Республикань паксятнесэ ушодовсь сюронь нуемась. Те шкась лиятнень ёнов а молиця, зярдо пертьпелькссэнть качады ансяк пурнавт сюротнень чинесь ды велетнеяк, мерят, вельмить одс: маряви комбайнатнень увтост, тей-тов ардыть сюросо пештязь машинатне. Велень хозяйстватнесэ молить сехте «пси» шкат.
Ве лувсо роботыть весе: комбайнёртнэ, водительтне, механизатортнэ ды тинге лангсо важодицятне. Ды, нама, тенень вадрясто анокстасть велень хозяйствань весе предприятиятне. Истямо лувсо тевтне молить «Птицефабрика «Атемарская» ОАО-сояк, косо минь ульнинек неть читнестэ.
– Нуеманть арсетяно ушодомс июлень меельце читнестэ ды, васняяк, ушодтано озимтнень пивсэме, – ёвтни предприятиянь растениеводствань ды механизациянь коряс прявтонь полавтыцясь Сергей Иванович Сотов. – Нама, те иестэ видемань шкаськак аламодо таргавсь, нуемантькак ушодсынек седе мейле. Теке марто, сюрось а берянь, коське. Бути пертьпельксэсь карми маней, маласо шкастонть ушодсынек сюротнень нуеманть.
Нармунень фабрикань паксятнестэ те иестэ эряви нуемс 9700 гектарт сюрот ды 2000 гектарт зёрнакс кукуруза. Весемезэ неть тевтнесэ ушодовить важодеме 15 комбайнат ды малав 25 единицат КАМАЗ-т, конатне кармить усксеме сюронть. Предприятиянь специалисттнэнь ловомаст коряс, вейке комбайнантень эряви нуемс 780 гектарт. Те аволь аламо, секскак ней весе вийтне максовить техниканть витнемантень-анокстамонтень, штобу важодема шкасто кодаткак мелявкст авольть лисне. Ды предприятиянь машинань-тракторонь парксонть ней тевсэ эрьва механизаторось – веенст котьмить эсь комбайнатнень перька, лиятне ванкшныть-витнить машинатнень.
– Неень шкасто минек хозяйствасонть лововить 15 комбайнат. Нуема шкантень малав весе анокт. Кадовсь ансяк тестэ-тосто аламодо витнемс, – ёвтни «Атемарская» птицефабрикань МТП-нь прявтось Александр Иванович ИВАШКИН. – Колмо комбайнатне Беларусень «Полесье» фирмань, «Акрос-530» – 6 единицат, «Акрос-580» – 3 единицат, кавто комбайнат – «Акрос-585» ды вейке – «Торум». Эрьва комбайнась кемекстазь комбайнёр мельга. Седе ламотне эйстэст – те од, эсь тевень содыця специалистт, конатне нуемань тевсэнть аволь васенце ие.
Александр Ивашкин механизаторонь тевсэнть сонськак аволь вейке ие, важодемань лувонть содасы. Сонсь цёрась Отяжелень, нармунень фабрикасонть важоди аволь умок, кавто ковт. Велень хозяйствасо жо вишка шкасто саезь.
– Школанть прядыя ды сеске тракторонь руль экшс озынь, карминь важодеме колхозсо. Ды уш школасо тонавтнемстэяк колхозсо кодамояк тевсэ котьмилинь. Кизэнь шкасто яла свал сюронь урядамосо важодилинь, ульнинь комбайнёронь лездыцякс, – корты Александр Ивашкин. – Ульнинь механизаторокс, водителекс, малав кемень иеть топавтынь машинно-тракторной парконь прявтонь тевенть. Ды зярдо «Атемарская» птицефабрикань прявтось Александр Валентинович Щемеров тердимем тей важодеме, кувать эзинь арсе, сынь. Александр Валентиновичень содаса пек парсте, «Агро-Атяшево» хозяйствасонть, косо сон ульнесь прявтокс, важодинь зярыя иеть. Ломанесь сон превей, эсь тевень содыця, чарькодиця. Ламо теи аволь ансяк предприятиянть, истя тесэнь важодицятнень лезэскак. Мон кода тесэ ушодынь важодеме, предприятиянть пельде тень явсть эрямо тарка, ней арсян семиямгак тей ускомс.
Вана уш комсь иеть «Птицефабрика «Атемарская» ОАО-сонть механизаторокс важоди Алексей Алексеевич ПАРИСЕНКОВ.
Цёрась свалшкане важоди трактористэкс, нуема шкасто жо озакшны комбайнань руль экшс. Тевензэ улить куш кодамо шкасто. Тунда котьми видемань тевтнесэ, кизэнь перть анокстыть тикше, мейле ушодови велень хозяйствань предприятиятнень ды механизатортнэнь туртов сехте пси шкась – сюронь урядамось. Трактористэсь таго тевсэ. Телень перть жо лездыть фермань важодицятненень ды витнить-петнить техниканть.
– Машинань-тракторонь паркось минек хозяйствасо аволь берянь, – ёвтни Алексей Алексеевич. – Пек умонь техниканок ней уш арась, сон свал одкстомтови. Рамавить од тракторт-комбайнат ды сынст туртов весе эрявиксэсь. А эдь од ды вадря техникасонть важодемаськак шожда ды мелень коряс.
Кода мерсь Алексей Парисенков, эсь тевенть сон пек вечксы ды топавты покш мельсэ.
– Лиясто оймсема чистэ кудосо цяк тень сы, седе курок бу лисемс роботав. Тесэ чись юты а марявиксстэ. Чоп ломань ютксат, топавтат эсь тевенть. Мон эдь школань эземстэ саезь весе эрямон перть важодян велесэ, мода лангсо. Те монь весе эрямом, – кемексты механизаторось.
Аволь меельце таркасо предприятиянь МТП-сэ ашти тесэнь бухгалтерэсь Наталья Васильевна МАРКИНА. Сон аноксты весе документтнэнь, кармавты-рами транспортонть туртов эрявикс запчасттнень, витнемань-петнемань туртов эрявиксэнть. Покш Березник ёнксонь Кузым велень эрзянь тейтересь предприятиясонть важоди 2005 иестэ саезь, ды те подразделениясонть вана уш 12 иеть.
– Течинь чине техникань витнеманть туртов весе эрявикс пелькстнэ рамазь. Сынст ускоманть-пачтямонть коряс кодаткак мелявкст арасельть. Важодемась моли эсь лувсо, – тешксты Наталья Маркина.
Эряви меремс, видемань шкастояк, сюронь урядамо шкастояк «Птицефабрика «Атемарская» велень хозяйствань предприятиянтень пек лезды сюронь ванстомань ды костямонь неень шкань оборудованиясь. Сон аволь вишкине, эйзэнзэ аравтозь омбомасторонь электронной оборудования. Кода тешкстызе Сергей Сотов, чинек-венек тесэ костяви 700-900 тоннат сюро, весемесь ашти летькенть, пертьпельксэнь температуранть, сюронь ваньксчинть эйстэ.
– Неень шкасто сюронь нуемантень минек предприятиясо весемесь анок. Техникась учи паксяв лисеманть, весе утомтне анокстазь, куш нейке каяк сюронть. Покш мельсэ те шканть учить весе механизатортнэяк. Кодамо бу стака сюронь нуема шкась аволь уле, ансяк эрьванть туртов сон лия ёнов а молиця шка.
Течинь чине «Птицефабрика «Атемарская» ОАО-сь важоди велень хозяйствань ламот ёнкстнэсэ, сюротнень видемась-кастомась жо тесэ – прявт тев. Предприятиянть прявтсо ашти превей ды эсь тевенть вадрясто содыця аграрникесь Александр Валентинович Щемеров, конась велень хозяйствасо важодемантень макссь аволь аламо иеть. Сонзэ валонзо коряс, эрьва предприятиянть нежезэ – важодиця ломантне, ёроков ды чарькодиця специалисттнэ. Ансяк сынст эйстэ ашти хозяйстванть вандынь чизэ.
Юлия Еремина
Фототне Э. Ретунскиень