Понедельник, января 30, 2023
Важное

Покш Игнатовань райононь Вармазейкасо зярыя иень перть важоди Владимир Кабаевень крестьянско-фермерской хозяйствась. Тесэ кирдить ракшат, видить-кастыть сюрот. Малав сядо ломанть пурнась вейс В. Ю. Кабаев. Весе сынь алтызь пряст велень хозяйствантень. Ломантне теке райононь ды шабра Нижней ёнксонь. Тесэ иень эрьва кодамо шкасто ламо тевть. Вана нейгак минь пачколинек тенст инжекс. Кевкстнинек, кода ютась нуемась, зяро пурназь сюротнеде, кодат полавтомат улить.


КФХ-нь прявтонть В. Ю. Кабаевень валонзо коряс, иесь ульнесь аволь берянь. Кемень ковтнень перть потявтозель 2930 тоннат ловсо. Вейке скалсто кемень ковтнень перть – 6200 кг ловсо. Сюротнень валовой пурнамось – 21 311 тонна. Урожайностесь – 26,81 центнер. Хозяйствасонть ушодсть стявтомо сюронь склад ды гараж. Рамазельть «Кировец» од трактор, культиватор, «Полесье» сюронь нуемань комбайна.

– Видинек озимойть – розь ды товзюро 440 гектарт. Лов алов сокинек 1300 гектарт мода, тунда шкась а ули, сы иень сёксня тов видтяно озимойть. Нейгак сокатано, зярс модась эзь кельме. Теде башка, сокатано кадозь модатнень. Кой-конатнес вете иеть мезеяк эзь видневе, лиятне – колоньгемень иеть эзть соксевкшне, чарькодеви, куракшт-мезть касыть лангсост, ванськавттано бульдозерсэ. Тедеде сюронь нуемась ютась парсте. Виднинек розь, товзюро, шуж, пинеме. Средней урожайностесь лиссь 25 центнерт вейке гектарсто. Минек сёвонень модатнесэ те паро невтевкс. Ней вана паксятнестэ усксетяно тикше марто тюктнень, – пачтясь хозяйствань агрономонь тевтнень топавтыцясь Михаил Кабаев.

Алексей Михайлович Козляков важоди тесэ прявт зоотехникекс. Сон чачсь Темниковань районсо. Тонавтнесь Н. П. Огарёв лемсэ МГУ-нь Аграрной институтсо, конань прядызе 2016 иестэ. Служась армиясо. Важодсь Нижней ёнксонь Починковской районсо. Мейле марясь, тей эрявить важодицят, ды сась.

– Весемезэ минек тесэ 1100 скалт, букат, вазт. Сынст ютксто 450 – потявтовиця скалт. Улить скалт, конат иезэнзэ максыть 7,5 тоннат ловсо. Чизэнзэ ве скалсто минь потявттано 24-28 литрат. Ладязь молокопровод, мартонзо пек паро. Скалтнэ кирдевить содозь, потявтомсто аштить таркасост. Кизна ушосот. Нама, паро, зярдо сынь ушосот. Ансяк якшамо шкане сынст а ливтьсыть. Тедеде тундось якшамоль, кувать эзинек ливте. Скалтнэнь потявтыть кемень потявтыцят ды полавтыцяст, важодить ваз мельга колмо якицят.
Ракшатнень андтано тантейстэ, тейтяно кормосмесь: силос, сенаж, тикше, олгот, фураж, дробина, жом. Минек скалтнэ голштинизированной породань, сынь ламо ловсонь максыцят. Но алкуксонь голштинтнэнь-скалтнэнь мельга пек эряви ваномс, сынст аволь шожда трямс-кастомс. Ловсонть усктано «Саранский» ловсонь комбинатов.

Тедеде стявтынек од телятник. Панжинек октябрясто. Вишка вазтнэ тесэ аштить пирязь таркинева. Вейке ковонь вазнэтне тесэ кирдевить колмо ковозост. Симдтяно эйсэст ловсодо, андтано комбикоромдо. Пек псисэ сынст а мереви кирдемс. Курок тей ладятано сушилкат ды пачкоди «ловсонь такси» – чарыне лангсо боцька, косо тееви вазтнэнь симдемс ловсо, сон кирдеви эрявикс температурасо, ули дозатор, – ёвтнесь А. М. Козляков.

Евгений Иванович Марюшкин важоди тесэ 2013 иестэ саезь. Сон чачсь Покш Игнатовань райононь Од Чамзасо. Школанть прядомадо мейле, кода велень ламо лия цёратнеяк, мольсь тонавтнеме Игнатовань СПТУ-в. Мейле служась армиясо Грузиясо. Важодсь ПМК-со, колхозсо, кото иень перть ардтнесь Московов. Ней роботы Кабаевень КФХ-со ды ковгак лияв арась мелезэ туемс. Коллективесь паро, зарплата пандыть шкастонзо.

– Мон андан скалтнэнь ды букатнень, важодян «Хозяин» СРК-11В кормораздатчиксэ. Пек паро агрегатось. Тесэ вейс човорявить силосось, фуражось ды явшеви. Тракторсонть сован видьстэ фермас ды почодан андомапеленть. Кормораздатчиксэ важодтяно вейке-вейкень полавтнезь, валске сисем чассто саезь ниле часос. Кизна тракторсо-косилкасо тикше ледян. Кудов сан – тосояк тевть учить. Истя жо эсенек кардазсо трятано эрьва мезть, велесэ эрязь, кода мезеяк а кирдемс? – ёвтнесь Е. И. Марюшкин. Марюшкинтнэнь колмо эйкакшост. Аволь умок парсте важодеманзо кисэ Евгений Иванович казевсь МР-нь Велень хозяйствань ды продовольствиянь министерстванть пельде Благодарностьсэ.

Сонзэ марто вейсэ важоди Олег Михайлович Плотников. Сон тракторсонзо покш кечесэ пештни кормораздатчикенть. Истя иень перть, чистэ чис анды ракшатнень. Тельня – фермава, кизна – калдава. Максни вазтнэнень тюксо тикше.
– Мон чачинь теске, Вармазейкасо. Ансяк ней эрян Игнатовасо. Школань прядомадо мейле тонавтнинь Игнатовань СПТУ-со трактористэкс. Служинь армиясо. Эрьва косо роботынь. Тесэ важодян васенце читнестэ саезь, кода теевсь КФХ-сь. Васня ве ие ульнинь стадань ваныцякс, мейле карминь механизаторокс. Те вана тракторонть, конасонть важодян, максызь тень одсто рамазь. Техниканок вадря. Мезесь калады – минсь витнесынек. Эсь тевенек содасынек, бажатано весементь топавтомс парсте. Бути мейскак, кодамояк кевкстемань коряс эряви пшкадемс – свал лездыть тенек, – пачтясь О. М. Плотников.

Андрей Сергеевич Калиничев истя жо важоди тракторсо. Сон рана валске ушоды ванськавтомо ферматнень, сень, мезенть ёртнизь ракшатне ды эзизь сэве. Мейле кормоцехстэ сайни лия андомапельть ды пешти сынст миксерс.

Владимир Валерьевич Земсков Кемлянь велень хозяйствань техникумонть прядомадо мейле роботась «Дружба», «Верный путь» ды лия колхозтнэсэ, ульнесь экскаваторщикекс, тракторонь бригадань бригадирэкс. Стажозо малав 40 иеть. Тей важодеме трактористэкс сась аволь умок. Ней вана вановтонзо ало ули студент, конась юты практика. Иван Левщанов теке райононь, Ташто Кшуманцянь. Сон тонавтни Кемлянь аграрной колледжень 3-це курссо механикекс. Цёратне полавтыть тракторсо термостатонть. В. В. Земсков, кода эсь тевень содыця специалист, покш опыт марто тракторист, невтни ды тонавты од цёранть. Иванонь валонзо коряс, стакась мезеяк арась, весе чарькодеви, тонавтыцясь вадря. Кие соды, паряк, те студентэсь шкань ютазь кочкасы велень хозяйстванть ды сы тей важодеме?!

Татьяна Маторкина
Фототне Эдуард Ретунскиень
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».