Пётр Першинэнь чувтосто теевксэнзэ содасызь аволь ансяк минек республикасо, сонзэ томбалеяк. Сынь сеедьстэ невтневить раськень шкинемань фестивальтнесэ ды кенярксчитнесэ. Эрьва теевксэсь невти кодамояк сюжет, панжи смустенть, ёвтни историянть, эйсэст парсте редявить раськень койтне-кирдатне.
Пётр Павлович Першин чачсь-кассь Ицялонь райононь Береговые Сыреси велесэ. Кавксо класстнэнь прядомадо мейле мольсь тонавтнеме Ицялонь педагогической училищав, тонавтнесь художественно-графической факультетсэ. Училищанть прядомадо мейле эсь тонавтнеманзо поладызе Мордовской государственной университетэнь омбо масторонь кельтнень факультетсэ. Ансяк вана эсь мелень коряс тевенть – чувто ланга керсеманть – эзизе стувтне, ды университетэнть прядомадо мейле важодсь аволь ансяк немецень келень тонавтыцякс, истя жо котьмась велень эйкакштнень марто ды тонавтсь сынст важодеме чувто марто, ветясь кружокт.
2010 иестэ Береговые Сыреси велень школасонть панжовсь эйкакшонь искусствань школань отделениясь, ды Пётр Павловичень туртов ушодовсь эрьва кодамо тевсэ сюпав эрямо: выставкат, фестивальть, пелькстамот, ве ёнга ардтнемат.
– Чувто ланга керсемась монь эрямозон совась вишка пингстэ саезь. Тетям вечкиль чувтонть марто озямо. Телень чокшнетнестэ яла меньгак налкшке теиль. Сонзэ лангс ванозь, ушодынь монгак. Паряк, тень коряс художественной ёнксонть кочкия. Васень образованиянть коряс мон рисованиянь ды черчениянь тонавтыця. Училищасо тонавтнемстэ минек ульнесь пек вадря тонавтыцянок Пётр Георгиевич Куманев. Сон роботась чувто марто, эйстэнзэ яла тейнесь эрьва мезть. Те тевесь кода-бути монь седейс совась, карминь варчнеме эсь вийтнень. Мейле школасо эйкакштнень марто карминь роботамо, ды уж зярыя кементь иеть вейке поколения омбоценть мельга тонавтан эйсэст. Васня тетяст тонавтынь, мейле сынст эйкакштнень, ней уш нуцькатнень. Чувто ланга керсемантень алтыя весе эрямом, – корты Пётр Першин.
Ды те алкукс истя. Эйкакштнень марто важодемантень Пётр Павлович алтась ниленьгеменде ламо иеть. Весе те шканть перть сон роботы тиринь велень школасо немецень келень тонавтыцякс ды теке шкастонть важоди эйкакштнень марто чувто ланга керсемань коряс.
Неть иетнень перть вейсэ эйкакштнень марто П.П. Першин ульнесь райононь, республикань ды регионъютконь ламо эрьва кодамо выставкатнесэ, фестивальтнесэ ды пелькстамотнесэ. Истятнэнь ютксо – «Шумбрат, Мордовия!» раськень творчествань республиканской фестивалесь, «Поёт село родное» эсь буень самодеятельной творчествань эрьва иень фестивалесь. Пётр Павлович ульнесь «Равось – ояксчинь лей» этнокультурной экспедициянь, «Велень озкс» республикань раськень кенярксчинь, «Эрзянь Лисьмапря» регионъютконь фестивалень участникекс.
– 2018 иестэ эйкакштнень марто ардтнинек Чебоксары ошов «Семицветик» фестивалев, косо карминек лауреатокс, – ёвтни Пётр Першин. – Минь свалшкань инжеть Нижегородской областень Починки, Шатки, Лукоянова велетнень кенярксчитнесэ. Нижегородской областень губернаторось сынст ёнкссонть раськень шкинеманть кастоманть-виевгавтоманть кисэ миненек максокшнось премияяк. Важодтяно интернет-платформань Весероссиянь выставкатнесэяк. Свал сайтяно таркат.
Пётр Першин пурнась выставочной роботатнень сюпав коллекция: «Вирява», «Мордовочка», «Серафим Саровский», «За Родину», «Сказки Пушкина» ды ламот лиятне. Роботатнень ютксо улить покш панноткак: «Александр Невский», «Пушкинское дерево сказок» ды лиятне. Кода тешксты Пётр Павлович, эйстэдест ламо.
Пётр Першинэнь, кода чувто ланга керсиця мастерэнть, явовтыця ёнксокс ашти се, што сон тевс нолды раськень ёнкстнэнь ды образтнэнь (Вирява, эрзява ды лият). Чувтосто мазый покш паннотненень меленть Пётр Павлович яви уш умок. Ансяк меельце иетнестэ сынь аламодо полавтовсть ды невтить цела произведеният. Пертьпельксэсь, историянь тевтне, раськень геройтнень образтнэ ды фольклоронь персонажтне кедьчелькевенть туртов аштить прявт темакс.
Паннотнеде башка Пётр Павловичень теевкстнэнь ютксо ярсамопелень керсемань туртов лазт, чакшт-вакант, пенчть-колгант, налкшкеть ды седе тов. Мазылгавтыть весе сынст аволь ансяк эрзянь раськень тешкстнэсэ, ламот роботатне молить ракша ды кодамояк касовкс ёнов. Невтемга, оршамонь ды лия кедьёнксонь понгавтомась-покш пря коршось. Зярдо эйзэнзэ мезеяк понгавтат, сон сёлмонзо кепеди верев, мерят, сырги ливтямо. Весе роботатне мазыйть, лия ёнов а молицят, эйсэст ули кодамо-бути вий, кона эйсэть мани-терди эсь масторов.
– Чувто ланга керсемась – тевесь а шожда, – тешксты Пётр Першин. – Парсте арсема эрьва теевксэнть. Кодамокс сон карми, кода теема. Эрьванть лангсо роботамс сави аволь аламо шкань перть, эдь керяма эрьва тешксэнть, латкиненть-губорькскенть. Зярдо жо роботась покш, котьмамс лангсонзо сави седеяк ламо. Ансяк те весемесь стувтови, зярдо роботась тееви ды сельметь икелев вельми алкуксонь мазычи. Мазычи, конантень тон путык ойметь, седейлембеть. Конась, кемеви, лияненьгак канды кеняркс.
Юлия Еремина