Пятница, марта 29, 2024
Важное

А. И. Полежаев лемсэ музеев сеедьстэ сакшныть кода покш ломанть, истя эйкакшт ды од ломанть. Музейга экскурсиядо башка тосо ютавтневить эрьва кодат вастовомат, конат алтазь эрьва кодамо покш читненень.
Неть читнестэ тосо ульнесь таго вейке истямо вастовома. Сон алтазель аватненень ды ютась «Авась ды поэзиясь» лем ало. Эйзэнзэ сакшность Саранск ошонь техникумсо тонавтницят. Инжекс тердезельть писательть, поэтт, музыкантт.

Вастовоманть ветясь сонзэ анокстыцясь – музеень научной сотрудникесь Г. С. Гребенцов. Геннадий Сергеевич весень васня теинзе содавиксэкс кавто выставкатнень марто, конатнесэ невтезельть книгат, фотот ды сеть аватнень портретэст, кить покш путовкс тейсть ды теить рузонь, эрзянь, мокшонь, татаронь литературатнень кемекстамост туртов. Ютксост вейкесь – эрзянь сёрмадеесь, Мордовиянь Писателень вейсэндявксонь прявтось Татьяна Мокшанова. Татьяна Петровна мусь шка самс те вастовомантень. Весе аватненень лембе валонь ёвтамодо мейле ловнось кавто валморот рузонь ды эрзянь кельтнесэ.
Мокшановань валонзо поладынзе «Чилисема» журналонь редакторось Елена Барцаева ды арсесь весе аватненень ванстомс ойме лембенть ды цидярдома виенть.

«Масторлангсонть арасть амазый ават» – эсензэ валморосо видькстась Мордовиянь заслуженной поэтэсь Сергей Белоключевский. Теке марто эсензэ кортамонзо поэтэсь ушодызе лия валморосто, конанень макссь «Рузонь овто» лем. Те валморонть, кона алтазь Донбассо неень шкасто молиця аладямотненень, сон, келя, сёрмадызе неть читнестэ.

Апак учонь казне тейсь весень туртов Торбеева буень Варжеляй велестэ гармониясо седицясь Дмитрий Пестов, конань тердтнизь «Россия!» телеканалсо «Привет, Андрей!» передачасо морамо. Те ульнесь январень 15-це чистэ. Тесэяк Дмитрий морась зярыя морот, конатнень ютксто ламотнень туртов валтнэнь сёрмадынзе сонсь.
«Сехте ванькс ды превей поэзиясь – те раськень поэзиясь, се поэзиясь, кона ютась ламо пингень пачк ды пачкодсь миненекак». Неть валтнэнь кемевтемакс ульнесь лавсень мороськак, кодат морсесть седикеле эсест эйдест, нуцькаст туртов аватне ды сырькайтне.
Вастовомась прядовсь пачалкседе каванямосо. Сынст, келя, панинзе Г. С. Гребенцовонь низэ.

Раиса ЩАНКИНА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».