Светлана Николаевна Горбунова малав 40 иеть важодсь Чувашиянь Алатырень райононь Алтышева велень библиотекасо. Сонзэ пингстэ библиотекась лововсь районсонть вадрятнень ютксто вейкекс. Ды кадык ловнома кудось ламоксть полавтнизе тарканзо, ломантне пек вечксть сакшномо библиотекав. Тесэ свал паро мельсэ, чевте мизолкс марто весень вастсь те эрзянь авась. Самай сон пурнынзе велень аватнень ды мейле теевсь «Лейне» фольклорной ансамблясь. Аволь умок минь пачколинек Алтышевав ды теевинек содавиксэкс сонзэ марто.
Светлана Николаевна чачсь пек васоло, Приморской крайсэ. Тетязо военноель. Сон служась армиясо Камчаткасо, седе тов понгсь СССР-нь ды Китай марто границяс. Тюрсь японецтнэнь марто. Алтышевав отпусков самсто урьвакстсь ды саизе нинзэ тов. Светлана чачсь тосо.
– Мон вишкинелинь ды ялатеке кадовсь мельс, кода эринек военной ошкесэ. Тосо ульнесть ламо китаецт, раужо прят весе. Авам ды мон – тюжа черь марто. Сыненст те дивакс марявсь. Лавкасо свал каванясть эйсэнь конфеткасо ды пештесэ. 1953 иестэ сынек эрямо Алтышевав. Авам, Пелагея Филипповна Автаева, 40 иеть роботась школасо начальной классонь тонавтыцякс, – ледстни Светлана Горбунова.
Школань прядомадо мейле Светлана Николаевна мольсь тонавтнеме Цивильскоень культпросветучилищав библиотекарекс. 1970 иестэ саезь 2006 иес роботась Алтышевань библиотекасо.
– Библиотекам вадряль, покш, малав 100 кавонзазь метрат. Свал сакшныльть ламо ловныцят. Киякстнэва ацазельть паласт. Сеть шкатнестэ макснесть ярмакт тень лангс. Ломантне натой карсемапельтеме совильть. Эйкакштне масторо налксильть. Омбоце нупалесь алтавсь покш ловныцятненень. Ульнесть истят ловныцян, конат апак лотксе эсь ютковаст пелькстасть: кие седе курок сы книга мельга ды кие ловносы васенцекс. Саемга, максыльть мезеяк ловномс школань программань коряс. Те шкас вастовомсто ледстнетяно тень ды пейдтяно. Ламо эрьва кодат вастовомат ды кенярксчить ютавтынек вейсэ школанть марто библиотекасо, клубсо, колхозонь конторасо. Тонавтыцянь коллективесь эрясь покш ялгаксчисэ. Тетям ды мирдем эрьва мейсэ лездыльть тень библиотекань коряс, косо-мезенть витемс, полавтомс, – евтни авась.
1998 иестэ Светлана Николаевна панжсь «Эрзянь ава» клуб. Валонзо коряс, свал ульнесь мелезэ пурнамс велень аватнень, конат маштыть морамо ды киштеме. Вейсэ сынь ледстнесть-сермалесть моротнень, эрзянь койтнень, кодат икеле ульнесть велесэст. 2000 иестэ велень клубсо васенцеде ютавтсть Эрзянь культурань чи. Сестэ уш арсесть максомс группантень «Лейне» лементь. Шкань ютазь коллективесь кармась фольклорной ансамблякс. Аватне ставтсть эрзянь оршамопельть. Светлана Николаевна стась-кодась кемень пулайть. Теде башка, сермадсь веледенть моро – «Коряйкужо», самай истя икеле мерильть Алтышевантень. Моронть ламот лемдизь «Алтышевань вальсэкс» ды кармасть морсемензэ лия енксонь эрзятнеяк. Мезесь диваваты, Светлана Николаевна сонсь эзь морсе ансамблясонть, ульнесь жо паро организаторокс: косо кодамо концерт ютавтомс, кода пурнамс ломантнень. Теке марто, евтылизе мелензэ, зярдо морамсто марявсть кодаткак ильведевкст. Ламо иень перть парсте важодеманть кисэ казезь «Чувашиянь культурань заслуженной роботник» лемсэ.
– Ней «Лейнесэнть» кавксо морыцят. Аштян мельспаросо, поладыть паро тевенть! Ансамблясь кармась народноекс, – корты Светлана Николаевна.
Пенсияв туемадо икеле авантень савсь печтямс покш ризкс – библиотекась палсь, тувталось – ташто проводкась, палсть весе книгатнеяк. Библиотекантень макссть лия тарка эйдень кужосо. Книгат кармасть ускомо весе районстонть. Вейке иес пурнавсть малав кото тежат экземплярт! Сон од таркасонть ие роботась ды тусь пенсияв. Тевензэ поладызе Надежда Автаева, кона паро мельсэ вети ансамблянтькак.
Светлана Николаевнань вейке тейтерезэ, кавто нуцьканзо, конат тонавтнесть Саранскойсэ. Сон нейгак ютко шкасто вечки саеме кедезэнзэ книга.
Татьяна Маторкина