Минь уш кода-бути тонадынек нееме трудий ломантнень покш предприятиятнень коллективтнесэ. Сынст роботаст неявикс, топавтыть путозь тешкстнэнь, теить эсь тевест седейшкава. Эйстэст ёвтнить эрьва кодат газетатнесэ, телевидениянь ды радионь передачатнесэ. А вана улить истят коллективть, конатнеде аволь ламо ёвтневи, тень коряс сынь кода-бути стувтозь.
Орданьбуень райононь Редкодубье веленть маласо, Ратор леенть чиресэ неяви пек мазый кудо. Ве ёнга ардыцятне арсить, тесэ кодамояк оймсемань кудо. Зярдо-бути истя ульнеськак. Ине Отечественной войнадо мейле тесэ ульнесь военной лётчиктнень туртов санатория. Мейле шкатне полавтовсть, эрямось кармась паролгадомо. Истят санаториятне кармасть панжтневеме лия таркатнесэяк. 1963 иестэ тесэ панжозель сыре ломантнень ды инвалидтнэнь туртов Орданьбуень психоневрологической интернатось. Се шкастонть саезь ламо полавтомат ульнесть, лемтнеяк полавтневкшнесть, эрицятнеяк. Течинь чистэ тесэ эрить 500 ломанть. Сынь эрьва косто. Арседе тынсь, аволь эрьва велесэ ней улить зняро эрицят.
Ютазь иетнень перть интернатсонть пурнавсь роботыцянь пек паро коллектив. Тесэ роботыть седеймариця ломанть, сындест малав 200 роботыцят. Директорокс ламо иеть роботы Василий Леонтьевич Тремаскин. Прявтось маштсь ладямо истя роботанть, штобу тесэнь эрицятне авольть маря кодаткак стакачить. Зярдо-бути тесэ ульнесь эсест производствасткак. Нолдасть продукция, стыльть матраст, одеялат, лият мезть. Мейле тень верде эзть мере теемс, ды весемесь лоткавтозель.
Наталья Ивановна Тарнаева важоди тесэ старшей медсестракс. Сон тескень, шабра Покш Поляна велень. 1978 иестэ прядызе Орданьбуень медицинской училищанть. Ульнесь мелезэ улемс эйкакшонь медсестракс. Тонавтнеманть прядомадо мейле кавто иеть роботась Саранск ошонь 4 № больницясо специальностень коряс. Весементь полавтызе од порась. Вастызе шабра велень од цёранть. Налксесть свадьба. Велесь – аволь ош, робота сеске а муят. 1981 иестэ сась роботамо интернатов медицинской сестракс. Васенце шкатнестэ ульнесь аволь шожда. Роботась эдь аволь эйкакштнень марто сюлмавозь, тесэ сэредицятне овсе лият ды прясткак лиякс ветить. Тейтересь теде эзь тандадо ды топавтсь эсь тевензэ. Роботазо апак неяво эзь кадово. 2004 иестэ путызь старшей медсестракс. Бути ваксс аравтомс истямо роботанть медицинань учреждениясо, то сон пек явови. Интернатось – аволь медицинань учреждения ды роботаськак лия. Кода видькстась сонсь Наталья Ивановна, тензэ пек ламо шка сави котьмамс личной тевень конёвтнесэ. Сындест жо малав 500. Ламо шка сави ваномс порядканть ды ваньксчинть мельга, тейнемс обходт. Бути неи эрямонь правилань кодаткак коламот, снартни сеске витемс. Те жо, аванть валонзо коряс, пек а шожда тев. Эрьванть эряви содамс обуцянзо ды маштомс муемс мартонзо кель-вал. Арседе тынсь, зняро эряви тень лангсо роботамс, штобу содамс 500 ломантнестэ эрьванть обуцянзо. Наталья Ивановна Тарнаева весе тень топавты.
Эрицятненьгак вейке комнатас эрямо кочкить обуцянь коряс. Эсь роботанзо авась вечксы ды, кода мерсь, бути вийтне кармить, карми роботамо седе товгак.
Наталья Ивановнань тейтерезэ, Ольга, тусь аванзо киява. Сон истя жо медицинской роботник. Роботы Саранскоень лецямонь учреждениясо. Наталья Ивановна Тарнаева – трудонь ветеран, казезь Российской Федерациянь Социальной защитань министерствань Почётонь грамотасо. Теде башка, ламо казнензэ Орданьбуень райононь ды интернатонь администрациятнень пельде.
Вениамин Валентинович Игайкин сась роботамо интернатов аволь сеске. Сон истя жо теке райононь. Чачсь-кассь Куцян эрзянь велесэ. Прядсь средней школа. Служась армиясо. Самодо мейле кирдинзе экзаментнэнь Мордовиянь Н.П.Огарёв лемсэ госуниверситетэнь медицинской факультетс. Тонавтнеманзо прядызе 1988 иестэ. Кучокшнызь роботамо Саранскоень психоневрологической больницяв. Сисем иеть роботась отделениянь прявтокс. Теде мейле роботась медицинань лия учреждениятнесэ. Кемень иеде икеле сась роботамо Орданьбуень интернатов. Цёранть туртов тесэнь роботасонть мезеяк од арась. Саранскоень психоневрологической больницянь эрицятнестэ ламот ней эрить тесэ. Зярдо кевкстия Вениамин Валентиновичень, мейсэ явови тесэнь роботась медицинань учреждениятнень эйстэ, сеске мерсь: «Весементь лангс тесэ эряви ваномс лия ёндо. Сави топавтомс экспертизань ламо кевкстемат. Теке марто интернатось – аволь лецямонь учреждения. Тень лангс апак вано, минь снартнетяно максомс эрицятненень медицинань лезкс. Ломантнеде ламо, эрсить шкат, зярдо весементь мельга стака кенеремс. Меельце шкастонть кармасть само эрицят пек стака орма марто. Чумось тенень тынсь чарькодтядо мезесь. Ломантне симить эрьва мезде ды мейле ормалгадыть».
Вениамин Валентинович сонсь вети шумбра эрямо лув. Роботамонь кабинетсэнзэ столензэ вакссо ашти 32 килограммань сталмосо гиря. Зярдо карми сиземе, покш мельсэ кепси. Вениамин Валентинович Игайкинэнь Людмила тейтерезэ истя жо тусь тетянзо киява. Сон истя жо врач. Ламо иень перть важодеманть кис Вениамин Валентинович Игайкин казезь Российской Федерациянь Минсоцзащитань Почётонь грамотасо.
Олег Викторович Чмелев – директоронь полавтыця. Неть тевтнень топавты аволь вейке ие. Тевтнеде жо байтяк. Интернатонть покшолмазо 6,5 гектарт. Мезть тесэ ансяк арасть: вете эрямонь корпуст, мастерской, кавто котельнойть. Олег Викторовичень икелень роботазо сюлмавозель велень хозяйствань тевтнень марто. Истя уш лиссь эрямосонть, савсь полавтомс важодема лувонть. Интернатсонть тевтнеде ламо. Олег Викторович теде эзь тандадо. Мади косояк светэсь эли крансто а чуди ведесь, весе чиить Олег Викторович мельга. Сон курок ладясынзе витнемань ды лия тевтнень. Директоронь полавтыцянть течинь чистэ сехте покш мелявксозо – эрямонь од корпусонть строямось. Сон строяви федеральной ярмактнень лангс. Строицятнень мельга истя жо эряви ваномс. Од корпусонть аравтлувонь коряс эряви нолдамс тевс ноябрянь 30-це чистэ. Строицятне аламодо а кенерькшнить. Кода илязо уле, те иестэнть од корпусось панжсынзе кенкшензэ.
Николай ЕВДОКИМОВ
Фототне Э.Ретунскоень