Воскресенье, июня 23, 2024
Важное

Неень шкасто республикань велень хозяйствань предприятиятнесэ тевтне лаказь лакить – моли сюротнень видемась. Роботатне ветявить весе районтнэсэ, ламот хозяйстватнесэ яровой сюротнень видеманть уш прядыть.

Ромодановань райононь «ООО Мордовское агропромышленное объединение и компания» ТНВ-сь – Мордовия Республикань велень хозяйствань прявт предприятиятнестэ вейкесь. Неень шкане сон важоди сюротнень, ламбамо якстерькаень ды тикшень кастомань, сюракшов ракшатнень трямонь ды ловсонь нолдамонь ёнкстнэсэ. Хозяйстванть прявтсо уш ламо иень перть ашти превей, ёроков ды эсь тевенть содыця аграрникесь Николай Всеволодович Ютяев. Неть читнестэ минь ульнинек хозяйствасонть, кортнинек важодицятнень марто ды ванынек, кода молить тевтне. Кода мерсь Николай Всеволодович, тундонь видемань тевтненень хозяйствась анокстась вадрясто. Техникась витнезель, видьметне ды удобрениятне анокстазь сатышка, ГСМ-сь рамазь ды сехте прявтось – улить вадря, эсь тевень содыця специалистт ды механизаторт. Куш кодамо тевсэ те сехте эрявиксэсь.

– Мезе иля корта, эрьва предприятиянть юрось – важодиця ломантне. Неень шкасто минек улить весе эрявикс специалистэнек: трактористт, механизаторт, водительть, видицят ды хозяйстванть туртов эрявикс лия важодицят. Покш мельспаро, улить од специалистэнек. Сынь минек предприятиянть кеме неженек ды вандынь чинек, – кемексты Николай Всеволодович. 

«ООО МАПО и К» ТНВ-сэ видеманть ушодызь апрелень васенце читнестэ. Яровой сюротнень видеманть ней уш малав прядызь, неть читнестэ ушодыть ламбамо якстерькаенть ды мейле кукурузанть.

Хозяйствасонть сюротнень алов явозь 12 500 гектарт мода. Тедеде видевить 2000 гектарт шуж, 364 гектарт яровой товзюро, 1200 гектарт силосокс кукуруза. Видезь 3000 гектарт озимой сюрот. Ды истя жо 300 гектарт веиень тикшеть, малав 1670 гектарт – ламо иень. Те иестэ 2000 гектарт максозь ламбамо якстерькаенть алов.

Тешкстама, «ООО МАПО и К» ТНВ-нть юрс совить зярыя отделеният: Пятинасо, Вишка Березниксэ, Кочуновасо (Ромодановань район) ды Эрьмезёнкасо (Чаунзань район). Кода тешкстызе предприятиянь прявт агрономось Николай Арсентьевич Сараев, важодемась ветяви весе отделениятнесэ. Ды шкантькак а мезть таргсемс, модатне коськеть, читнеяк аштить лембеть ды вадрят.

Эряви меремс, Н.А. Сараев агрономонь тевенть топавты уш колоньгемень колмо иеть ды весе те шканть перть важоди «ООО МАПО и К» ТНВ-сэ. Тей кучокшнызь сеске Мордовиянь           госуниверситетэнть прядомадо мейле. Неть иетнень перть Николай Арсентьевич эсь важодемасо варчнесь эрьва мезенть, сон а пели тевс нолдамс од технологиятнень ды корты, одонть совавтомась зярдояк а эрси берянекс. Паряк, сонзэ неть совавтоматнень вельдеяк сынст хозяйствась сови республикасонть вадрятнень юткс.

– Видемань тевтнесэ минек важодить кавксо комплекст. Теке марто моданть анокстамга васняяк каявить удобрениятне, пашнясь   изави ды тееви культивациясь. Ансяк теде мейле видеви сюрось. Истямо лувось тееви сень туртов, штобу удобрениятне сюпалгавтовлизь моданть эрявикс минералтнэсэ ды седе кувать ванстоволь летькесь, – ёвтни Николай Сараев. – Неень шкантень минек видезь веиень тикшетне, прядтано яровой сюротнень. Течи-ванды ушодтано ламбамо якстерькаенть видеманзо. Бути кортамс озимой сюротнень коряс, сынь а берянть. Теленть ютавтызь парсте, сынст подкормкась теезь.

Видьметнень анокстамга хозяйствасонть истя жо весемесь теевсь шкасто. Шужонь, товзюронь ды веиень тикшень видьметне эсест, кукурузансетне рамавсть, ламбамо якстерькаень видьметнень эрьва ие максы «Ромодановосахар» ООО-сь. Тедеде якстерькаень видьменек улить омбо масторонь ды эсенек. Кода свал, сынь рамавить истят, конатне ладить те эли тона таркасонть кастоманть туртов. Видемадо икеле весе видьметне морявить эрявикс минералтнэсэ-пестицидтнэсэ, конатне ванстыть зыянонь кандыця унжатнеде, а нолдыть пакся тикшенть. 

Тундонь видематнесэ хозяйствасонть важодить 65 ломанть: тевень содыця механизаторт ды вадря специалистт. Техникась предприятиясонть вадря, ламо мезе эрявикс рамазь меельце иетнестэ. Телень перть сонзэ витнизь-анокстызь ды ней важоди кода эряви.

Хозяйствасонть улемстэ шканть таргсеме эзинек карма, сыргинек паксяв, важодицятнень ваксс. Теске, Пятинанть маласо паксясонть, важодсть механизатортнэ Сергей Николаевич Горюнов ды Владимир Викторович Панков. Тесэ моданть анокстасть ламбамо якстерькаень видеманть алов – каясть удобрениянть. Сергей Горюнов важоди      КамАЗ автомашинасонть, ускси удобрения марто покш кескавтнень. Отяжелень райононь Керамсурка велесэ чачозь цёрась хозяйствасонть важоди кевейкее ие. Теде икеле кемзисемге иень перть роботась Ромодановонь сахаронь заводсонть. Ды свал роботы КамАЗ-со. Машинась тензэ пек вечкеви, виев.

Владимир Панков жо хозяйствасонть роботы малав весе эрямонзо перть – 40 иеть. Сась тей эштё овсе од цёракс ды ковгак лияв уш эзь туекшне. Неть иетнень перть варчнесь ламо техника – эрьва кодат тракторт, конатнень ютксо гусеничнойтькак, сюронь нуиця комбайнат, ламбамо якстерькаень урядыця комбайнат. Ды нейгак иенть перть эсь техниканть полавтнесы зярыяксть.

– Техниканть марто минь, мерят, кортатано ве кельсэ. Вечкан варчамо мезеяк од, те ёрокчинтькак панжи, ёжомарямонтькак кепеди, – тешксты Владимир Викторович.

Лия паксясонть видеманть ветясь Виктор Дмитриевич Шкергин механизаторось. 27 иеть важоди хозяйствасонть. Сась тей школанть прядозь ДОСААФ-со трактористэнь праватнень получамодо мейле. Роботась армияв туемс. Службанть ютазь жо, эзь туе ошов паро эрямонь вешнеме, велявтсь мекев МАПО-в. Видема шкастонть роботы тракторсо, сюротнень нуемстэ – комбайнасо, якстерькаенть таргамсто жо – лия комбайнасо. Весе техниканть содасы, эрьванть руль экшсэ роботы покш мельспаросо.  

Александр Александрович Потапов весе пингензэ перть, 33 иеть, важоди тесэ трактористэкс-механизаторокс. Чачсь теске, Лыковщинасо. Сась тей сеске школань прядомадо мейле. Армиядо мейле поладызе важодеманзо моданть лангсо.

– Ней вана омбоце ие роботан Кировец К-5 тракторсонть. Техникась виев, вадря. Весементь, мерят, сонсь теи, – пейди Александр Потапов.

Зярдо видематне прядовить, механизаторось вейсэ лиятнень марто карми топавтомо гербицидтнэсэ ды эрявикс удобрениятнесэ валноманть. Кизэнь перть важодить тикшетнень ды сюротнень урядамосо, сёксня анокстыть модатнень видемантень. Тельня Александр Потаповонь мельга кемекстазь бульдозер, конасонть китнень уряды, фермасто навозонть паксяв ускси.

Эряви меремс, механизаторонть марто лездыцякс уш зярыя иеть важоди цёразояк. Владиславнень 18 иеть. Тонавтни Саранскоень автомеханической колледжсэ «Автомеханик» специальностенть коряс. Сон эрьва ие тесэ важоди, кизна лезды комбайнасо нуеме. Аволь васенце тундо невти прянзо сокамонь-видемань тевтнесэ. Валонзо коряс, пек тукшны мелезэнзэ паксясо важодемась. Тесэ сонзэ туртов тонавтнемаяк, практикаяк.

Кода мерсь «ООО МАПО и К» ТНВ-нь прявтось Николай Ютяев, Владиславонь коряс колледжень руководствантень сынь сёрмадсть сёрма ды видемань шкатнес вешсть нолдамс сонзэ хозяйствантень лездамо.

– Цёрась кадык эштё од, ансяк пек ёроков. Весементь чарькоди, куроксто саи превс. Ламоксть тензэ кортамс ды толковамс а эряви. Весть невтьсак ды сеске мельс-превс сайсы. Сон эсенек. Тетянзо марто кассь паксясо. Овсе вишка шкасто саезь ардтнесь комбайнасо лездыцякс. Ней кассь вадря специалистэкс, – кемексты Николай Всеволодович.

Видемань тевтнень ванномадо мейле вейсэ Н. А. Сараев агрономонть марто ардынек хозяйствань утомтнес. Ванынек, кода видьметнень анокстыть видемантень. Тесэ минек вастымизь прявт механикесь Алексей Алексеевич Дерябин. Сон самай важодсь видьметнень морямонь агрегатсонть. Те а покшке машина, козо каяви эрявикс веществась. Сюронь видьметне, пачканзо ютазь, артовить якстерестэ (истя самай морявитькак).

Кода мерсь Алексей Дерябин, видьметнень морямкась лезды сынст ванстомс зыянонь кандыця унжинетнеде, а эрявикс тикшеденть ды лия мелявтовтыця касовкстнэде-порицятнеде.

Юлия Еремина

 

Ютазь иесь минек республикань велень хозяйстванть туртов ульнесь пек вадря. Сюротнеде весемезэ нуезь 1 млн 763 тёжат тоннат, масличной культуратнеде – 154 тёжат тоннат, ламбамо якстерькайденть саезельть 842 тёжат тоннат. 2023 иень урожаенть алов видезь 166 тёжат гектарт озимой сюрот. Теке марто тедедень тунда арсеви видемс 509 тёжат гектарт яровой культурат, конатнень ютксо 309 тёжат гектарт сюрот, 101 тёжа гектарт масличнойть, 24 тёжат гектарт технической культурат. Ламбамо якстерькаенть арсеви видемс 23 тёжат гектарт, модамарденть ды эмежтнеде – малав 2,5 тёжат гектарт. Кормовой культуратнеде видевить 162 тёжат гектарт.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».