«Оброченский» мясокомбинатось неень шкане содавикс аволь ансяк Мордовиянь, шабра регионтнэсэ эрицятнененьгак. Сон кандови республикань сывельстэ ярсамопелень анокстыця сехте умонь предприятиятнень юткс.
Васень продукциянть тесэ ушодсть нолдамо ютазь пингень 1958 иестэ. Неть кодгеменде ламо иетнень перть предприятиясонть полавтовсь ламось, а полавтовиксэкс кадовсь вейкесь – сывельстэ вадря ды тантей продукциянь нолдамось. Неень шкане мясокомбинатонть прявтсо Владимир Ильич Нужнов. Аволь умок минь содавтынек те предприятиянть. Кода ветяви важодемась течи, производствасо од ёнкстнэде ды тантей колбасатнень теемань технологиятнень салавачитнеде, миненек ёвтнесь «Мясокомбинат «Оброченский» ОАО-нь колбасань цехень мастерэсь Наталья Владимировна Лапшова.
Наталья Владимировна предприятиясонть важоди малав кемень иеть ды пек парсте содасы производствань весе лувонть.
– Сывельстэ ярсамопелень анокстыця комбинатов понгинь Н.П. Огарёв лемсэ МГУ-нь биотехнологиянь ды биологиянь факультетэнть прядомадо мейле. Те ульнесь 2012 иестэ, – ёвтни Наталья Лапшова. – Мон чачинь-касынь велесэ, тетям-авам весе эрямост алтызь велень хозяйствасо важодемантень. Ды мон кода-бути уш вишка пингстэ эстень кемекстыя – сюлмаса эрямом веленть марто. Секскак университетэнть прядомадо мейле важодема вешнинь эсенек Ицялонь районсто.
Содавикс ломань пельде карминь содамо: «Оброченский» мясокомбинатс эрявить важодицят. Истя сыньгак. Васняяк саимизь онкстыцякс (весовщикекс). Роботынь зярыя шкань перть, тонавтнинь весементень аламонь-аламонь. Ульнесь покш мелем содамс аволь ансяк эсь тевенть, чарькодемс производствань весе ёнкстнэнь. Роботынь истя аволь пек кувать, мейле чамсь мастерэнь тарка, саимизь монь. Роботась монень пек вечкеви ды мелем коряс.
Эряви меремс, мастерэнь тевесь аволь шождатнестэ. Сменанть перть бригадантень сави нолдамс 2-3 тоннат продукция. Эрьва кодат колбасатнеде ламо, 40 ламо видэнь, ды эрьванть марто важодема башка ёнксонь коряс. Содама весе рецептуратнень, чарькодема технологиятнень. Мастерэнтень эряви пштистэ ваномс производствань весе цикланть мельга: цехентень сывеленть ильтямсто саезь анок продукциянть складс максоманть видьс.
– Васень шкасто, кода ансяк тей сынь, пек стакаль. Важодемань васенце читнестэ арсинь, а кирдеван тесэ, – корты Наталья Владимировна. – Ансяк те ульнесь, паряк, апак тонадово. Шкань ютазь чарькодинь, таркам тесэ. Эсь тевенть свал бажан теемс кода эряви, штобу кодаткак кевкстемат авольть уле. Эдь бути роботанть теят вечкезь, весемесь лиси. Ды ней вадрясто содаса аволь ансяк эсь тевенть, апак кавтолдо полавтан лия роботыцятненьгак.
Мастерэсь тешксты, меельце иетнестэ предприятиясонть ламось полавтовсь вадря ёнов. Эштё зярыя иеде икеле производствась тесэ ульнесь аволь истямо высокотехнологичнойкс. Ней жо весе цехтнес аравтозь неень шкань од оборудования. Те лезды аволь ансяк государственной стандартонь весе вешематнень топавтомасо, важодемантькак теи ков седе шождакс.
– Минек вадря ды тантей продукциянть нолдамосо арасть кодаткак салавачить, – полады Наталья Лапшова. – Весемесь ашти сеньсэ, колбасатнень ды лия продукциянть анокстамсто тевс нолдави эсенек сырьясь. Предприятиясь, кода икелеяк, сывелекс ракшатнень ды ловсонть рами эсенек республикань хозяйстватнестэ. Эсенек убойной цехсэ нолдавиця сывелесь сеске жо юты лабораториясо теевиця ветеринарной ванкшноманть. Ансяк теде мейле сон керсеви, явшеви ды максови переработкас. Истя, вадря, апак кельмевте сывелесь, ансяк потявтозь ловсось ды свалшкань рецептуратне лездыть нолдамс ГОСТ-нь коряс вадря продукция.
Теке марто рамицятнень столь лангс понгомадо икеле весе продукциясь тагояк юты вадрячинь коряс ванноматнень эсенек производственной лабораториясо. Ды вана истямо аравтлувось: вадря сырьясь, свалшкань рецепттнэ ды неень шкань технологиятне лездыть «Оброченский» мясокомбинатонтень нолдамс продукция, конань кисэ а визькс.
Кода уш тешкставсь икеле, неень шкане сывельстэ ярсамопелень анокстыця комбинатось нолды 40 ламо эрьва кодамо видэнь колбасат ды сывелень деликатест. Рамицятне седе покш мель явить пидезь истят колбасатненень, кода «Русская», «Докторская», «Молочная», вечкевить «Говяжьи» сарделькатне, «Москворецкие» шпикачкатне, «Русские» ды «Молочные» сосискатне, рамить «Краковская», «Московская», «Сервелат Европейский» аламодо коптязь колбасатнень ды ламот лиятнень. Башка мель явови «Чоризо» колбасантень, конань рецептуразо зярдо-бути арсезель Испаниясо. Колбасась тееви тувонь сывельстэ ды юткозонзо човорявить эрявикс специят. Сон а пидеви ды а коптяви. Истямо колбасанть костить. Лиси пек тантей.
Мясокомбинатонь продукциянть ютксо покш тарка истя жо саить полуфабрикаттнэ: сывелень прякинетне, котлетатне ды лия ярсамопельтне. Минек течинь эрямось истямо, аволь свал муеви шка пидемантень. Ды тесэ пек лездыть полуфабрикаттнэ. «Оброченский» мясокомбинатось нолды сывелень истят прякинеть, теке кудонь. Сынь теевить кедьсэ, аволь оборудованиянть вельде, секс тантейтькак.
«Оброченский» мясокомбинатонь весе продукциясь микшневи предприятиянь фирменной лавкатнесэ. Сынь улить аволь ансяк эсенек республикань районтнэсэ, истя жо шабра Нижегородской областьсэяк.
Сывелень вадря ды тантей продукциянь нолдамось ашти прявт тевекс «Мясокомбинат «Оброченский» ОАО-нть туртов. Те аравтлувонть топавтыцякс жо аштить предприятиясо важодицятне – ёроков, превей ды эсь тевень содыця профессионалтнэ. Течинь чине коллективсэнть 70 ламо ломанть, седе ламотне эйстэст – од специалистт, конат эсь предприятиянть марто сюлмить эрямост ды вандынь чист, конат важодить эсь тиринь райононть ды республиканть лезэс.
«Оброченский» мясокомбинатонь фирменной лавкатне течинь чине панжозь аволь ансяк Ицялонь райононь велетнесэ. Кавто лавкат улить Саранскойсэ: вейкесь Химмашсо – Октябрянь 70 иетнень лемсэ проспектсэнть, омбоцесь – Коммунистической куросонть. Аволь умок панжовсь лавка Орданьбуе ошсо. Предприятиянть продукциязо истя жо микшневи Нижегородской областень Починки велесэ.
Юлия Еремина
Фотось Эдуард Ретунскиень