Иень эрьва кодамо шкасто минек лавкатнесэ микшнить пиже куярт ды якстере помидорт. А содан, кода тынь, минь рамсетяно ансяк эсенек республикань, «Тепличное» АО-нь эмежтнень. Чинь куншкане те предприятиянть лавкатнес эль понгат, рамицятнеде свал ламо. Кие рамси эмежть, кие саи цятордыця салтозь капстат, кие пиже чурькат, якстерькайть ды модамарть.
Мартонь 8-це чинь кенярксчиденть икеле минь пачколинек «Тепличноев» (сон сови «РОСТ» компаниятнень группантень) ды ули меленек ёвтнемс тесэ важодиця аватнеде. Кой-кить весе эрямост сюлмизь эмежень кастоманть марто. Ней тевентень тонавтыть одтнэнь. Эрьва чи сынь топавтыть ламо тевть. Кенерить важодема таркавгак, кудосояк теить весе тевест. Предприятиясь роботыцянзо ускси важодеме ды мекев кудов.
Надежда Ивановна Безина важоди тесэ 40 иеде ламо, 1980 иестэ саезь. Сон – МР-нь велень хозяйствань заслуженной роботник, трудонь ветеран. Эсь тевензэ содасы педе-пев, вадря специалист. Чачсь Кочкурбуень Од Пурня велесэ. Школанть прядомадо мейле васня тонавтнесь Краснослободскоень велень хозяйствань техникумсо агрономокс, седе тов – 1987 иестэ прядызе Н. П. Огарёв лемсэ МГУ-нь Аграрной институтонть. «Тепличнойсэ» кемень иеть роботась консервной цехсэ. Шкань ютазь ладизь 3 № цехень технологокс.
– Икеле минь важодинек ташто технологиятнень коряс. Арседе тынсь, иезэнзэ вейке квадратной метрасто пурнылинек 32 кг эмежть. Пек аламо. Ней – 150-170 кг! Весемесь полавтовсь. 2000 иетнестэ ушодовсть кастомань од технологиятнень тевс нолдамось. Теплицатне паролгавтовить. Карминек кастомо светокультурат, лампа ало. Эрьва косо валдо, ваньксчи. Аволь кода икеле, рудаз потсо, койме марто чийнилинек, эмежтнень покш паргова пештнилинек, сталмост 25 кг ульнесть. Ней – картононь паргот, 10 килос, чарыне лангсо ардыть. Зяро касттано эмежть, теде ашти зарплатаськак, – ёвтни Надежда Ивановна.
Технологтне ваныть теплицатнесэ коштонть мельгаяк. Компьютер вельде ладявить эрявикс параметратне, илязо лисе кодамояк зыян, весе системась важодевель парсте. Веть теплицатнесэ температурась улезэ +17-18 градуст, чить – +22-25. Чинь температурась ладяви сень коряс, кодамо пертьпельксэсь – потмура эли жо эжди чипаесь. Летькесь свал улезэ 80-85 %, аволь седе ламо ды аволь седе аламо. Теке марто, весе теплицатнесэ тевс нолдави эмежтнень капельной валномась. Лиякс меремс, ведесь байгень-байге петни куяронть, помидоронть эли лия эмеженть ундокстнэнь лангс.
– Технологось весе лувонть мельга ваны – видьмексстэ саезь кенерезь эмежтнес. Кода авась ваны эсь эйдензэ мельга, истя миньгак. Васняяк мелявтат видьмекстнэнь лисемаст кис, мейле ванат касомаст мельга. Производствасо эрьва мезе лисни. Лиясто сехте вадря касовкстнэ ормалгадыть, мезеяк коласынзе. Ды чумонть, васняяк, вешнят эсеть эйстэ. Паряк, мезеяк теить а истя, мезеяк менстить, манявить. Куярось пельиень перть касы, эмежть максы, помидортнэ мик иень перть. Ды весе те шкастонть домкасто ванома касомаст мельга: иляст пра, иляст сиве, шкастонзо валномат. Ламось ашти коллективденть. Башка валт ёвтавлинь мартон важодицятнеде. Минек ютксо ули вейке-вейкень чарькодема, мелень ванома. Эряви маштомс важодемс ломантнень марто, эрьванть марто кортамс, муемс кель-вал, а нузялдомс толковамс, мезесь а истя. Ды, нама, эмежтнень касомаст мельга улезэ пшти ванома. Тень эйстэ ашти урожаесь ды весень зарплатась. Тешкстаса, эмежень кастомань-пурнамонь коряс минек 3 № цехесь изницятнень ютксо, – тешксты Н. И. Безина.
2022 иень перть теплицатнесэ кастозь 31788,2 тоннат эмежть. Те 8,1 проценттэ пландо велькска. Бути кортамс ушосо, мода лангсо кастозденть, тесэ пурназь сюронь ды эмежень покш (рекордной) урожай. Ковозонзо средней зарплатась предприятиясонть 57 тёжат целковойть. Ней панжовить од теплицат ды тей эрявить од важодицят – цёрат ды ават! Пшкадеде кадрань отделс.
Аванзо мельга – «Тепличноев»
32 иень перть эмежень кастыцякс «Тепличнойсэ» важоди Раиса Николаевна Сеськина. Тей сась сеске школанзо прядомадо мейле. Чачсь сон Ицялбуень Жабина велесэ. Кода ледстни авась, сеть шкатнестэ предприятиясь кассь-кепететсь, тей республикань весе районтнэстэ ардсть роботамо. Нейгак важодицятнень ютксто ламотне велень ломанть, конат а пелить стака важодемадо, а орголить тевде.
– Минек важодемась стака, аволь эрьвась цидярды. Касттано куярт-помидорт. Валскестэ саезь чокшнес пурнатано эмежтнень, сюлмсетяно нетькстнэнь, сезнетяно лопатнень, тенсетяно якамо таркатнень. Якатано росадатнень мельга. Кадык стака, тевесь уш тонадовсь. Зярдо тей сынь, мезеяк а содылинь, опыт, нама, кодамояк арасель. Савсь эрьва мезес тонавтнемс. Ней жо, ламо иень ютазь, монськак роботан одтнэнь марто, тонавтан эйсэст эмежень кастыцянь профессиянтень. Эсь содамочитнень эряви максомс лиятненень, кадык сыньгак те тевенть тонавтнесызь педе-пес. Прявтонок – технологось В. А. Адмайкин. Парсте содасы тевензэ. Цехсэнть моли пштистэ ванома кода касовкстнэнь, истя жо важодицятнень мельгаяк. Секскак, арсян, 3 № цехенть вадрят невтевксэнзэ урожаень коряс, – ёвтни Раиса Николаевна. Авась уш пенсиясо, ялатеке а кады вечкевикс тевензэ.
Эряви меремс, Ольга тейтерезэяк сась роботамо «Тепличноев». Авазо кортавтсь эйсэнзэ, эзь мере самодо, стака. Тона эзизе кунсоло, микшницянь тевесь мелезэнзэ эзь тукшно. Ней уш котошка иеть касты эмежть ды лия таркадо а арсияк.
Весе седейстэ ёвтатано лембе валт Тейтерь-авань чинть марто «Тепличное» АО-со важодиця аватненень! Уледе шумбрат, мазыйть, уцяскавт, вечкевикст! Кадык эрьва чись канды тенк паро, малавиксэнк кецявтыть!
Татьяна Маторкина