Пятница, марта 29, 2024
Важное

А мезть сёпомс, меельце шкастонть пертьпельксэсь эйсэнек а кольневти. Секе-тев валы пиземе. Те, нама, пек а вечкеви республикань аграрийтненень. Эдь зярдо пек летьке модась, видеме а сыргат, а лисят.

 

– Мелят маень 9-це чинтень тундонь паксясо важодеманть, видеманть прядокшнынек,  – ёвтни «8 Марта» велень хозяйствань предприятиянь прявт агрономось Михаил Николаевич Дорофеев. – Тедеде хозяйствасонок тевтне допрок лиякс аштить. Ташто Чамзань отделениясо 1700 гектарт мода. Маень 21-це чинтень видинек 290 гектарт ламбамо якстерькай. Улиндеряй вадря, пиземевтеме пертьпельксэсь, видематнень прядсынек сисем чис. Ламбамо якстерькаенть видемантень покш мель явить трактористтнэ Евгений Александрович Мамаев, Иван Васильевич Куманев. Сынь омбо масторонь  «ФЭНДТ» тракторсонть видсть весемезэ 1300 гектарт. Эштё ламбамо якстерькай види трактористэсь Александр Самолин. Сон хозяйствасонок важоди аволь умок, армиясто самодо мейле. Ансяк покш опыт марто трактористтнэнь эйстэ васов эзь кадово.

«8 Марта» велень хозяйствань предприятиянь прявт агрономонть валонзо коряс, ламбамо якстерькаень видемстэ истя жо парсте важодсть трактористтнэ А.П.Горюков, Н.В.Фадеев. Эрьвась эйстэст видсь 240 гектарт ламбамо якстерькай. Хозяйствасонть весемезэ явозь ламбамо якстерькаенть алов 2 тёжат гектарт мода. Сынь аштить Селища, Андреевка, Ташто Чамза, Спасское, Моревка велетнень паксятнесэ.

Кецявты, «8 Марта» велень хозяйствань предприятиянь трудий ломантне паксясо тевтнень топавтомсто а вастнить кодаткак стакачить. Видемантень анокстазель сатышка – 2,5 тёжат тоннат – удобрения. Эйстэст – азотнойть ды сложнойть.

– Эзинек майсе видьмексэнь коряскак, – ёвтни  прявт агрономось М.Н.Дорофеев. – Теньсэ, нама, покш таликазо «Ромодановосахар» предприятиянь прявтонть Александр Иванович Атласовонь. Сон весементь тейсь вадря ды сатышка видьмексэнь таштамга.

М.Н.Дорофеев тескень, Ташто Чамза велень. Сон паксянь алкуксонь азор. Агрономонь тевенть кочкизе эштё школасо тонавтнемстэ. Зярдо прядызе средней школанть, Михаил Дорофеев ялганзо Владимир Сураев ды Владимир Ерзамаев марто сыргасть Саранскоев. Эсь документэст максызь Мордовиянь Н.П.Огарёв лемсэ госуниверситетэнь велень хозяйствань факультетс. Ялгатне кочкизь механикень-инженерэнь ды зоотехникень тевенть.

1980 иестэ, вузонть прядомадо мейле, Михаил Николаевич Дорофеев кундась эсь вечкевикс тевезэнзэ. Покш сюкпря ёвтась «8 Марта» колхозонь сестэнь прявтонтень Алексей Николаевич Дорофеевнень. Сон лездась васень шкасто колхозонь паксятнень тонавтнемстэ, ды сенень, кода прянть ветямс ломань ютксо. Ней А.Н.Дорофеев ютксонок арась, ансяк сонзэ арсеманзо велень эрямодонть нейгак эрить Ташто Чамза велень эрицятнень мельсэ. Сонзэ тевензэ полады Николай Иванович Куманев. Агропромышленной комплекссэнть важоди умок ды пек парсте. Икелеяк сон ульнесь велень хозяйствань прявтокс.

«8 Марта» велень хозяйствань предприятиясонть сюротнень алов явозь 4800 гектарт мода. Тень ютксо 2200 гектарт шуж, 900 гектарт яровой товзюро, 120 гектарт кснав, 300 гектарт – зёрнакс кукуруза. Видезь 1300 гектарт озимойть.

– Озимойтнестэ малав 180 гектартнэнь сави видемс одс. Сынь ёмасть, – мельсапаронь апак кекше ёвтни прявт агрономось М.Н.Дорофеев. – Уш ламо пиземеть ульнесть. Ансяк тень коряс минь пек а талнотано. Нурька шкас те кажонть видьсынек.

Кучкаева велень паксясо яровойтнень видсь А.П.Горюков трактористэсь. Сон эрьва косо дока, ёроков. Види якстерькай, яровойтнень. Сон эрьва ков кенери.

«8 Марта» хозяйствань видицятнень ланга ёвтнемстэ а кода а шнамс  А.В.Сёмушев шофёронть. Сон – Спасское рузонь велестэ. Хозяйствасонть важоди умок. Те шканть перть тонадсь аволь ансяк парсте важодеме, истя жо эрзянь кельсэ кортамояк.

А.В.Сёмушев хозяйствань утомсто паксятнень видемс ускси видьмекст. Эсь «КамАЗ» автомашинасонзо чизэнзэ тейни ламо рейст.

…Минь Ташто Чамза веленть маласо паксясонть. Тесэ прядыть шужонь видеманть. В.К.Бахтин трактористэсь тевензэ топавты вадрясто. Ансяк прядовить видьмекстнэ агрегатсонть, эйзэнзэ сеске арды А.В.Сёмушев шофёрось. Ды зярыя шкань ютазь видемань агрегатось таго тевсэ.

Тешкстасынек, трактористэнтень Владимир Кузьмичнень пек лезды В.М.Кутуров.

«8 Марта» велень хозяйствань предприятиясо улемстэ теевинек содавиксэкс Г.И.Кутуров механикенть марто.

– Минек хозяйствань предприятиясонть трактортнэде ды автомашинатнеде сатышка. Тесэ ниле «Джон Дирт», ниле «ФЭНДТ»-т, кавто «К-744», кемень «МТЗ» тракторт, – ёвтни Григорий Иванович. – Ламо автомашинанок, комбайнанок. Нурькинестэ меремс, техникань коряс а мелявттано. Тень кувалма, шкастонзо соксетяно-виднетяно ды урядатано паксятнень. Талновты ансяк вейкесь: кой-кона трактортнэ умонь. Сынст эрявить полавтомс. Арсян, маласо шкасто хозяйствань прявттнэ тень тейсызь.

– Кода важодиде мелят? – кевкстинек прявт агрономонть М.Н.Дорофеевень.

– А беряньстэ. Эрьва гектарсто саинек 40 центнерт сюро, весемезэ – 17 тёжат 585 тоннат;  истя жо весемезэ саинек 99 тёжат 336 тоннат ламбамо якстерькай, гектарсто 450 центнерт; 530 тоннат рапс; анокстакшнынек 14695 тоннат силос, 8 тёжат 930 тоннат сенаж.

«8 Марта» велень хозяйствань предприятиянь прявттнэ покш мель явить сенень, кода седе ламо од специалистт важодевельть предприятиясонть. Ды те удалы. Течи тесэ тевензэ вадрясто молить омбоце механикенть Николай Кечемайкинэнь. Сон тей сась важодеме Н.П.Огарёв лемсэ госуниверситетэнь Механикань ды энергетикань институтонть прядомадо мейле. Сон сеске мусь кель-вал Ташто Чамзасо важодицятнень марто.

– Сон минек кеме неженек, – мерсь прявт агрономось М.Н.Дорофеев. – Карминдеряйть важодеме хозяйствасонть сонзэ кондят седе ламо ломанть, сестэ велесь а ёми.

… Ютыть зярыя чить, «8 Марта» велень хозяйствань предприятиянь паксятнесэ аламос лепамить тракторонь увттнэ. Прядови видемась. Ансяк аволь кувать. Ушодовить лия тевтне: касовкстнэнь андомась0 ды, нама, тикшень анокстамось. А стяко кортыть: тундонь чись ие анды.

Пётр Зиновьев.

Покш Игнатовань район

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».