Алкуксонь кизэ сась минек пертьпельксэнтень. Кие оймсеме лембе ёнов аноксты, чемодант-кескавт пешти, кие кудова-пирева котьми, вирьга-паксява кстыйть-пангт кочки. Ансяк а содыть оймсема велень хозяйстватнесэ важодицятне. Тевтне лаказь лакить Ромодановань райононь «Агропромышленное объединение «Элеком» ОАО-нь отделениятнесэ.
Те организациянтень совить ниле велеть: Ромодановань – Трофимовщина, Алтары, Курмачкасы ды Ицялбуень – Береговые Сыреси.
Аволь умок журналистэнь китне-янтнэ минек ветимизь Алтары велев. «Элеком» АПО-нть велень хозяйствань производствань коряс прявтонь полавтыцясь, эрзянь церась Иван Александрович Базакин, кода свал, вастымизь паксясо.
Агропромышленной отраслянть марто сон сюлмавозь 20 иеде ламо. 2000 иестэ Н.П. Огарев лемсэ МГУ-нь Агроинститутонть прядомадо мейле зярыя шка важодсь тиринь Орданьбуень райнонь Куцянвелесэ, мейле тукшнось аламошкас Москов ёнксов ды велявтсь мекев. «Тиринь модась тердимим чачома ёнксов», – корты Базакин. Од зоотехникесь поладызе роботанзо «Октябрьская» агрофирмасонть, кассь отделениянь управляющеекс. Кавто иеде теде икеле Иван Александрович сась важодеме «Элекомов». Тевесь содавикс, вечкевикс, кода велесэ чачозесь, сон а пели важодемадо, валске чипаенть марто стямодо. Иван Александровичень лавтов лангсо весе роботась, конатнень «Элекомось» вети агропромышленной ёнксонть коряс. Сон чуросто ашти кабинетсэ, свал чары лангсо, чинь-чоп арды отделениятнень паксятнева ды ферматнева. Мартонзо вастовозь, минек сеске сыргавтымизь килангов – прявтонть ульнесь мелезэ невтемс од рамавксонть. Чись псиль, кода кортави валмеревкссэнть, самай кизэнь истят читне ие андыть.
Алтарынь паксятнес пачкодезь, васолдо неинек од техниканть, конась истя тусь мельс тесэнь важодицятненень. Те HORSCH моданть пурксицясь (опрыскивателесь), конанть нолдыцязо – Германиянь содавикс фирмась. Паксясонть те шкане механизаторось, спецтракторонть ветицясь Валерий Валентинович Борисов ульнесь а ськамонзо. Пурксемапелентень те шкастонть ускокшность удобреният, эрявикс валномкат-андомкат, каясть солярка. Ламбамо якстерькаень паксятнесэ ванськавтыть-валныть колмоцеде. Те лувось эряви касовкстнэнь унжадо-порицядо ванстомга. Парсте содасызь эсь тевест тосонь важодицятне ды Алтарынь отделениянь прявт агрономось А.Н. Якубаев, конатне чинь-чоп ардыть-ютыть паксятнева сядодо ламо вайгельпеть.
«Од установканть марто тевтне пурксемань коряс седе эряскадсть, тракторось вейке ютамос саи 36 метрадо ламо, важоди веньпертькак, бути эряви. Весе техникась хозяйствасонть сюлмавозь ГЛОНАСС системанть марто, – ёвтни тенек И.А.Базакин. – Покш сюкпря евтатано «Ромодановосахар» ОАО-нь прявтонтень МР-нь Государственной Собраниянь депутатонтень А.И. Атласовнень. Те сонзэ лездамонзо вельде майстэ тенек сась истямо алкуксонь казнесь».
Паксятнень пурксиця техникась а стяко максозель Валерий Валентинович Борисовнень. Базакинэнь валонзо коряс, те механизаторось алкуксонь профессионал. Сон эрьва техникасо дока. Тунда паксят соки, кизна валны, сюронь урядамсто озы комбайнас, сексня, бути эряви, якстерькайть тарги. Ицялбуень Селища велень эрзянь цёрась механизаторокс важоди 1985 иестэ саезь. Истят ломантнеде мерить оймсемань а содыцят, зярдояк каршо а моли, свал анок лисемс важодеме. Кодашка кемечи, вий эряви неть ломантненень, минь неинек эсенек сельмсэ. 30 градусто ламо пси, пуль, тракторонь гайть… Кеменьшка минутань аштезь, сы мель напустямс сэтьме ды экше таркав. Валерий Валентиновичень жо калязь чамасонзо свал мизолкс. Сон каштансто ёвтни, зяро те тракторось теи сменазонзо – 250-300 гектарт. Невтни пурксемканть потмонзо, од оборудованиянть. Тосо ули кондиционер, бортовой компьютер, навигатор. Чарькодтядо, кода седе шождалгадсь истямо «налкшкетнень» марто механизаторонь тевесь? Валерий Валентинович HORSCH-нть руль экшс озамодо икеле, кода виде-паро тонавтниця, ютась сервисэнь центрасо курсат ды ансяк экзаментнэнь максомадо мейле «кильдизе» пурксемапеленть.
Минь уш зярыя иеде теде икеле вастовкшнынек Борисов марто ды сон сестэ евтнесь церадонзо, конатне тусть тетяст киява: «Кавонест цёран прядызь Саранскойсэ Агроинститутонть, тонавтнесть агрономокс ды технологокс. Уш вишка пингестэ саезь бажинь сынст а кирдемс тевтеме. Эрьва кизэнь каникулатнестэ сайнинь паксяв, роботасть комбайнёронь лездыцякс, ильтинь армияв, кадык тосояк тонадыть цёрань алкуксонь тевентень – тиринь масторонь ванстомо ды идеме». Кевкстинек, кода ней тевест молить? Ней Олег ды Андрей роботыть Саранскойсэ «МАПО-Транс» ООО-сонть, МАЗ-нь ветницякс. Специальностень коряс важодеме эзть карма, пандома питнесь, корты тетяст, пейдевтиця ды секскак сынь мусть лия тев. Строить кить, усксить машинасост чувар, кевть ды сень, мезе эряви.
Кенярдтано, улить эште минек велетнесэ алкуксонь цёрат, конатне сынськак роботадо а пелить ды тонавтыть тенень эйкакшосткак.
«Неть ломантнень лангсо, кода Борисов, кирдевитькак велень хозяйстватне. Сыненст меремс кавксть а эряви, весементь, мезес кундыть, тейсызь куроксто ды тевень содазь. Ломанесь а симиця, чарькодиця, тевень топавтыця. Ярмактнеяк сынст туртов пандовить а берянть», – ёвтнесь тенек И.А. Базакин.
Паксясо важодицятнень тундонь, кизэнь ды сексень тевтнень топавтомсто свал андыть пек паро ярсамопельде, конань пидить Трофимовщина велесэ агрофирмань столовойсэ. Эрьва чистэ, колмоксть велень тружениктненень ускови паксяв ярсамопель псинь кирдиця кедьгесэ. Столовоень азораватне – кавто ават: прявтось – Надежда Ивановна Сальникова ды пидицясь – Вера Николаевна Винокурова. Сынь кавонест эрьва чистэ андыть-симдить малав 100 ломанть ды истя котошка ковт оймема чинь апак сода. Столовоесь роботы ансяк се шкастонть, зярдо ушодовить тевтне паксятнесэ.
Цёратне каванявить а беряньстэ: сывель марто капста ямдо, ликшань кашадо котлета марто, голубцадо, умарень компотто. «Кияк, зярдояк эште эзь музгорде, весенень вечкеви. Кие парсте роботы – ярсыяк кеместэ», – ёвтни Надежда Ивановна. А эштё столовоенть менюсо эрси керсезь сывель, эрьва кодат кашат, плов, рестазь алт, куяронь-помидорань салатт. Сывеленть ды ловсонть жо комбайнертнэнь-трактористтнэнь андомс максы АПО-сь, кшиськак паневи «Элекомонь» паникудосо. Тантейть пидевксэст-паневксэст неть мизолдыця аватнень, неяви сеске, роботыть оймень путозь!
Марина Девятова
Фототне Эдуард Ретунскиень