Понедельник, августа 03, 2020
Важное

Од коронавирусонь инфекциясь, конась эште кавто ковдо икеле марявсь тенек васолонь ормакс, конась кадык пачкодськак Мордовияв, ялатеке, арсевсь, юты куроксто ды сэредитькак эйсэнзэ ансяк республикань инжетне, невтизе прянзо весе «мазычисэнзэ». Секе тев сыть кулят, келя, сэредить роднянок-раськенек, ялганок-малавиксэнек ды ломантнень куломадо кулятнеяк кармасть пачкодеме малав эрьва чистэ. Ды аволь весе неть ломантне сыреть, улить ютксост врачт, медсестрат, од цёрат ды тейтерть. Кияк а соды, косто ды зярдо лангозот пры те стака ормась. Ансяк весе кемить, паряк юты ваксканзо.

 


«КС-клиникасо», невтемакс, тенек яволявтсть: экспресс-тестированиясь тееви тосо эрьва чистэ. Учомс сави 30 минутат ды питнезэ 1600 целковойть. Вересь саеви сур прясто ды экспресс-тестэсь невти, кода организмась вети прянзо вирусонть марто. Сон явови ПЦР методонть эйстэ, конась саеви курго потсто ды невти ули-арась вирусось кирьгапарьсэнть. «Новомедсэ» жо тенек телефон вельде ловность цела доклад, кода ды мезе сынь тосо ванныть. Вирусонь антителатнень ванномадо башка, конатнень питнест 1850 целковойть, тесэ теить иммуноферментной анализ сеть ломантненень, конатне уш сэредсть COVID-19-сэ ды те шкастонть ютасть 4 недлят. Анализэсь саеви  верень сансто ды учомс сави 3-5 чить. Питнезэяк кавто тёжат.

Коронавирусонть а нолдамга ды шкастонзо редямга Мордовиясо   Россиянь прявт санитарной врачонть мереманзо коряс яволявтозь сеть ломантне, конатненень васняяк теевить тесттнэ. Неть: сеть эрицятне, конатне састь РФ-в лия масторсто ды сынст улить респираторной ормань тешксэст; кить эрить эли вастневсть сэредицятнень марто; конатне сэредить аволь больницясо кундазь пневмониясо, кинень 65 иеде седе ламо ды сынст улить ОРЗ-нь тешксэст; медроботниктне, конатне важодить инфицированнойтнень марто ды эште сеть ломантне, конатне эрить спецучреждениятнесэ. Республикань лабораториятнесэ тесттнэде сатышка.

Мордовиянь Роспотребнадзоронь Управлениянь даннойтнень коряс, мартонь 23-це чистэ саезь республикасонть весемезэ теезь 80079 исследованият коронавирусонь инфекциянть коряс, июнень 14-це чистэ, невтемакс, теезельть чизэнзэ 451 тестт.  21,7 проценттнэ эйстэст теевсть «Центр гигиены и эпидемиологии в Республике Мордовия» ФБУЗ-сонть. Сондензэ башка истят тестт теить республикань лия государственной медицинской организациятнесэ, кода инфекционной больницясь, туберкулезонть каршо бороцямонь ды кожно-венерологической диспансертнэ, Мордовия Республикань центральной клинической больницясь. Сынст лабораториятнес усковить пробат весе районтнэстэ. Сынь теевить, нама, питневтеме. Истя жо башка исследованият теи сотрудникест ды тосо аштицятнень туртов МР-ва УФСИН-нь медико-санитарной частесь.

Исень чис республикасонть тестт теезельть 70159 ломаннень.

Тешкстасынек, малав ковдо икеле Мордовиянь кой-кона частной лабораториятнеяк кармасть тееме эрьва кодат исследованият COVID-19-нть лангс. Минь арсинек гайневтемс тов ды кевкстемс, зяро тосо саеви питнесь ды кода теемс тесттнэнь апак пеле.  Материалонть пурнамсто карминек содамо, истят тестт теи Мордовиянь верень максомань станцияськак, нама, аволь стякодо, 700 целковойде. Ломантнень, конатнень ули эсест мелест теемс анализт, станциянть икеле учи мобильной комплекс.  Ломантне совить вейкень-вейкень ды анализэсь саеви кедь сансто. Верень службась ардтни анализэнь саеме организацияваяк, бути тонатне кучить тердема. Ансяк анализтнэнь станциястонть сави учомс вейке-кавто эли седеяк ламо чить ды те, нама, пек ацирьгавты.  Секскак, кинень тестэнть эряви теемс эрязасто, якить лия клиникатнева.

 Молемс-а молемс истяшка питнень максомо неть клиникатнес, ансяк тынк тевесь. Арсетяно, васняяк эряви кевкстемс эсенк врачонк, эряви те тыненк эли арась. Кода мерсь ютазь недлясто пресс-конференциясонть Мордовиянь Здравоохранениянь министрась Олег Маркин, ней эрьвась эстензэ бажи путомс диагнозт, тейни тестт ды КТ-т. «Ули мелем тешкстамс, направления неть тевтнес максни участковой врач,  бути сон арси, што те обследованиясь тенк эряви. Эсь прянь лецямось, диагностикась, облучениясь, ярмаконь пандомась парс а панжить», – тешкстызе Олег Маркин.

Кой-кинень, нама, эсь прянть оймавтомга седе паро сонзэ теемс, эдь те ормась лиясто а невти прянзо. Учотано, паряк, курок неть тесттнэ кармить теевеме весенень ды питнень апак сае?!

Тесттнэнь теемась, кода нейтяно, мелявксось а пек покш, седе ков стака теемс сэредицятнень тевелявтнень компьютерной томография. Учомс те процедуранть лиясто сави зярыя част, ёвтнить соцсеттнесэ ломантне. Истят обследованиятнень теить кода питневтеме (врачтнень кучоматнень коряс) эли эсь меленк коряс ярмак лангс. Кода сеедьстэ эрси, шумбрачинек туртов лездамга ярмак лангс а вантано. Ялатеке ютксонок улить нужачисэ эрицят, пенсионерт, конатнень туртов истят питнетне а кепедевикс канст. Те пек талновты ды ризнэвти!

Тень кувалма пресс-конференциясо министрась Олег Маркин таго оймавтымизь: «Мордовиянь лециця учреждениятнес маласо шкастонть сыть колмо аппаратт компьютерной томограммань теемс. Вейкесь уш ускозь Саранскоень инфекционной больницяв. Кавтотнень учить С.В.Катковонь лемсэ больницясь ды Рузаевкань межрайонной больницясь».

Течинь чис истят аппараттнэ чинек-венек роботыть С.В.Катковонь лемсэ больницясо, Рузаевкасо, Зубова-Полянасо, Ковылкинасо, Краснослободскойсэ, «Юбилейный» микрорайононь 5-це поликлиникасо.  Те недлястонь республикантень истя жо сыть ИВЛ-нь 8 од аппаратт. Регионсонть весемезэ эйстэст 165.

Мезе невтить антителас анализтнэ?

Кода юты ормась

 Тынь а сэредтядо коронавируссо, эли инфицированиядонть мейле ютасть 5 чиде а ламо

 Моли орманть «пшти» фазась, тыненк эряви кирдемс самоизоляциянь режим ды теемс ПЦР –тест (кургосто эли судосто мазок)

 Тынк ормась уш юамо лангсо, ялатеке ули пелема лиянь заразямодо. Аштеде кудосо ды тееде ПЦР-анализ

 Тынь уш сэредиде коронавируссо

Весе клиникатне тешкстыть, сакшномс верень максомо эряви ансяк сестэ, зярдо тынк арасть кодаткак сэредьксэнк: а сэреди кирьганк, арась температуранк, лекси парсте судонк.

Гайневтинек «Новомед» клиникас, тосо тенек яволявтсть, КТ-с маласо сёрмадстомась ансяк июнень 26-це чистэ ды питнезэ малав 3 тёжат. «Вита-медсэ» жо сёрмадстомась ансяк июнень 29-це чис ды питнезэяк верце клиникадонть а яви.

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».