Пятница, марта 29, 2024
Важное

КОРОНАВИРУСОНЬ ИНФЕКЦИЯНТЬ КАРШО МИНЕК РЕСПУБЛИКАСО АЛКУКСКАК «ТЮРИТЬ» 2,5 ТЁЖАТ МЕДИЦИНСКОЙ РОБОТНИКТЬ: ВРАЧТНЕ, МЕДСЕСТРАТНЕ, САНИТАРКАТНЕ ЧИНЕК-ВЕНЕК ЛЕЗДЫТЬ СЭРЕДИЦЯТНЕНЕНЬ. 350 МЕДРОБОТНИКТЬ СЁРМАДСТОЗЬ РЕЗЕРВАС, АНСЯК СЫНСТ ЮТКСТОЯК МЕЕЛЬЦЕ ЧИТНЕСТЭ «ИКЕЛЬЦЕ ФРОНТОВ» ТЕРДЕЗЕЛЬТЬ ЗЯРЫЯ ОД ВИЙТЬ.


Васенце читнестэ саезь, зярдо республикасонть яволявтозель кезэвенть каршо тюремань режимесь ды больницятнес лоткавтозельть плановой госпитализациятне, «Республиканская клиническая больница имени С.В. Каткова» МР-нь ГБУЗ -нь поликлинической отделениянь чинь стационаронь врачось-терапевтэсь Анастасия Анатольевна Борискина полавтызе эсь роботамо тарканзо ды ютась куроксто (неотложной) лезксэнь максомань кабинетс. Боевой постсонть малав колмо ковт Анастасия Анатольевнань мирдезэяк. Дмитрий Петрович Борискин роботы врачокс-реаниматологокс С.В.Катков лемсэ больницянь анестезилогиянь-реаниматологиянь отделениясонть, кода мерить овсе «якстере зонасонть». Сонзэ кедь лангс ильтявить сехте стака сэредицятне ды знярошка профессионализма, кемечи, вийть эрявить врачтненень неть таркатнесэ, содыть ансяк сынсь.

Борискинтнэ семиянь советсэ сеске решизь кучомс эйкакшост эрямо велев бабаст туртов. Нама, ульнесь пелема, эдь сынь важодить больницясо, конась леци коронавируссо сэредицят ды цёрынест туртов седе паро карми аштемс васоло. Малав колмо ковт сынь гайневтнить ды вастневить вейкест-вейкест марто ансяк телефононть ды видеосвязенть вельде.

Анастасия Анатольевна тешксты, зярдо сон кочкизе врачонь профессиянть, свал арсесь – шожда а карми. А зярдо эште мирдетькак врач, сестэ неть семиятнесэ эрямонь лувось явови лиятнень эйстэ. Дежурямот, консультацият телефон вельде, важодеме тердемат сэредиця ялганть таркас, роботамот оймсема читнестэ, тонавтнемат, квалификациянь кастомань курсат… Истят ситуациятне врачтнень уцяскасо свалшкань тевть. Ансяк сынь эзизь тандавто Борискинтнэнь, конатне профессиясонть ды вейсэ 20 ламо иеть. Вастовсть сынь эште 1996 иестэ мединститутсо тонавтнемстэ, понгсть вейке группас.

Анастасия Отяжелень райононь Сабанцеле велестэ, Дмитриень чачома ошозо – Саранскоесь. Улемс врачокс – кавонест эйкакшпорань васенце мелест. Кияк сынст семиясто, роднясто-раськестэ врачокс арасель. 2002 иестэ од ломантне венчасть-урьвакстсть, прядызь Н.П.Огарёв лемсэ университетэнь Медицинской институтонь «Лечебное дело» специальностенть ды ушодызь эсь профессиональной кист. Анастасия Анатольевна Саранск ошонь 3-це номер поликлиникасо, конась мейле совась С.В.Катков лемсэ больницянтень, Дмитрий Петрович 10 иеть важодсь Саранскоень войнань ды трудонь ветеранонь пансионатсо медицинской службань прявтокс, мейле 8 иеть – «скорой помощьсэ» врачокс ды 2018 иестэ саезь сон С.В.Катков больницясонть АРО-нь реаниматолог. Борискинтнэнь, кода уш меринек, кавто цёраст: Денис ды Артём, сынь тонавтнить Саранск ошонь 36 № школасо 10-це ды 6-це классо. 16 иесэ Денис уш вишка пингестэ саезь арси туемс тетянзо-аванзо киява, келя, уцясказо истямо, ули мелезэ тонавтнемс врачокс-онкологокс. Цёранть обуцязо кеме, а пелиця, секскак, кода арсить Борискинтнэ, сынь лездыть Дениснэнь превспутомасояк, содамочитнесэяк.

Анастасия Анатольевнань роботамонь лувозо лезксэнь максомань кабинетсэнть а шождатнестэ, сэредицятне васняяк эдь сыть эсь поликлиникав, зярдо марить рунгосонть кодаткак мелявкст. Покш температура, козома, судокстомо, неть ды лия пеняцямотне неень шкане сехте вастневицят. Борискина весень васты «СИЗ» специальной костюмсо, конатне меельце шкатнестэ идить медроботниктнень коронавирусонь орманть эйстэ. Кода ёвтни Анастасия Анатольевна, эрявикс средстватне весе улить, майсемат кувалмаст арасть. Сэредицятне сынськак топавтыть весе вешематнень, сакшныть маскасо ды варьгасо. Кунсоломс сынст, сермадстомс лецямонь надобият ды сеедьстэ оймавтомс сыцятнень, эдь малав весе ней арсить, што сынст коронавирус, Анастасия Анатольевнань васенце тевезэ.

«Ломантнеде сыть ламо, роботатано кавто сменасо, – ёвтни Борискина. – Ялатеке вейкеяк врач эли медсестра минек поликлиникасто эзь оргоде важодема таркастонзо, эзь туе профессиястонть, зярдо яволявтозель орманть каршо тюремань режимесь, весе кирдить Гиппократонь клятванть, зярс тенек максы Пазось. Минек арась праванок нолдамс кеденек ды курок вейсэ изнясынек те апаро орманть!»

Медицинской роботникень чинть каршо минь арсетяно Анастасия ды Дмитрий Борискинтнэнень, весе врачтненень, медсестратненень ды те сферасонть трудиця ломантненень, шумбрачи, ванстомс эсь прянть, малавикстнэнь ды куроксто одов велявтомс икелень эрямонтень!

Марина ДЕВЯТОВА
 

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».