Минек республикась, кода весе мастороськак, неень шкане аноксты гриппень ды экшендямонь (ОРВИ-нь) орматнеде ливксэнь теемантень, истя жо пневмококконть – пневмониянть эйстэ. Ливкстнэ кармить теевеме весенень, кинь ули мелезэ, сехте покш мелесь явови рискень группас совицятненень.
Кода уш минь пачтинек тиринь газетань лопатнесэ, Мордовиясо умарьковсто-таштамковсто республикань эрицятнень ютксто малав 600 тёжат эрицятненень путовить пневмококкто ды гриппте ливкст. Ютксост: 100 тёжадо ламо эйкакшт, 118 тёжат сыре ломанть, 32 тёжат медикть ды тонавтыцят, 16 тёжат вузсо-косо тонавтницят.
СОДАДО!Ливксэнь путомадо мейле ормадо иммунитетэсь тееви кавто недлянь перть. Неень сезононь гриппень сехте стака шкась сави якшамковонтень. Сынсь экшендямонь орматне ушодовить октябрясто. Секс ливксэсь эряви теемс икелепелев, штобу ванстомс аволь ансяк эсенк прянк, истя жо малавиксэнк, эйкакшонк, важодема ды тонавтнема таркасо ялганк.
Мелят гриппте ды ОРВИ-нь орматнеде ливкст путсть республикань малав пелест эрицятне. Те лездась Мордовиясо сэтьместэ ютавтомс педиця ормань шканть.
Неень шкане медицинань учреждениятнесэ важодицятне ютавтыть вастовомат сеть учреждениятнень, организациятнень коллективтнень марто, кинь ули мелест содамс ливкстнэнь лезэвчидест ды кинень васняяк эряви сынст теемс.
Неть читнестэ «С.В.Катков лемсэ РКБ-нь» МР-нь ГБУЗ-нь поликлиникань отделениянь прявтось Ю.Ю.Шеволаева ды медицинань профилактикань отделениянь прявтось Н.А.Воробьева вастневсть Рузонь драмань театрань коллективенть марто.
Вастовоманть ушодовомсто Ю.Ю.Шеволаева тешкстась, масторонь келес эрьва иестэ Профилактикань ливксэнь теемань раськень календарденть, зярдо теевить ливкст сезонной грипптенть. Седе тов Н.А.Воробьева пачтясь тедедень ды сы иень башка ёнкстнэде, шумбрачинь ванстомга профилактикань мератнеде.
2020 иень сёксень-телень шкасто башка мель явома од коронавирусонь педиця орманть а нолдамонтень. Теке шкасто а эряви стувтомс, гриппесь ды экшендямонь педиця орматне, кода коронавирусоськак, кандыть зыян лексемань органтнэнень ды сеедьстэ пачтить пневмониянтень.
Тень ловозь, ливксэнть шкастонзо путомась эрси ломаненть шумбрачинзэ идемакс, лиясто мик эрямонзо ванстомакс, кинень педи COVID-19 ормась.
Истя жо аштить тевтне пневмококконть марто, конанень ушодкс путы бактериянь пневмониясь. Бути ломанесь эштё ормалгады вирусной пневмониясо, сестэ ёжозо ков седе пек стакалгады.
Н.А.Воробьевань валонзо коряс, миненек а эряви стувтомс васняяк седе, гриппесь те стака орма. Редяви сон аволь сеске, сеедьстэ сонзэ човорить экшендямонь орманть эли од коронавирусонь инфекциянть марто секс, мекс сынь вейкеть симптомтнень коряс. Те – судокстомось, козомась, покш температурась. Содадо: истямо «экшендямонь» ормадонть ломаненть эрямось а свал идеви. Кода невти статистикась, масторлангсо эрьва иестэ те вирустонть ды эйстэнзэ ушодовиця ёжомарямонь стакачитнеде кулыть 40 тёжат ломанть.
Ливксэнь путомась лезды анокстамс прянть те ормантень: теи виев иммунитет, эли жо ормась юты седе шождасто.
Кода мерсь Н.А.Воробьева, сынст поликлиникасонть, кода целанек республикань лецямонь учреждениятнесэ, васняяк, мель кармить явомо умонь (хронической) ормасо сэредицятненень, сетненень, кинень топодсть 60 иеть, школав ды эйдень кужов якицятненень.
Весемесь ютавтови питнень апак сае. Ливксэсь путови эсь поликлиникатнесэ, ков ломантне якить шумбрачист витеме. Весе кевкстематне, конат течи талновтыть ломантнень, максовить участковой врачтненень.
Пневмониядо ды гриппте ливкстнэ мереви теемс вейке чистэ.
Седе тов «С.В.Катков лемсэ РКБ-нь» МР-нь ГБУЗ-нь поликлиникань прявтось Ю.Ю.Шеволаева макссь каршо валт Рузонь драмань театрань важодицятнень кевкстемаст лангс. Сынст талновтсь, ливксэнь теемадо мейле ёжомарямось, вакцинациянть лезэвчизэ ды кодамо шкасто сонзэ седе паро путовтомс.
В.ЮДИНА