Те иень даволковонь меельце читнестэ алкуксонь казне теезель Ромодановань муниципальной райононь Сахарной завод посёлкань эрицятненень. Тосо панжовсь од, мазый, валдо, неень шкантень ладиця фельдшерэнь-акушерэнь пункт.
Те зданиясь теезель «Здравоохранение» национальной проектэнть лувсо ды «Медико-санитарной васенце лезксэнь максомань системанть виевгавтомань» эсенек региононь проектэнть эрямос совавтоманть вельде, федеральной бюджетэнь средстватнень тевс нолдазь. Аволь умок сонензэ покш питне путсть Мордовиясо ОНФ-нь представительтне.
Тундонь васенце кенярксчиденть икеле сюлмавинек медицинань од учреждениянь фельдшерэнть Евгения Егоровна Зинина марто. Те эрзянь авась вана уш 45 иеть важоди медицинасо. Сон течи минек редакциянь инже.
Евгения Зинина (тейтерьксэнь фамилиязо Прончатова) вишка пингстэ саезь пек вечксь книгань ловномо. Семияст покшоль, эрясть Ицялбуень Ламбаське велесэ. Тетязо-авазо, Егор Васильевич ды Анна Алексеевна Прончатовтне, войнадо мейлень стака иетнестэ трясть-кастсть вете эйкакшт. Кудазорось, Егор Васильевич, ульнесь сырнень кедь ломань.
Арасель истямо тев, конань бу сон аволь машто тееме. Маштсь кудонь чапомо, нешке мельга якамо… Нинзэ марто васня вейке кудо путсть, шкань ютазь, кода семияст ламолгадсь, омбоце – седе покш ды мазый. Нешкепиреяк кирдсь, штобу эйкакштнень лиятнень лангс сельмест аволь сявадо, свал тантей ярсамопель кудосо улевель. Ламо паро ды валдо ледстнемат кадсь мельганзо те эрзянь цёрась, алкуксонь кудазорось. Сонзэ вийсэ теезь ды одкстомтозь кудотне те шкас аштить тиринь велесэ. Куш умок уш тусь эрямосто, паро тевензэ эзть стувтово те велень се шкань эрицятнень ды сынст эйкакштнень-нуцькатнень ледстнематнесэ. Теде сеедьстэ ёвтни Анна Алексеевна низэ, кинень тедеде топодить 94 иеть. Тиринь велензэ а кады те шкас, вансты кудоюртонзо.
Неень шкане Ламбаськесэ сон эри аволь ськамонзо, тиринь велес истя жо эрямо ды важодеме кадовсть кавто цёраст – Иван ды Михаил Прончатовтне. А вана веженсь цёраст, Георгий Егоровичень, ульнесь покш мелезэ улемс военноекс. Сон – топавтовсь. Ней уш цёрась пенсиясо, эри Оренбургонь ёнксонь Тоцк ошсо. Прончатовтнень семиясо сехте покшось, Евгения, кода уш вере ледстинек, пек вечксь эрьва кодамо литературань ловномо. Мелезэнзэ тукшнось кода эсенек, истя жо омбо масторонь художественной литературась. Авазо свал эйсэнзэ мурниль, ды мериль тензэ: «Тейтерем, ванстыть сельметь, пингесь эштё кувака!»
Чарькодеви, сестэ валдось пек берянель, сон жо вечкиль ловномо телень чокшнетнестэ, кода весе мадильть, кодаяк книгастонть а сезевиль. Школасо тонавтнемстэ, котоце классос пачкодемстэ, кудоютксо вейкеяк художественной книга апак ловно эзь кадовкшно. Тейтерьканть эйкакш пингень арсематнесэ ульнесь вейке мель – улемс медицинасо важодицякс.
Сон топавтовсь кавксо классонь прядомадо мейле, зярдо сыргась инжекс Саранскоев малавиксэнзэ туртов. Аванстэньгак апак ёвта саинзе мартонзо документэнзэ ды снартсь максомс экзамент Саранскоень медицинской училищав фельдшерэнь специальностенть коряс. Сень лангс апак вано, сон тонавтнесь велень школасо, содамочинзэ жо ульнесть пек парт, Женянь апак кавтолдо саизь васенце курсос. Ансяк теде мейле малавиксэнзэ кармасть содамо тейтерест седейшкавань мелензэ топавтомадо паро кулядонть.
Тонавтнемань ниле иетне ютасть курок. Алкуксонь школакс ульнесть больницятнесэ ютавтовиця практикатне. Сехте пек мелезэнзэ тусь Ицялонь райононь Кемля посёлкань больницясо важодемась. Ламо превс путомат ды лезэв арсемат тенст макссь сестэ тосо важодицясь, республикань келес содавикс прявт врачось Социалистической Трудонь Героесь, РСФСР-нь заслуженной врачось Анна Васильевна Парамонова. Сестэ од практиканткась весе отделениятнень ютынзе: хирургиянь, терапиянь, эйкакшонь ды истя седе тов.
Виде, медицинань малав весе ёнкстнэс чарькодиця од специалистэнть тонавтнеманзо прядомадо мейле тердсть тов важодеме.
Содазь, советской шкатнестэ эрьва од специалистэнть туртов ульнесь тарка, ков сонзэ кучилизь важодеме вузонь, техникумонь прядомадо мейле.
Евгения Прончатовань (Зининань) мелезэль молемс важодеме Ицялбуень Протасова велев. Куш прявт врачось Анна Васильевна тензэ кортакшнось кадовомс райононь куншкакурос, келя, минек кедьсэ седе ламонень лезэ кандат, ялатеке од тейтересь тусь тов, ков кучизь тонавтнемань заведениясто.
Эрямосонть а содатано икелепелев, мезе уцяскась тенек анокстась. Лиясто, маряви, аволь весемесь эйстэнек ашти, мольтяно тов ды вастсынек се ломаненть, кинь тенек анокстызе сонсь эрямось.
Истя лиссь Евгения Зининань эрямосояк. Нама, сон эзь сода, мезе сонзэ учи те таркасонть, ков кучизь важодеме, потсонзо уликс вайгелесь прок кармавтсь эйсэнзэ молемс те велентень. Ды эзь маняво.
Истя лисськак. Тосо важодемстэ сон вастызе эрий ялганзо. Аламо шкань ютазь, тиринь велев армиясто сась од цёрась Дмитрий Зинин. Сон служась кувать, колмо иеть, ульнесь морфлотсо. Сеске кода неизе од тейтеренть, сынст велень фельдшерэнть, вечкевсь тензэ.
Венчамодо-урьвакстомадо мейле одтнэ Протасовасо кувать эзть кирдеве. Сестэ весе малавиксэст эрясть Ромоданова посёлкасо, важодсть Сахарной заводсо. Аламонь-аламонь кортызь одтнэнь самс сынст малав.
Весементь педе-пев арсезь-кортазь, од семиясь полавтызе эрямо тарканзо. Кудазоронтень муевсь тев Сахарной заводсо – сон ульнесь тевензэ парсте содыця сварщик, Евгения Егоровнаяк поладызе вечкевикс тевензэ – кармась Сахарной заводонь территориясо фельдшерэкс. Од семиянтень макссть кудо, конань сынь эсест кедьсэ паролгавтызь-мазылгавтызь. Ансяк семияст покшолгадомадо мейле савсь тенст сонзэ седе келейгавтомс.
Шкань ютазь сынст ёнкссо «Мордовсельстрой» организациясь тевс нолдась паро проект, конань коряс эрьва эрицясь, кинь ули покш мелезэ, эстензэ путы кудо.
Весемесь бу улевель паро, бути аволь вейксэньгеменце иетне, зярдо весемесь ёмась лавкань лавсятнень лангсто.
Сынь парсте содасызь, кодамо стакачи марто вастовсть сеть ломантне, кить перестройкань шкасто путсть эстест кудот. Стройматериалтнэнь кисэ, косо тейсть кирьпецть-мезть, таргавсть кувака очередть, ламо мезе эзь сатокшно сеть иетнестэ. Мик сетненьгак, кинь ульнесть аламошка ярмакост, рамамс жо эрявиксэнть ульнесь а косто.
Пекставсть заводтнэ, киртявсть важодема таркатне…
Неть стакачитнень лангс апак вано, Зининтнэ путсть эстест од кудо, семиясост кассть кавто цёрынест. Эрямс бу ды кенярдомс. Ансяк апак учонь куломась саизе эрямосто Дмитрий Павловичень. Евгения Егоровнанень сестэ эштё ниленьгемень иетькак арасельть.
Кеме обуця эрзянь авась весе стакачитнень цидярдынзе, цёратнень алкуксонь ломанекс кастынзе. Покш цёрась, Александр, тонавтнемадо мейле важоди Ицялбуесэ механикекс, омбоцесь – Сергей, тетянзо ладсо, Сахарной заводсо мастер. Евгения Егоровнань покш мельспарозо – ниле нуцьканзо, кинень сон свал кенярды.
Весемева неявсь, те авась седейшкава вечксы весть кочказь тевензэ. Сон покш мельспаросо ёвтнесь, кодашка кенярксчисэ аштить Ромодановань Сахарной заводонь эрицятне истямо казненть коряс. Умок учость те таркасонть эриця ломантне фельдшерэнь-акушерэнь од пунктонть.
– Сонзэ теемадо кортамотне ушодовсть 2012 иестэ саезь, – ледстни Евгения Зинина.
Медицинасо ламо од ды паро тевень ушодоматнень те ёнксонь эрицятне сюлмить Ромодановань райбольницянь прявт врачонть Алексей Назаров марто.
– Арасель вейкеяк чи, штобу Алексей Леонидович аволь са те таркантень, косо мольсь фельдшерэнь-акушерэнь пунктонть теемась, – ёвтни Евгения Егоровна. – Аволь ансяк строительтнень, минек мартояк свал ветясь кортамот важодемань од тарканть тееманзо коряс.
Ледстясынек, фельдшерэнь-акушерэнь пунктсонть сынь важодить кавонест санитарканть Галина Васильевна Бурдаева марто.
Фельдшерэсь истя жо сюкпрянь валт ёвтась Ромодановань муниципальной райононь прявттнэнень, МР-нь Госсобраниянь депутатонтень, «Ромодановосахар» ООО-нь директоронтень А.И. Атласовнень ды Ромоданова посёлкань администрациянь прявтонтень Татьяна Викторовна Колмыкованень.
Виде, сонськак Евгения Егоровна, 65+ иетнень лангс апак вано, ливксэнть кавксть путомадо мейле, лиссь важодеме. Эдь сонзэ тевесь неень шкане пек эрявикс Сахарной завод посёлкань эрицятнень туртов.
Авань кенярксчинть кувалма ёвтатано Евгения Егоровнанень поздоровт ды арсетяно кеме шумбрачи, кувака пинге ды эштё седеяк ламо паро тевть ломантнень эрямост идемасо, сыненст шумбрачинь каземасо.
Валентина Юдина