Пятница, марта 29, 2024
Важное


НЕЕНЬ ШКАНЕ РЕСПУБЛИКАНЬ, МАСТОРОНЬ ЭРИЦЯТНЕНЬ ТАГО ТАЛНОВТЫ КАЖОВ ОРМАСЬ. ЛАМО КОРТАМОТ ЭПИДЕМИОЛОГИЧЕСКОЙ ТЕВТНЕДЕ ДЫ ЛИВКСЭНЬ ПУТОМАНЬ КЕВКСТЕМАТНЕДЕ.

РЕСПУБЛИКАНЬ ПРЯВТТНЭ ВЕЙСЭ МР-нь ЗДРАВООХРАНЕНИЯНЬ МИНИСТЕРСТВАСО ВАЖОДИЦЯТНЕНЬ МАРТО ЮТАВТЫТЬ ПРОМКСТ, ЛАМОЛГАВТЫТЬ БОЛЬНИЦЯТНЕСЭ СТАКА, ЭШТЕ ПЕДЕ-ПЕВ АПАК ТОНАВТНЕ ОРМАСОНТЬ СЭРЕДИЦЯТНЕНЕНЬ ОД ТАРКАТ. КОВ СЕДЕ ЛАМО ТЕВЕСТ КАРМАСТЬ МЕДИЦИНАСО ВАЖОДИЦЯТНЕНЬ, КИТЬ ЧИНЕК-ВЕНЕК ТОПАВТЫТЬ А ШОЖДА канстост.

ТЕЧИ УЛИ МЕЛЕНЕК ЁВТНЕМС С.В. КАТКОВ ЛЕМСЭ БОЛЬНИЦЯСО ВАЖОДИЦЯДОНТЬ, ИНТЕНСИВНОЙ ТЕРАПИЯНЬ ДЫ РЕАНИМАЦИЯНЬ ОТДЕЛЕНИЯНЬ МЕДИЦИНСКОЙ СЕСТРАДОНТЬ И.Н. ЕЖОВКИНАДО. ТЕШКСТАСЫНЕК, ИРИНА НИКОЛАЕВНА ТЕ БОЛЬНИЦЯСОНТЬ ВАЖОДИ 1994 ИЕСТЭ САЕЗЬ.

ЭЙКАКШПИНГСТЭ ИРИНА ЕЖОВКИНАНЬ (ТРИФОНОВАНЬ) УЛЬНЕСЬ ПОКШ МЕЛЕЗЭ ТОНАВТНЕМС СТЮАРДЕССАКС, ЛИВТНЕМС ЛАМО ОШКА, ВАНКШНОМС ОМБО МАСТОРТНЭНЬ… СОН ЧАРЬКОДСЬ, ТЕНЬ ТУРТОВ ЭРЯВИТЬ ЛАМО СОДАМОЧИТЬ, СЕХТЕ ПЕК – ТОНАВТНЕМС ОМБО МАСТОРОНЬ КЕЛЬТНЕНЬ… СЕЕДЬСТЭ ЭЙКАКШПИНГЕНЬ АРСЕМАТНЕ КАДОВИТЬ А ТОПАВТОВИця МЕЛЕКС. ТЕЙТЕРЕСЬ СОДАСЬ, БУТИ ТУИ ТОНАВТНЕМЕ ВЕ ЁНОВ, СЕСТЭ КИЕ КАРМИ ЛЕЗДАМО ТЕТЯНСТЭНЬ-АВАНСТЭНь? КУШ СЫНЬ ЭРЯСТЬ САРАНСК ОШОНЬ СВЕТОТЕХСТРОЙ ЭРЯМОНЬ РАЙОНСОНТЬ, ЯЛАТЕКЕ ВЕСЕ КИЗЭТНЕНЬ ДЫ ОЙМСЕМА ЧИТНЕНЬ ЮТАВТСТЬ ОКТЯБРЬСКОЙ РАЙОНОНЬ ПАКСЯ ТАВЛАСО. ТОСО, КОВ ТЕРДСЬ СЫНСТ ПОКШТЯСТ-БАБАСТ МОДАСЬ. ДЫ НЕЙГАК, ЗЯРДО ПРЫ ШКА, СЫНЬ КАПШИТЬ ЭЙКАКШПИНГСТЭ САЕЗЬ ВЕЧКЕВИКС ТАРКАТнес.

Васень варштавкс лангс сынст семиясь мейсэяк прок эзь явово лиятнеде. Ансяк Ирина Ежовкинань эйкакшпингесь прась стака вейксэньгеменце иетненень, зярдо масторлангсонть ушодовсь тевтнень одс ладямонь (перестройкань) шкась.
Тетязо-авазо, Николай Никитович ды Мария Борисовна Трифоновтне, Пакся Тавласо чачозтне-касозтне, стакачиде а пелицят, тевень вечкицят. Сынь тейсть весементь, штобу кавонест тейтерест – Ирина ды Наталья – мейсэяк авольть явово ялгатнеде. Эдь сестэ ульнесть стакачить оршамопелень, лия мезень коряс. Се шкане Саранск ошонь Светотехстроень 38 номер общеобразовательной школась тонавтнемань заведениятнестэ сехте покшоль. Эрямонь од районсонть эйкакштнеде пек ламольть. Та-кода ават-тейтерть кортасть-тейсть ды прасть вейке мельс: вейксэ классонь прядомадо мейле Ирина моли тонавтнеме Ардатовань медучилищав.

Те меленть истя жо шнызе классонь прявтось, биология предметэнь тонавтыцясь Николай Михайлович Феоктистов. Тонавтнемась тейтеренть туртов вечкевсь, экзаментнэнь макссь парсте, ансяк кудось аламодо васололь. Секс шкань ютазь сайсь мель тонавтнеманть поладомс Саранскоень медучилищасо.
Истя, 1994 иень августонь васенце чистэ, Ирина Николаевна важодемань кинзэ ушодызе Саранск ошонь сестэ эштё 3 № больницясонть. Кода содатано, ней сон кандтни С.В. Катков лементь.


Се шкастонть те больницясонть терапевтической корпусось эштё арасель, эдь ней эйстэдест мик кавто. Од специалистэсь ушодсь важодеме кардиологиянь отделениянь процедурной кабинетсэ. Виде, пукшос уколтнэнь ульнесь теемс а стакаль, а вана верень сантнэс теемась вешсь аволь ансяк содамочить, истя жо ёрокчи. Ирина Николаевна те шкас эзизе стувто профессияс васенце тонавтыцянзо Екатерина Николаевна Аникинань. Ламос сонзэ тонавтызе сырнень кедь ломанесь. Шкань ютазь, специалистэнть ёрокчинзэ редязь, сонзэ ютавтызь важодеме васняяк инфарктной отделениянь интенсивной палататнесэ стакасто сэредицятнень лецямо, мейле – интенсивной терапиянь ды реанимациянь отделенияв, косо важодсь кото иеть.
Кевкстеманок лангс, кода цидярды истят ломантнень ютксо (а мезть сёпомс, аволь весе цидярдыть неть апаро орматнеде), корты,неемс ломаненть тоначив туеманзо пек стака, тенень зярдояк а тонадат.
Ирина Николаевнанень а седе шожда ульнесь важодемс старшей медсестракс неврологиянь отделениясояк, косо сехте ламотне аштесть эпилепсиянь орма марто. Ламо таркасо савсь тензэ важодемс. Невтемакс, вете иень перть ульнесь старшей медсестракс хирургиянь отделениясо, тосто таго тердизь интенсивной терапиянь ды реанимациянь отделенияв, косо важоди те шкас.

Валонзо коряс, истямо стака шка, кода ней, тевенть топавтомсто эштё арасель. Те иень тундось ламо полавтомат кандсь минек эрямонтень, сехте пек – медицинасо важодицятненень. Истя, малав колмо ковонь перть сон явозель семиянзо эйстэ. Сюкпрянь валт ёвты С.В. Катков лемсэ больницянь прявттнэнень, сехте пек прявт врачонтень В.В. Щаповнень. Вячеслав Викторович тейсь ды полады тееме весементь, штобу аволь ансяк сонзэ коллективсэнть важодицятнень ванстомс апаро ормадонть, истя жо малавиксэсткак. Невтемакс, апрельстэ саезь июльс ламот юткстост, кинень савсь улемс стакасто сэредицятнень ютксо, эрясть Саранскоень сехте паро «Шератон» инжень кудосонть, косо эрьва валске эйсэст питневтеме тантейстэ андсть. Виде, те шкастонть тунь а шожда ульнесь малавиксэст туртов. Нама, седе пек сетненень, кить эсь пряст апак вансто идесть лиятнень эрямост.

ПОКШ СЕМИЯСОНТЬ – УЦЯСКАСЬКАК СЕДЕ ПОКШ

Неень шкане одтнэнь ютксто сеедьстэ редятано истямо тев: теевить содавиксэкс, аламо шкань перть вастневить ды теевить мирдекс-никс. Ежовкинтнэнь семиясо весемесь ульнесь лиякс, алкуксонь ладсо.
Эштё школасо тонавтнемстэ кизна Пакся Тавлав малавиксэнзэ туртов якамсто сон теевсь содавиксэкс Валерий Ежовкин марто, кие истя жо сакшнось инжекс те велентень покштянзо-бабанзо содавтомо. Сынст вечкемась таргавсь кувать, нардевчизэ варчнезь шкасо. Ирина Николаевна Валерий Викторовичень армиястояк учизе. Масторонть икеле долгонть топавтомадо мейле, 1995 иестэ, одтнэ урьвакстсть-венчасть.

Иень ютазь чачсь васенце цёраст Артемий, колмо иень ютазь – Никита. Веженсь цёраст Андрей чачсь 2010 иестэ, сон ней 30 номер школань 4-це классонь тонавтниця. Сехте покшось, Артемий, Н.П. Огарёв лемсэ МГУ-нь Механикань ды энергетикань институтонть прядомадо мейле контрактонь коряс кавто иес тусь служамо армияв. Кавонест покш цёратне пек вечксызь спортонть, невтнить ёрокчист эрьва кодамо пелькстамосо.
Эрямонь шумбра лувонть ветямо тонавты эйсэст тетяст, Валерий Викторович. Сонсь кудазорось образованиянь коряс – юрист, комсь иень перть важоди МР-ва МВД-нь ГИБДД-сэ. Ней – регистрациянь отделениянь прявтонь полавтыця.
Веженсь цёрынест Андреень туртов ков седе пек вечкеви артомань тевесь, сон яки художественной школав. Школасо тонавтни ансяк «ветес».

КОЛЛЕКТИВСЭНТЬ СЕДЕ ЛАМО ОД ЛОМАНТЬ

Медицинань тевсэнть эрьва важодицянть тевезэ ламодо ашти ялгатнень эйстэ. Сынь топавтыть вейсэнь важодема, косо прявт тевесь – идемс ломаненть эрямонзо, шождалгавтомс ёжомарямонзо. Ламос эйсэст тонавты интенсивной терапиянь ды реанимациянь отделениянь прявтось Людмила Анатольевна Сарыгина, тень чарькодьсы эрьвась, кие алтызе эрямонзо медицинантень.
И.Н. Ежовкинань валонзо коряс, коллективсэст седе ламотне од ломанть (33-35 иесэть).
Неень шкане, зярдо больницятнесэ кармасть ков седе ламо сэредицят, сыненст лездамо сакшныть лецямонь лия учреждениятнестэ. Тагояк седе ламотне юткстост одт ды сеть, кить икеле тенст уш лездакшность. Эдь ансяк вейсэ изняви те кажов ормась.
Меельцекс Ирина Николаевна энялдсь пшкадемс республикань эрицятненень, штобу сынь ванстовольть пряст ушосо, лавкасо ды лия учреждениятнесэ улемстэ. Кандтнемс маскат, оршамс перчаткат, а пурнавкшномс вейс ламонь-ламонь…
Течи, октябрянь 21-це чистэ, Валерий Викторович ды Ирина Николаевна Ежовкинтнэ тешкстыть семиянь кенярксчист – «сиянь» свадьбаст. Мирдть-нить те эрямосонть топавтыть ине тевть: сынь трить-кастыть колмо цёрат, идить ломанень эрямот. Валерий Викторович вансты ломантнень килангонь зыянов авариятнеде, Ирина Николаевна эрьва чистэ бороци кажов орматнень каршо…
Течи ёвтатано тенст поздоровт ды покш сюкпря паро тевест кисэ.
«Эрзянь правда» газетань коллективеськак ёвты седейшкавань поздоровт те ояксчисэ эриця семиянтень ды арси кеме шумбрачи, эрямосо уцяска ды весе арсезенть топавтома. Кадык эрямосост карми улеме «сырнень» свадьба ды ламо лия кенярксчить!


Валентина ЮДИНА

О ГАЗЕТЕ "ЭРЗЯНЬ ПРАВДА"

Газета Эрзянь правда в настоящее время издается один раз в неделю на 16 страницах, четыре из них в цвете. Газета широко отражает вопросы общественно-политической, социально-экономической, культурной и духовной жизни республики, публикует международную информацию. «Эрзянь правда» распространяется в Оренбургской, Пензенской, Самарской, Ульяновской, Нижегородской областях, в республиках Татарстан, Чувашия, Башкортостан. Вместе с тем, для эрзян России вот уже не один год успешно функционирует электронная версия газеты, которую можно в настоящее время читать в Интернете. В этом большая заслуга всего редакционного коллектива газеты «Эрзянь правда».