясь ве уцяскасо-мельсэ.

А вана мекс ды кода сон кармась улеме хормейстерэкс? Косто весе саевсь?

Кельпрястон анок ливтямс: «Эрзянь чопода велестэ». Ансяк сеске витян эсь прям, те аволь виде. Содан: Кочкуровань райононь Семилей велесь, косо чачсь Елена Андреевна, малавгак арасель чопода велекс. Тува юты чугункань кись, тень кувалма велесь свал эрясь райцентрадонть седе парсте, а мезть уш кортамс лия велетнеде. Тесэ, лиятнень коряс, свал седе парсте аштесть тевтне культуранть ды тонавтнеманть коряскак.

Елена Андреевна чачсь-кассь покш кудораськесэ. Пурилкинтнэнь эйкакштнеде ульнесть вете цёрат ды ниле тейтерть. Покш патянть, Мария Андреевнань ды веженсь сазоронть, Елена Андреевнань ютксо 19 иеть.

Весе эйкакштне школав тонавтнеме сыргильть кото иесэ. А вана Мария Андреевна – натой вете иесэ тусь тонавтнеме. Ды а стяко. Кассь паро тонавтыцякс, важодсь Семилеень школасо, пурнась-тейсь тосо пародояк паро хор. Лена тонавтнесь патянзо кедьсэ, хоровгак сонензэ чийнесь. Пурилкинтнэ весе мазыйстэ морасть, маштсть парсте налксеме балалайкасо, лиясо мейсэ. Кода корты Елена Андреевна, те хоронть эйстэ ушодовськак сонзэ кись хормейстерэкс.

Сонензэ вал.

– Шабрань тейтерькась, ялгам, вейке иеде мондень седе покшоль. Сентябрянь 1-це чистэ сон сыргась школав тонавтнеме ды истя кольнезь ахолясь монень вальмалганок ютамсто – натой аварьгадынь, моньгак сась мелем молемс школав тонавтнеме. Авам тень корты: «Вана явавтса каштомонть ды ильтятан школав». Ансяк мон эзинь лотка авардемеде, прынь кияксос ды адя прясон вачкоеме. Авам седе курок оршнимим ды ветимим школав. Энялдсь тонавтыцянтень: «Инеськеть, саик! А сайсак, секень вант, прянзо кияксос порксасы». Авам, нать арсесь, мон а куватьс сынь школав, курок налкстан тов якамодонть… А мон кадовинь тонавтнеме. Ансяк вана тонавтнинь а пек парсте. Эзинь кенерькшне. Ветеце классо савсь тень ваномс вишка эйдеть лелянь кедьсэ. Сынст мельга-мельцек чачсть кавто эйкакшост. Ваныцякс эрявлинь, а вана кода тевень молить школасо – те киньгак эзь ризнэвте. Книгат монень кияк эзь рамсе, киновгак якамс ярмакт тень кияк эзь максне. Сехте беряньстэ тевень мольсть математикань коряс, пингень перть монь туртов математикась – стака тев. Васенце классо четвертень перть монь лиссть натой колмо предметэнь коряс кавтот.

Монськак эйкакшолинь, ансяк тевень ульнесть ламодояк ламо. Авам, Феодосия Ивановна (велесэ сонензэ мерсть Федося), важодсь вельсоветсэ курьерэкс. Мон аштинь вишка эйкакш мартояк, важодинь авань таркаскак. Натой удсинь вельсоветсэ. Веть сыль телефонограмма, ансяк ашолгады ушось, авам уш стявты эйсэнь: чийть тенень ды тенень, ёвтак: валске кадык молить партсобранияв. А монень эряви чиемс колмошка вайгельбеть… Ды истя чистэ-чис…

Теде башка, микшнинь модамарть. Ведрашка пирестэ тарган эли валган каськас, тосто пурнан ды чиезь чугункань ки лангов, станцияв, Ташкентэнь поездэнтень...

Тетям, Андрей Петрович, ёроковоль ломанесь, эрьва тевс маштовиль. Войнадо икеле сон ульнесь чугункань кинь станциясо столовоень прявтокс. Лелятне-патятне ёвтнильть: минек кудораськесь сестэ парсте эрясь. Се шкава весень кудост аволь покшольть. А вана тетям ушодсь покш кудонь стявтомо, кавто нупальсэ. Кенерсь стявтомс ансяк вейкенть – саизь фронтов. Тевс апак нолда виресь кадовсь кудо икеле – войнань перть авам уштызе сонзэ. Ансяк мезеяк а теят,  эдь мейсэяк эрявсь уштнемс каштомонть.

Зярдо тетям сась войнасто, сон кармась роботамо сельпосо экспедиторокс. Весть сыргась товар мельга Нижнеев. Тосто самсто машинась яжавсь. Шоферэсь тусь маласо велев удомо, тетям кадовсь товаронть ванстомо. Весь якшамоль, тетям пек кельмекшнесь ды ормалгадсь. Кармасть сэредеме тевелявонзо. Сон кулось 1947 иестэ, монень вете иетькак арасельть. Покш патям энялдсь райсобесэв максомс минек кудораськентень тетянь куломанзо кувалма пенсия. Вана те пенсиясь ды модарькатне идимизьгак вачочиде. 

Тетянь куломадо мейле лелянь саизь важодеме сельпов конюхокс. Тосо ульнесь лишме, конань кучизь районов фронтсто, косо сонзэ ранякшнызь. Ды вана весть лелям озавтымим те лишменть лангс. Эзь кенере мезеяк тееме – лишмесь сеск ношкстась таркастонзо. А содан, зярс эйсэнь ардтневтсь веленть келес. Эзинь тандадо, истя кеместэ кундынь чертнес – эзинь ёртово тензэ. Ансяк теде мейле ёмась мелем ойсемс лишме лангс ласте.

Монь марто а весть лиснесть истят вана тевть. Весть нешке пиресэ мекшть кайсевсть лангозон – идимим лелям, валнымим кельме ведьсэ, теде мейле мекштне кадымизь. Вейксэ класст прядокшнынь, авам кучимим Сура чирев комолянь кочкамо. Тосо пупимим гуй – ансяк вана эзинь куло, Пазось ванстымим. Ламо мезе ульнесь эрямосонть.

Монь зярдояк арасельть од оршамопелень: оршилинь сень, мезе кадновсь покштнеде мейле. Нина мондень колмо иеде седе покшоль, тонавтнесь седе парсте, школадо мейле мольсь тонавтнеме Саранскоев, университетэв. Нама, сонзэ эрявсь оршавтнемс седе парсте, книгат эрявсь тензэ рамсемс. Авам эйсэнзэ кудонь тевс пек эзь кармавтне – весе тевтне сатотсть монень. Ранаяк валске стявтылимим ямс модамарень ватксеме, кудонь урядамо-нардамо. Ды мон эрьва ков кенерилинь. Вельсоветсэяк важодинь авань таркас, хорсояк морсилинь... Эрзянь валморот парсте ловнылинь сцена лангсто. Те шкас неть валморотне превсэнь...

Шабранок ульнесть гармошкаст ды патефоност. Кода ушодыть морсеме – велень келес марявить. Мон вишкинестэ саезь кунсолынь Георг Отсонь, Клавдия Шульженконь, Федор Шаляпинэнь... Лемест се шкава а содылинь, а вана морост содылинь педе-пев. Свал морсилинь. Кавксоце классо тонавтнинь – велес ютавтсть радио. Радионь пачк чинь-чоп марявсть морот, валморот, спектаклят... Весе те пек тукшнось монь мельс, кодамо тевс эзинь кундсе – свал морсилинь...

Минек лелятне ульнесть эрьва тевсэ ёроковт, маштыльть эрьва мезень тееме. Ды вана весть сыненст тусть витнемс баян. Минек ульнесь балалайканок, конасонть весе маштсть седямо. Ансяк вана монь пек сэредильть сурон струнатнеде. Баянось пек тусь мелезэнь, тесэ плаштинеть – аволь струнат. Сеске карминь эйсэнзэ седямо.

Семилеень библиотекаресь ды клубонь прявтось вишкинестэ саезь  парсте содылимизь, эдь мон а лиснилинь вельсоветстэ, свал сельмест икеле эрсилинь. Сынь эзть пеле кадномс монь кедьс библиотекань ды клубонь панжоматненьгак. Вана Клавдия Тимофеевна путымим превс молемс школадо мейле тонавтнеме Ардатовань культпросветшколав, сонськак прядокшнызе сонзэ.

Истя теиньгак. А те академия! Патянь, Нинань, натой сельмензэ сявадсть монь лангс ванозь. Культпросветшколасо минек марто ютавтнесть занятият келень культуранть коряс, ульнесть сольфеджионь урокт, минь тонавтнинек седямо баянсо, пианинасо, гитарасо... Ульнесь киштемань кужо, тонавтнинек бальной киштемат, вальс, краковяк... Ошонь парксо эрьва чокшне седясь духовой оркестра, ды эрьва чокшне минь чийнилинек тов киштнеме.

 Культпросветшколасо покш мель явинь физкультурантень. Тень кис сюкпря васняяк ёвтан лелянь Виктор Андреевичень туртов. Сон школанть прядомадо мейле сеске мольсь Муранень школав физкультурань тонавтыцякс. Тельня эрьва недлячистэ сыль кудов сокссо. Истя монгак сонзэ марто стинь сокс лангс. Пельдензэ тонадынь леднеме винтовкасто, школасо тонавтнемстэ уш леднилинь пек парсте. Районсо изницякс ульнинь сокссо кирякстнемань, чийнемань, сэрьс ды кувалмос кирнявтнемань коряс. Минек кудосо ульнесть шахматт, весе маштылинек налксеме эйсэст. Зярдо молинь культпросветшколав, тонадынь налксеме столь лангсо тенниссэ, кавто иень ютазь ульнинь уш Мордовиянь чемпионкакс, лиснинь изницякс РСФСР-нь юго-восточной зонасо.

Физкультуранть кис сюкпря ёвтан школасо физкультурань коряс тонавтыцянтеньгак – Анна Андреевна Беззубованень. Сон покш мель путсь тевентень, ламос тонавтымизь. Свал тень кортыль: «Мольть тонавтнеме физкультурной институтов, касат покш спортсменкакс». Мон каршонзо мерилинь: «Арась, физкультурноев а молян, а маштан кольця лангсо ды брус лангсо важодеме».

Культпросветшколасо минек ульнесь истямо предмет – клубонь тев. Тенень эйсэнек тонавтсь Григорий Константинович Приставкин. Сон эрьва тевс монь саилимим, свал ульнинь ютавтневиця весе мероприятиятнень ветицякс. Монень тосо тонавтнемстэ пек пароль, весе содылимизь ды вечкилимизь, монгак весень вечкилинь. Мезть кортамс, мартон натой важодсь башка ломань, тонавтсь эйсэнь, кода седе парсте ловномс валморотнень. Культпросветшколасояк эрьва концертсэ ловнылинь валморот эрзянь кельсэ. Весть натой сакшность радиос сёрмадомон, кода ловнан валморот.

Омбоце курсонть прядомадо мейле молинь практикав Ардатовань райононь Низовка велев. Сынь тов баян марто. Мон куроксто тонадынь сонзэ эйсэ седямо, вечкилия баянонть. Тосо пурнынь хор, вейсэндинь эсень перька велень од ломантнень.

Минь ютавтнинек эрьва кодат пелькстамот. Эсень марто весе налксесть шахматсо, мон свал лисилинь изницякс. Шахматсо неень шкас налксян, эдь прянть туртов свал эряви макснемс важодема. Ней налксян Интернетсэ Кашпировский марто.

Культпросветшколань директорокс ульнесь Роман Савельевич Малкин. Те ульнесь пек паро прявт. А стяко мейле сонзэ путызь муздрамтеатрань директорокс. Саранскойде мейле, 1971 иестэ, Роман Савельевич тусь Ленинградов.

Роман Савельевич пароль ломанесь, пек мелявтсь минденек, тонавтыцятнеде.

Кода-бути весть школав сакшность «Эрзянь правда» газетасто, мейле тосо сёрмадсть мондень. Семилейсэ весе дивсить. Те кода истя? Тонавтнесь лавшосто, бандитка... Монень велесэ алкукс мерильть бандитка: вишкинестэ саезь изнилинь тюремстэ цёрынетнень. Ды вана тонавтыцятне дивсить, веленек дивсить: мон радиова валморот ловнан, газетасо эйстэдень сёрмадыть!

«Эрзянь правда» газетасонть сёрмадомадонть мейле тень макссть тарка общежитиясо. Тосо пек пароль эрямось. Весе ванькс, мазый. Роман Савельевич пек вансь тень мельга. Весть сон сась общежитияв, вастымим ды мери: «Молят Московов тонавтнеме!». Мон ёвтнинь теде кудосо. Нина патям мерсь тень: «Мезекс тонеть мекев тонавтнемс текенень?».

Сынь Ардатовав, кортан: «Роман Савельевич, а молян Московов, ярмаконок арасть».

Сестэ кучимим Саранскоень музыкальной интернатов тонавтыцякс, истя, келя, кармить улеме ярмакон седе тов тонавтнемс. Мон кенярдынь тенень. Саранскойстэ Семилеев таркась аволь васоло, вачодо а кулан, кудов карман ардтнеме. Ды важодема таркаськак паро. Ансяк зярс пачкодинь Саранскоев, те тарканть максызь лиянень. Ды тагояк тень лездась Роман Савельевич. Саранск куншкасо апак учо вастовинек, ёвтнинь тензэ, кода ашти тевесь. Сон ладсимим, кортась министерствасо ды кучимизь тонавтомо Ицялонь педучилищав.

Педучилищасо сеске молинь бухгалтерияв ды энялдынь максомс тень аванс. Меринь: монень эряви ардомс Саранскоев, ушодан тонавтнеме музыкальной училищань заочной отделениясо. Лездасть тень. Вана истя вете иеть важодинь Ицялонь педучилищасо ды теке шкастонть тонавтнинь Саранскоень музыкальной училищасо.

Мейле туинь Казанев, консерваториясо тонавтнеме. «Эрзянь правда» газетань редакциясь макссь тень конёв-направления – кода национальной кадранень. Текенень, монь ульнесь стажом, вете иеть важодинь педучилищасо.

Консерваторияв саимизь стакачивтеме. Весе, кить састь тов тонавтнеме, ансяк прядсть музыкальной училищат. Мон вана кенеринь улемс вете иеть тонавтыцякс, иеньгак лиятнень коряс седе ламольть, топодсть уш тень 23 иеть. Комиссиясь мельспаросо вастымим, путсть лемем каршо седе покш баллт. Экзаментнэньгак парсте максынь. Пейдемань тевть: историянь экзаменсэ колмоцеде понгсь тень теке кевкстемась: РСДРП-нь омбоце съездэсь. Монень путсть «вете». Историянть свал вечкилия ды содылия.

Казаньсэяк эзинь лотксе явомо покш мель физкультурантень ды спортонтень, пелькстынь сокссо ардтнемасо, столь лангонь тенниссэ. Тевень мольсть парсте. Ансяк вана колмоце курссо ормалгадынь. Васня мерсть – монь туберкулёз, куш учётс эзимизь путо. Общежитиясо тень макссть башка комната. Мон ютынь тонавтнеме заочной отделенияв, эзинь карма учнеме, зярдо весе ялгатне кармить эйстэнь орголеме. Орманть кувалма вейке ием ёмась. Кучнимизь санаторияв, кумыс симинь, лецявинь.

...Консерваториядо мейле сисем иеть тонавтынь Саранскоень музыкальной училищасо.

Михаил Иванович Фроловский ульнесь дирижёрокс музыкальной комедиянь театрасонть. Сон шнымим монь хормейстерэнь таркас. Теде икеле те таркасонть важодсь Виктор Александрович Кузин. Сон тусь ды театрантень эрявсь хормейстер. Истя вана сюлмавсь эрямом театранть марто. Васня пелилинь те тевденть. Тошнакалинь училищанть, тонавтницятнень кис, сентябрянь 1-це чистэ натой авардинь – истя покшоль мелем мекев тов велявтомс.

Васенце спектаклям ульнесь «Холопка». Пурназель покш хор. Пельиень перть пурнынь-вейсэндинь тевень содыця, паро вайгель марто ломантнень. Спектаклясь ютась вадрясто.

Аламонь-аламонь эрямоськак полавтовомо кармакшнось. Театрасо важодинь весемезэ 38 иеть. Мейле зярыя иеть ульнинь Государственной камерной хоронь художественной руководителекс.

1981 иестэ чачсь Костя цёрынем. Зярдо ёвтнинь цёрам туртов – бабазо ульнесь Брыжинская, сон саизе эстензэ бабанзо фамилиянть, ансяк седе гайтевстэ марявоманть кувалма фамилиястонть ёртызе «ы» букванть.

Вана истямо Елена Андреевнань ёвтнемазо.

Поладан тенень: Константин Бржинский тусь аванзо киява. Елена Андреевна вишкинестэ уш сайнилизе цёрыненть эсензэ марто театрав. Эйкакшось сеть шкатнестэ саезь вечкилизе театранть, сценанть, чарькодсь ды покш питне путсь морыцятненень. Касозь, мейле вейксэ иеть тонавтнесь музыкальной школасо, Саранскоень музыкальной училищасо пек парсте прядсь кавто отделеният: хоронь ды вокальной, теке шкасто морась, кода артист, музыкальной театрань  хорсонть. Мейле тагояк аванзо киява мольсь тонавтнеме Казанень консерваторияв. Ушодсь тонавтнеме дирижёронь факультетсэ, а уш омбоце курссо одов ушодсь тонавтнеме вокальной факультетсэ ды пек парсте прядызе сонзэ 2005 иестэ.  Сеске ушодсь тонавтнеме масторонь народной артистканть  Галина Павловна Вишневскаянь Оперной морамонь центрасонть.

Константин Бржинский ней «Геликон-опера» музыкальной театрань оперань морсиця, морси классической оператнень ветиця партиятнень, морась ламо масторонь покш сценатнень лангсо. Те тевентень тонавты од ломанть.

Елена Андреевнань кавто нуцьканзо: Давид ды Стефания.

Бути вейсэндямс весе иетнень, зяро важодить Елена Андреевнань малавикстнэ тонавтыцякс, пурнавить ветесядто ламо иеть. Мария Андреевна патязо пингензэ перть тонавтсь Семилеень эйкакштнень рузонь ды эрзянь кельтнень, рузонь ды эрзянь литературанть содамо, ульнесь школань хоронь теицякс ды прявтокс, вечкилизе раськензэ, моротнень, тонавтсь тенень весень. Просвещениянь министерствась тердтнесь сонзэ рецензентэкс эрзянь келень тонавтома книгатнень ванномо-ловномо. Теде башка, сон свал эрсиль комиссиятнесэ, косо ванновсь, кинень максомс тонавтнеманть прядомсто медальть. Тонавтыцякс ульнесь мирдезэ – Илья Андреевич Жидкин, тонавтыцякс кармасть улеме ниле эйкакшост, нуцькаст.

Виктор Андреевич Пурилкин 1949–1970 иетнестэ важодсь тонавтыцякс Мураньсэ ды Ташто Мурзасо, Благовещенск ошсо. 33 иеть важодсь тонавтыцякс Нина Андреевна Кипайкина, сон сёрмадсь пек превей ды паро учебникть.

Мордовиянь музыкальной театрасонть прявт хормейстерэкс Елена Андреевна Пурилкина важодсь 1976–1993 ды 2000–2018 иетнестэ. Сон анокстась истят оператнень, кода: «Травиата» ды «Аида», «Евгений Онегин» ды «Иоланта», «Русалка», «Царская невеста», «Кармен», «Чио-Чио-Сан», национальной музыкальной драматнень: «Литова», «Ветер с Понизовья», операнть-балетэнть «Невеста Грома», омбо масторонь ды эсенек композитортнэнь опереттатнень ды музыкальной комедиятнень: «Марица» ды «Принцесса цирка», «Прекрасная Елена», «Веселая вдова», «Граф Люксембург», «Цыганская любовь», «Доротея», «Холопка», «Летучая мышь», «Цыганский барон», «Повтори мою молодость», «Моя прекрасная леди», «Вольный ветер», «Серебряное озеро»...

1993–2000 иетнестэ кода Государственной камерной хоронь художественной руководитель морыцятнень марто анокстась Д. Палестрина, Д. Гастольди, Г. Перселл, И. Бах, Г. Гендель, В.Моцарт, Л. Бетховен, Д. Гершвин, А. Архангельский, А. Скрябин, Л. Гурилев, П. Чайковский, С. Рахманинов, Г. Свиридов, Л.Кирюков, Г. Павлов, Г. Сураев-Королев, Г.Вдовин, Н. Кошелева композитортнэнь 200 произведеният, теде башка, раськень морот рузонь ды мокшонь-эрзянь композитортнэнь обработкасо, ламо лия произведеният... Хоронть марто примась участия 600 концертсэ. Те а ёвтавияк кодамо покш тев, конань Елена Андреевна топавтсь свал вечкезь ды седейшкава.

Тамара Баргова

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».