Пятница, марта 29, 2024
Важное

Велень хозяйствань ды перерабатывающей промышленностень важодицятнень чинтень

Исяк, ноябрянь 8-це чистэ, минек республикасо тешкставсь Велень хозяйствань ды перерабатывающей промышленностень важодицятнень чись. Мордовиясь – аграрной регион, секскак те кенярксчись ашти прявтокс ламот предприятиятнесэ ды организациятнесэ важодицятнень туртов. Весе сынь теить покш путовкс республиканть ды целанек масторонть кастомга-виевгавтомга. Истят предприятиятнень ютксо «Птицефабрика «Атемарская» ОАО-сь. Неень шкане те виев ды кеме предприятия, конась алонь нолдамонь коряс сови Россиянь сехте покш нармунень фабрикатнень юткс. Теде башка, предприятиясь важоди сюротнень кастомань, ракшань трямонь ды сывельстэ продукциянь теемань-нолдамонь ёнкстнэсэ. Тесэ важодить эсь тевень содыця ды ёроков специалистт, конатненень виень коряс топавтомс куш кодамо производственной тев. Предприятиянть прявтсо ашти эсь тевень парсте содыця ломанесь, ёроков аграрникесь Александр Валентинович Щемеров.

– Велень хозяйствань ды перерабатывающей промышленностень важодицятнень кенярксчинтень республикань эрьва предприятиясь сы невтевкс марто: мезе теезь те иенть перть, кодат изнявкст, кодат од полавтомат. Эрьвась аравты эсензэ икелев важодемань од аравтлувт сы шкантень, – корты «Птицефабрика «Атемарская» ОАО-нь прявтось Александр Щемеров. – Минек предприятиянть туртов те иесь ульнесь а берянь эрьва ёндо. Нама, ульнесть стакачить. Сюротнень видемань шкась аламодо таргавсь, нуемаськак прядовсь икеле иетнень коряс седе позда. Теке марто урожаесь тедеде вадря. Пурнынек 29 тёжат тоннат сюро. Вадрят невтевкстнэ алонь ды предприятиясонок теевиця лия продукциянь нолдамонть коряскак.

Ламо важодинек производствань одкстомтоманть коряс. Покш сюкпря республикантень ды федеральной министерствантень – велень хозяйствань предприятиятненень лездамга улить ламо программат. Тень коряс вадрясто важоди «Росагролизинг» АО-сь. Ней тевс нолдави сынст «Раннее бронирование» программась. Лиякс меремс, макстано яволявтома миненек эрявикс техниканть ды агрегаттнэнь лангс, тунда весементь усксызь. Теке марто тесэ важоди льготной программа – васняяк апрельстэ пандсынек проценттнэнь, а прявт долгонть – сентябрясто. Истямо лувось пек вадря. Кизна сынст ульнесь «Эсенектнень а кадсынек» программась. Сонзэ юрсо одкстомтынек эсь техникань парконть. Истя, те программанть коряс раминек кавксо КамАЗт, видемань колмо агрегатт, погрузчик.

Эряви меремс, «Эсенектнень а кадсынек» программанть коряс важоди сонсь нармунень фабрикаськак. Тесэнь зярыя важодицятне, истя жо кода ламот лиятне, мобилизациянь коряс тердезтнень марто вейсэ, анокстыть минек масторсо сэтьмечинь ванстомантень. Ды кода мерсь Александр Щемеров, мобилизованнойтненень предприятиянть пельде максозель весе эрявикс лезксэсь.

– Тень коряс минек ветяви домка важодема. Эрьва мобилизованноентень сеске жо явозельть 50 тёжат целковойть предприятиянть пельде. Целанек жо, тундосто саезь, кода ушодовсь специальной военной операциясь, минь лездатано продукциясояк, рамсинек лецямопельтькак, «Мирэнь фондс» явинек ярмакткак. Лездамс эряви. Кие, бути аволь минь? – тешкстась Александр Валентинович.

Важодицятне –

предприятиянть нежезэ

Кода уш тешкстынек, «Птицефабрика «Атемарская» ОАО-сь важоди велень хозяйствань ламот ёнкстнэсэ. Прявт тевекс жо ашти нармунтнень трямось-кастомась ды алонь нолдамось. Течинь чине алыиця саразтнэде фабрикасонть лововить 1,5 миллионт. Сынст марто важодемадонть ёвтнесь предприятиянь птицеводствань коряс прявт зоотехникесь Екатерина Владимировна Бочкарева.

– Фабрикась минек пешксе циклань: родительской стадасто саезь промышленной алыиця саразс, – ёвтни Екатерина Бочкарева. – Весемезэ важодить 53 корпуст, конатнестэ 14-тнесэ – ремонтной молодняк (од саразт, конатнесэ полавтовить сыретне эли кулозтне), 3-тнесэ – родительской стадась, косо 2 корпустнэсэ – покш саразт, вейкесэнть – од авакшкеть. Весе лиятнесэ – алыиця саразт: 22 цехть васенце площадкасонть, 9 – омбоцесэнть, 3 корпуст Ковылкинань отделениясонть. Ковылкинасо истя жо улить ремонтной молодняконь кавто корпуст. Ули эсенек инкубаторгак. Инкубационной алонть сайтяно эсенек родительской стаданть пельде. Племакс авакштнень-атякштнень жо раматано «ППР «Свердловский» ООО-сто. Раматано суткань ципакат. Мейле кастсынек, сайтяно пельдест алт, алтнэнь путсынек инкубаторс, эйстэст лисить промышленной стаданть туртов суткань ципакат, ды мейле кастсынек седе тов. Суткань атякшкетне жо ютыть мясокостной почтокс. Минек ули эсенек цехенек.

Тедедень вейксэ ковтнень перть алтнэде саезельть 385 миллионт. Минек продукциясь миеви кода эсенек предприятиянь лавкатнесэ, истя сетевой покш лавкатнесэ, кода Мордовиясо, истя лия регионтнэсэяк.

Екатерина Бочкарева Атемаронь нармунень фабрикасонть важоди аволь умок, пельиешка. Теке марто те сферасонть уш кемголмово иеть.

– 2009 иестэ прядыя Н. П. Огарёв лемсэ МГУ-нь Аграрной институтонь «Зоотехния» отделениянть, – тешксты Екатерина Владимировна. – Майстэ прядыя, сентябрясто жо карминь важодеме специальностень коряс «Авангард» нармунень фабрикасо. Тосо роботынь кемгавтово иеть. Ушодынь зоотехникекс, мейле аравтымизь од авакшкень цехсэ важодицятнень бригадирэкс, седе тов – нармунтнень андомань коряс зоотехникекс. Тедедень апрельстэ сынь тей нармунень кастомань коряс прявт зоотехникекс. Монь лангсо ашти зоотехнической службань весе тевтнень ветямось. Вановтон ало важодить ниле зоотехникть ды подразделениятнень весе прявттнэ. Важодемадонть ламо.

Целанек жо неень шкасто фабрикасонть важодить нармунтнень мельга 127 якицят ды 69 операторт. Весе сынь эсь тевень содыця вадря специалистт. Вейкесь эйстэст Юлия Павловна Томилина. Предприятиясонть важоди сисем иеть, конатнестэ вететнень максынзе алонь складсо сортировщицань тевентень.  Ней роботы нармунтнень мельга якицякс.

– Те таркасонть роботан омбоце ие. Важодемась мелень коряс. Монь вановт ало 61 тёжа саразт. Прявт тевенек – ваномс нармунтнень мельга, штобу сынь улевельть шумбрат, вадрят, пурнамс алтнэнь, кирдемс корпуссо ваньксчинть, – ёвтни Юлия Томилина.

Нармунтнень коряс операторокс вана уш зярыя иеть фабрикасонть роботы Иван Алексеевич Лапин. Важодемань кизэ тесэ ушодовсь ютазь пингень 1990 иестэ.

– 1989 иень тельня сынь армиясто, 1990-це иень мартсто карминь важодеме нармунень фабрикасонть. Ульнесть а шожда шкат, кавкстешка туекшнинь а куватьс, ансяк мекев велявтынь, – корты Иван Лапин. – Эдь те предприятиянть марто сюлмавозь весе раськем. Тесэ роботасть тетям, авам, покштям ды бабам. Тесэ жо нармунень мельга якицякс роботы Татьяна Алексеевна ним. Лиякс меремс, минек тесэ уш цела династия.

Иван Алексеевичень тевезэ – андомс саразтнэнь, ванськавтомс таркатнень, ваномс сень мельга, штобу симдемапельтнесэ свал улевель ведь. Теке марто оператортнэ – васень лездыцят нармунтнень мельга якицятненень.

Вана уш комсь иеть птицеводствань коряс прявт ветеринарной врачокс «Птицефабрика «Атемарская» ОАО-со важоди Светлана Юрьевна Жутина. Авась эштё эйкакш порасто эстензэ кочкизе те профессиянть. Кода корты, пек вечки ракшат-нармунть. Ды те профессиясь кармась эрямонь тевекс. Светлана Юрьевнань пек эрявикс тевезэ – ванстомс нармунтнень шумбрачист. Секскак профилактикань мероприятиятне предприятиясонть ютавтовить педе-пев ды шкастонзо.

Весе неть специалисттнэ ды нармунень фабрикань лия важодицятне – предприятиянть вандынь чизэ ды прявт нежезэ. Сынь теить покш тев минек республиканть ды целанек масторонть кастомга-виевгавтомга.

Мельвановикс ялгат! Ёвтан седейшкавань поздоровт тынк профессиональной кенярксчинк – Велень хозяйствань ды перерабатывающей промышленностень важодицятнень чинть кувалма!

Эйстэнк ламосо ашти минек республиканть ды целанек масторонть вандынь чизэ. Тынь тейтядо покш ды эрявикс тев. Арсян тыненк ды малавиксэнк туртов кеме шумбрачи, уцяска, вадря тевть ды покш изнявкст! Уледе кемевикст эсь кочкавт тевентень!

Юлия Еремина

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».