Эрзянь раськенть культурань койтнесэ башка тарка саить сеть курмотне-кармотне, конатневтеме а содыльть эрямо лувост тейтерь-аватне. Неть: кодамонь-стамонь кедьёнкстнэ, штеретне, пряхатне, кодамонь стантнэ…
Ансяк сехте пек тейтертне мелявтыльть эсест эрямо парест кувалма, конась теевиль чувтонь керьстэ, ды эйзэнзэ оршамотне-карсематне пурнавильть мирде экшс лисемантень.
Сеедьстэ сон теевиль тейтеренть тетянзо эли лелянзо кедьсэ, кой-кона велетнесэ паренть одирьвантень рамсиль содамонть тетясь. Паренть покшолмась кортась одирьванть сюпавчиде. Покш паресь, нама, эйсэнзэ ламо оршамотнедеяк. Эрзянь тейтересь мирденень лисемстэ кандылинзе эйсэнзэ весе курмонзо-кармонзо, эдь атявтонь-ававтонь кудосо мейле чуросто тензэ рамавильть од оршамот-карсемат. Паренть яла теилизь пекшестэ, кортыть, сон седе кеме, а лазови ды чеертнеяк а порилизь, секскак тосо панартнэ-платиятне ванстовить ламо иеть.
Паренть лангс эрьва тейтересь теиль тешкст. Керсемапельсэ тешкстыльть паренть перька, сэрьга, теильть касмо (ёлочка), квадратт, ромбикть, чипай, кудонь тешкст. Учёнойтне мерить тенст сёрмат (письмена). Эрзянь семиятнень курмотнестэ-кармотнестэ эрямо паресь мазылгавтовиль сехте пек.
Ловови, те паренть марто тейтересь саилинзе аволь ансяк пулаензэ-панаронзо – тиринь кудодо ледстнеманзо, авань уцяскадо янксеманзо. Эрямо паресь свадьбасо налксесь покш талика, сонзэ пурнылизь пецясто, тейтеренть кашадо ярсамо чистэнть, ды ускилизь содамонть кудов. Тешкстама, цёранть кудосояк пурныльть ды озныльть оршамопель марто парь. Сыретне ледстнить, зярдо эрзятне сыргильть эрямо васов, те ульнесь ютазь пингень 30-це иетнестэ, сынь васняяк мартост пурнылизь парест. Эрямо партнень пек вечкилизь эйкакштнеяк, сынь ульнесть кекшнемнесэ налксемстэ кекшемань таркинекс. Паресь ульнесь сэрьс вейке метрадо ламо, келезэ – 80 сантиметрат, чувтонть эчкезэль – 1,5-2,5 сантиметрат, сон пекставиль «панжомасо» – чувтонь пелькссэ, конась чавовиль эскесэ. Зярдо панжомась яжавиль, пекстылизь стака кевсэ.
Эрзятнень кудосо эрямо парде башка ульнесть почтонь ды ямксонь кирдема, чапаксонь теема, оень пивтема, нешкень парть. Кой-кона велетнесэ сынь эштё вастневсть ютазь пингень 80-90-це иетнестэ, ней жо сынь невтевить музейсэ.
Раськень литературасо эрямо паресь вастневи сеедьстэ. Невтемакс, П.С. Кирилловонь «Литова» поэмасонть. Сехте содавикс «Масторава» эпоссонть, конань сёрмадызе А. М. Шаронов, эрямо парентень Сураля прявт героесь кекшнилизе килеень кептерьканзо.
Марина ДЕВЯТОВА