Неень шкане минек од ломантне, ды аволь ансяк сынь, покш мель явить спортонтень, эсь юткошканть активной лувсо ютавтомантень. Истятнэнь ютксо эрзянь церась Юрий Овчинников. Аволь умок сон ульнесь Эльбрус пандонть прясо. 10 чить ютавтсь спортонь кэмпсэ.
Юрий Владимирович Овчинников чачсь-кассь Дубенкань райононь Кобале велесэ. Школадо мейле тонавтнесь Дубенкань техникумсо машинань ветицякс. Армиядо мейле тусь важодеме Зеленоградов. Тосо муизе уцясканзо – Виктория нинзэ, конань марто трить кавто тейтерькат: Алинань ды Ксениянь. Ней сынь тонавтнить 7-це ды 6-це классо. Весе семиясь яви покш мель спортонтень. Ансяк истя ульнесь аволь свал.
Весемесь, кода евтни сонсь Юрий, ушодовсь 2019 иестэ. Весть чокшне ланга роботадо мейле Виктория низэ тензэ мерсь: «Минек Зеленоградсо ютавтови «Гонки с препятствиями» эйкакш марто семиятнень туртов спортонь пелькстамо, участниктненень улема кавтонь-кавто – ава-эйкакш, тетя-эйкакш. Эрьга, тон Алина марто кармат чиеме, а мон Ксюша марто». Юрий каршо эзь моле, мекевлангт, паро мельсэ вастызе те кулянть. Кудосо стяко аштемадо те ульнесь пек паро шкань ютавтома. Те пелькстамосонть вейке вайгельбень чиемасо Юрий сайсь 1-це тарка. Изнясь кода ськамонзо, истя Алина тейтерензэ марто чиемасонтькак.
Тосо изнямодо мейле сынст тердизь чийнемань коряс ансяк панжозь од секцияс, ков кармасть якамо семиянек. Истямо лувсо эрямось пек тусь мельс весень туртов. Ней уш тонадовсть тенст ошонь парксо эрьва чинь чийнематне. Алина ды Ксюша тренировкатнень ютавтыть спортшколань стадионсо, Виктория чийни юткошкасто, сонсь Юрий – важодемадо мейле.
– Юрий, кодамо пелькстамосо эште невтить ерокчить? Улить-арась изнявкст?
– Пек мелезэнь тусь «Чих-Пых Трейл» пелькстамось, те «Open Band Trails» сериянь чиема. Тосо чийнеме вечкицятнень ютксо 6 вайгельбень ютамсто саинь 1-це тарка. 2021 иестэ ардтнинь Белоруссиявгак. Тосо изнямонь тарка эзинь сае, монденьгак виевть ульнесть пелькстыцятне. 2022 иестэ Санкт-Петербургов пачколинь. Тосо «Ниндзя полоса» пелькстамосонть эсь ерокчист невтизь спортсментнэяк, Россиянь чемпионтнэяк, физкультурань вечкицятнеяк. 100 метратнень эрявсь чиемс нурька шкас, теке шкастонть ютама ламо эрьва кодат пирявкст. Истя жо ульнинь Ярославль, Тверь оштнень марафонтнэсэ. Москов маласо аштиця оштнесэ ютавтовиця мероприятиятнесэ жо минь свалшкань участникть.
– Содатано, те ульнесь ансяк ушодкс ды тон кармить вешнеме седе стака чийнема таркат. Кода теевить содавиксэкс пандонь китнень марто?
– Васенцеде пандо пряс кузинь Сочисэ, вейсэнь чиеманть лемезэ ульнесь «Вертикальный километр». Тосо вана савсь тень чиемс натой спортонь мастертнэнь марто… Ды финишентень пачкодинь васенце 200 ломантнень ютксо. Весемезэ жо чиицятнеде ульнесть 1000 ломанть.
Евтнян истямо тевде, конась лиссь те дистанциянть чиемстэ. Вейке содавиксэм теде икеле пек ламо ды виевстэ тренировась. Натой «Ironman» (кшнинь ломань) лемгак тензэ максокшность. Те лементь получамга эряви ютамс мельга-мельцек молиця колмо пелькстамот: васняяк малав 4 вайгельбеть уема (шкась максови 2 част 20 минутат), мейле 180 вайгельбеть ардома велосипедсэ (8 част 10 минутат) ды меельцекс чиема 42 вайгельбеть. Весе дистанциянть ютамонтень максовить 17 част. Нама, сон прядови пелеветь. Кие кенери те шканть перть, свалшкас тензэ максови «кшнинь ломань» лемесь. Ды Сочинь се чиемасонть мон допрок те ломаненть мельга пачкодинь, сонзэ сельмензэяк коняс лиссть дивамодонть. Лисни, анокстазян аволь беряньстэ (мизолды).
Пек мелезэнь сестэ тусь пандонь коштось, койсэнь, сон иневеденседенть седе вадря. Ды пертьпельксэськак седе мазый. Се шкастонть саезь карминь вечкеме пандот. Теде мейле кавксть ульнинь Кисловодскойсэ ды вана апрельстэ пачколинь Эльбрусов.
– Юрий, инескеть, евтнек миненек седе домкасто Эльбруссо улемадонть.
– Содавикс тренерэнь пельде маринь Эльбрусов спортонь кэмпс группань пурнамодо ды паро мельсэ сермадстыя прям. Сынь саить мартост весень, кинь ули мелезэ активна оймсемс, ансяк васня вешить шумбрачинь коряс справка. Эдь ков седе верев кузят пандонть пряс, седеяк аламолгады кислородось. Аволь эрьванть шумбрачись тень цидярдсы.
Васенце чистэнть эрявсь састо молезь куземс 8 вайгельбеть. Тренерэсь эрьванть мельга ванось, кие кода прянзо мари. Группасонок весемезэ ульнесть 25 ломанть, кавтотне эйстэст – тренерт, эряви меремс, эйкакшткак саекшнесть. Сехте вишкинентень – 6 иеть. Ды эряви тешкстамс, весементь цидярдызе, овсе эзь кольне, эзь корта – сизинь. Свал паро ежосоль. Салава евтаса, пандо пряс куземстэ васняяк мартот саема вадря ежонть, сестэ весе стакачитне изнявить (мизолды). Эльбрусось васенце чистэнть вастымизь виев даволсо, кемекстазь таркантень эзинек пачкоде, савсь велявтомс лагерентень. Пек бойкасто тосо ловось кандови. Ды истямо тусто, комсешка метрань ютазь ломань а неяви. Нама, тосо ламо анокстазь экотропат, эрьвасонть улить невтемат, ве валсо, а емат виев даволнэяк.
Омбоцеде истямо виев даволс понгинек колмошка чинь ютазь. Те чистэнть валске марто сыргозинек, кудонок вальмало уш прась малав 20 сантиметрат лов. Обедтэ мейле кепедевинек верев 4000 метрань тарка. Подъемниктнень эйстэ кенеринек ютамо овсе аволь ламо, одс кепететсь давол. Мезеяк эзь неяво. Истя, кемекстазь 1,5 вайгельбетнень ютынек цела час. Вийтне молемс ульнесть, ансяк лексемс стакаль.
Чизэнзэ ютылинек зяро лисиль, весемесь аштесь пертьпельксэнть эйстэ. Валске марто васенце тренировканок ульнесь чийнемась, косояк 14 вайгельбеть. Эльбрусонь сехте сэрей текшось – 5860 вайгельбеть. Пачкодемс тов а стака, ансяк тень эряви теемс кизна, зярдо седе паро пертьпельксэсь. Минек туртов жо погодась сатотсь аволь пек вадря. 2000 метрань сэрьсэ таркасонть, косо минь эринек, сехте аламо температурась ульнесь –5 0С, сехте ламось – +150С. Бути аламошка куземс верев, овсе –170С якшамо.
Монень пек вечкевсь пандова куземась, овсе аволь стака ульнесь, бути тагояк тердьсамизь, апак кавтолдо молян.
Нама, Юрий истямо активной оймсемантень пек вадрясто анокстазь. Теньсэ лездыть эрьва чинь чийнематне. А бути чоп диван лангсо аштят ды сыргат истямо «оймсемас», те карми марявомо стакадояк стака тевекс. Койсэнь, вейкеяк «лавшо понкс» а кунды те тевентень…
Истят спортонь кэмптне тейневить эрьва кодамо масторсо ды ошсо. Эйсэст спортонь вечкиця ломанесь зярыя чис чопавти тренировкас од таркатнесэ. Те лезды аламос оймсемс эрьва чинь тевтнеде ды лезэвстэ ютавтомс явозь оймсема читнень. Сехте мельстуиця енксось – тей пурнавить вейке тевень вечкиця ломанть, мезесь лезды теевемс содавиксэкс эсеть кондямо спортонь вечкицянть марто. Ламотне тесэ теевить паро ялгакс ды седе товгак вейсэ ютавтнить юткошкаст.
Марина Агафонова
Фототне саезь Юрий Овчинниковонь семиянь архивстэ.