«Тепличное» АО-со, конась сови «РОСТ» компаниятнень группас, меельце шкасто моли пси важодема. Тесэ 2020 иестэ саезь ушодсть стявтомо од теплицат. Тенень явозь 2,2 млрд целковойть. Уш тунда од таркантень озавтыть куярт. Ней строительной колмо подрядной организациятне роботыть, теить од блокт. Истя жо карми од котельной, биолаборатория, важодицятнень туртов оймсемань таркат. Теплицатнес эрявить ламо од важодицяткак.
Кода моли теплицатнень стявтомась, миненек пачтясь «Тепличное» АО-нь строительствань коряс специалистэсь Алексей Александрович ЛАПИН.
– Од теплицатне кармить 8,17 гектарт мода лангсо. Саемга, васенце блоксонть теевить кото теплицат. 6,85 гектартнэнь лангсо карматано кастомо куярт. Истя жо весе цехтнесэ помидорт, салатонь линия ды росадань отделения. Арсетяно пурнамс вейке квадратной метрасто 160 кг эмежть. 15 % лангс виевгавтови валдомтомась, лиякс меремс, вейке квадратной метрас валдонь максомань системась карми 230 ватт (лия теплицатнесэ – 200 ватт). Кемтяно, эмежень урожаеськак кенярдовтсамизь. Теплицатне теевить кото метрань сэрьсэ, седеяк келейгадыть коридортнэ – 9,6 метрат. Эштё вейке од ёнксось – эмежтнень марто роботась карми вере ды ало. Кой-кить кармить роботамо вере, лиятне – алга.
2023 иестэ бажатано стявтомс весе теплицатнень. Зярс жо тевтнеде тесэ ламо. Таркась покш, сонзэ весе эряви паролгавтомс потмо ды ушо ёндо. Теемс валномань, генерациянь, вентиляциянь системанть. Вейке ёно куяртнэ уш кармить касомо, строямось-паролгавтомась жо поладови седе товгак. Важодицятнень туртов анокт оймсемань паро таркатне – 30-35 ломаньс. Весемесь, эряви меремс, теке кудосо. Тесэ сынь кармить ярсамо (уш ладинек холодильникть, микроволновкат, чайникть, телевизор). Теезь шлямонь таркат (душевойть).
Эрявить тенек важодицят – цёрат ды ават. Малав сядо ломанть сайтяно эмежень кастыцят. Цёрань коллективесь покшолгады кавксть, сынь, саемга, кармить вере роботамо, ладяви кепедевиця тележка. Кото ломанть вере, вейксэ ало. Эрявить кочкамс куяртнэнь, сюлмсемс нетькстнэнь, сезнемс лопатнень. Кинь ули мелезэ – садо, пшкадеде кадратнень коряс отделс, яволявтома максозь Интернетсэяк. Зарплататне парт. Пандыть шкастонзо. Ломанентень эряви мельспаросо самс важодемс, истямо жо паро ёжосо туемс кудов. Эрямосонок те тевесь саи покш тарка, – корты Алексей Александрович.
А. А. Лапин чачсь Саранскойсэ. 1998-2003 иетнестэ тонавтнесь Н. П. Огарёв лемсэ МГУ-нь Аграрной институтсо. Вузонь прядомадо мейле сеске сась важодеме «Тепличноев». Важодема кизэ ушодовсь слесарекс. Мейле ладизь механизаторокс. 2008 иестэ саезь кармась васенце цехсэ теплотехникекс. 2016 иестэ ладязель 1№ цехень прявтокс. 2020 иестэ саезь роботы строительствань коряс специалистэкс. «Тепличноень» весе цехтнесэ витнематне-петнематне, од стройкатне ды реконструкциятне сонзэ лангсо. Тевтнеде ламо. Меельце комсь иетнень перть эмежень кастомань технологиятне пек полавтовсть.
Теевинек содавиксэкс строительствань коряс эштё вейке специалистэнть марто. Те – Владимир Иванович ДЫДЫКИН. Кода пачтясь цёрась, меельце комсьветее иетнень перть сон сюлмавозь «Тепличное» АО-нть марто. Сон ды строителень бригадазо паролгавтокшнызь столовоень потмонть, мазылгавтызь конторань фасадонть. Нейгак столовойсэ аштить понгавтозь картинанзо. Эсь шкастонзо В. И. Дыдыкин прядызе Пензань художественной училищанть.
Кода а ёвтнемс теплицасо важодицятнеде? 3 № блокось сехте покш, невтевксэст коряс – изницят.
– Минек цехесь – те малав 10 гектарт теплицат ды росадань отделения. Иезэнзэ пурнынек 14,5 тоннат продукция. Неть невтевкстнэ пек парт. Весе цехсэнть средней урожайностесь 150 кг. Сехте покш урожаесь – вейке квадратной метрасто саинек 174 кг. Те сехте сэрей теплицатнесэ. Минь касттано куярт ды помидорт. Тесэ роботыть 162 ломанть. Монь васенце лездыцям – инженерэсь-теплотехникесь А. А. Пузин. Технологокс роботыть Н. И. Безина ды В. А. Адмайкин. Т.А. Федотова – валномань коряс агроном. Т. Н. Горина – касовкстнэнь ванстомаст коряс агроном. Реализациянь отделсэ эсь тевест парсте топавтыть М. П. Дерина, О.А. Глебова, Г. Н. Вильдеманова. Эмежень эрьва килограммась ловови ды ванкшнови.
Малав 120 ломанть – эмежень кастыцят. Улить слесарть, микроклиматонь операторт. Ломантне умок уш те коллективсэнть. Улить истят, кить састь иеде-кавтодо икеле. Курок панжови од блок, ды минь тонавттано одтнэнь. Тердтяно самс важодицят. Нама, од теплицасонть васня кармить важодеме сетне, кинь ули покш опытэзэ. Апрельстэ ушодтано важодеме од блоксонть. Малав 20 % роботыцянок ютыть тов, – ёвтнесь 3 № блоконь прявтось Алексей Михайлович АДУШКИН.
Алексей Михайлович важоди тесэ кемготово иеть. Сон чачсь Отяжелень райононь Ушаковка велесэ. Тонавтнесь Н. П. Огарёв лемсэ МГУ-нь Аграрной институтсо. Васня саизь слесарекс. Иень ютазь колмоце цехев ладизь касовкстнэнь ванстомаст коряс агрономокс. Мейле ютавтызь ведущей агрохимикекс, прявт агрономонь лездыцякс. 2015 иестэ ладязель 4 № цехень прявтокс. 2020 иенть прядовомсто – 3 № цехень прявтокс. Адушкинтнэ – ламо эйкакшонь триця семия. Нинзэ марто сынь кастыть вете эйкакшт.
Алексей Анатольевич ПУЗИН чачсь Саранскойсэ. Школанть прядомадо мейле, те ульнесь 1993 иестэ, мольсь тонавтнеме Н. П. Огарёв лемсэ МГУ-нь светотехнической факультетэв. Ветеце курссо тонавтнемстэ кучизь ютамо практика «Тепличноев». Ды се шкастонть саезь сюлмизеяк эрямонзо те тарканть марто. Дипломонь тевезэ алтазель куяртнэнень валдонь максомантень. Эряви меремс, нейгак сынь важодить те системанть коряс. Вузонть прядомадо мейле саизь 3 № цехев микроклиматонь операторокс. 2009 иестэ саезь ды те шкас роботы инженерэкс-теплотехникекс.
– Мон ванкшнан вентиляциянь, валномань, уштомань систематнень технической ёнкстнэнь мельга. Сыненст свал эряви парсте важодемс. Эмежтнень туртов улезэ паро микроклимат – свалшкане молезэ валномась, сатоволь тенст летькесь. Эдь весе неть систематнеде ашти урожаень касомась. Эрси, кадовтано чокшнес, бути эряви – листяно оймсема чистэяк. Эмежтне касыть, сынст а лоткавтсыть, кода станоконть. Секскак весементь мельга эряви пштистэ ваномс, шкастонзо витнемс асатыкстнэнь, – пачтясь А. А. Пузин.
Вадим Анатольевич АДМАЙКИН важоди 3 № цехсэ технологокс. Сон тесэ эйкакшпингстэ саезь. Уш 15 иесэ кизэнь каникулатнестэ важодиль. Кода истя лиссь? Тесэ умок важоди тетязо. Анатолий Васильевич ней роботы панжадо грунтсо эмежень кастомань коряс прявтокс. «Тепличноенть» марто Вадим сёрмадстсь колмо ёндонь контракт. Тонавтнесь Московсо К. А. Тимирязев лемсэ велень хозяйствань академиясо. Студентэкс улемстэ практиказо свал ютыль тесэ. Вуздо мейле эрявсь колмо иеть роботамс «Тепличное» АО-со. Ней уш кеветее иеть топодить, кода цёрась важоди тесэ. Ушодсь микроклиматонь операторокс, седе тов – валномань коряс агрономокс, 2016 иестэ саезь – технолог. Сон ваны эмежтнень парочист ды производстванть мельга, микроклиматонь невтевкстнэнь, тонавты ломантнень, свал кирди кеме сюлмот эмежень кастыцятнень марто.
Весе неть цёратнень туртов «Тепличное» АО-сь кармась мельстуиця важодема таркакс. Сынь а неить пряст лия сферасо. Мезть кортамс, ламось ашти коллективденть ды прявттонть. Паро, зярдо тевтне ладязь ды прок семиясо – ули вейке-вейкень чарькодема. Сестэ седеяк касы мелеть молемс важодеме, теемс сень, мезе эряви, ды шожда эскелькссэ саемс изнявкстнэнь.
Ёвтатано «Тепличное» АО-со важодиця весе цёратненень лембе валт Отечествань ванстыцянь чинть кувалма! Арсетяно кеме шумбрачи, уцяска, паро ды сэтьме эрямо, семиясо – вечкема ды чарькодема!
Татьяна Маторкина
Фототне Эдуард Ретунскиень